Өнөөдөр би тоо яримааргүй байна. Жилд хэд, сард төд...Одоо бүр тоо ярихаар муу ёр зөгнөөд байгаа юм шиг боллоо. Тоо дурьдахгүй хэдэн үг сийрүүллээ. Хөгжил гэж яриад байгаа нь барилга уу. Олон байшин баригдаад л байвал хөгжөөд л байгаа юм байна гэж ойлгох нь хэт өрөөсгөл асуудал болохыг бид бүгд мэддэг болсон. Хариуцлага, ухамсар хоёр хаачсан бэ? "Өндөр байшин их баригдаад л байвал осол их гарна" гэсэн хэлц үг ч юм уу? Байдал нэг л эвгүй болж байна шүү.

Саяхан л бид барилгаас хүн уналаа, явган зорчигчийн дээрээс барилгын хавтан унаж дарагдаж үхлээ, жолоочийн дээрээс төмөр унаж газар дээрээ нас барлаа, хүүхэд барилгад дарагдчихлаа гэхэд их л хирдхийн цочирддог байсан.Одоо бүр өдөр бүр гарч байх л ёстой юм шиг боддог болж дээ. Энэ олон эмгэнэлт үйл явдлаас адил төстэй үйл ажиллагаа явуулж байгаа бусад байгууллагууд ямар сургамж авсан юм, төр захиргааны байгууллагаас ямар дорвитой ажил хэрэгжүүлж байна гээд гээд хариуцах ёстой эздүүдийн тухай сонины хуудасны товч өгүүлбэр булангаас л цөөхөн юм олж харах юм даа. Болдог юм болдгоороо д болсон юм шиг бодох болсноос болж олон айлын хүүхдүүд өнчирч, олон ээж аавууд цөхрөнгөө барж, олон олон хүмүүс насан туршдаа хөгжлийн бэрхшээлтэй болж үлдэж байна.
Саяхан Баянзүрх дүүргийн цагдаагийн байгууллагаас барилгын ажлын хөдөлмөрийн аюулгүй байдалд хяналт тавих чиглэлээр шалгалт явуулахад барилгынхаа хөрөнгө оруулалтанд их мөнгө хаяж, ажилчдынхаа осол гэмтэл, аюулгүй байдлаас урьдчилан сэргийлэх чиглэлээр огт ажил хийхгүй байгаа олон зөрчил дутагдал гарсан. Энэ бол нэг дүүргийн цөөхөн барилга дээр хийгдсэн шалгалт.
Монголоор дүүрэн барилга барьж байна. Хяналт шалгалт ирвэл үзүүлэх хэдэн үзүүлэлт биш ЭРДЭНЭТ ХҮМҮҮНИЙ АМИЙГ АВРАН ХАМГААЛАХ, УРЬДЧИЛАН СЭРГИЙЛЭХ САЙН АЖИЛ ЗОХИОН БАЙГУУЛАХ ХЭРЭГТЭЙ БАЙНА.
Унасан хойно нь эмнэлэгт хүргэж, цагдаа шалгаж, эзэд нь хариуцлагаас зугтдаг ийм тогтолцоо үргэлжилсээр байхуу? Өнөөдөр би тоо ярьсангүй. Тоо ярьвал тоо ч бас бидэнтэй их зүйл ярьдаг юм шүү.