Цагдаагийн ерөнхий газрын дарга, дотоодын цэргийн командлагч, бригадын генерал Т.Сүхболд энэ оны 08 дугаар сарын 26-28-ний өдрүүдэд Баян-Өлгий, Ховд аймагт ажиллаж, нутаг дэвсгэр хариуцсан цагдаагийн байгууллагын үйл ажиллагаатай танилцан, процессын дахин инженерчлэлийн баруун бүсийн сургалтын нээлтийн үйл ажиллагаанд оролцон, алба хаагчид болон тэдгээрийн гэр бүлийн гишүүдтэй уулзаж, санал хүсэлтийг газар дээр нь шийдвэрлэж ажиллалаа.

Энэ үеэр Засгийн газрын Хяналт хэрэгжүүлэх газартай хамтран байгууллагын зохион байгуулалтын бүтцийг оновчтой болгох, алба хаагчдын ажлын бүтээмжийг нэмэгдүүлэх, иргэдэд үзүүлэх үйлчилгээний чанар, хүртээмжийг дээшлүүлэхэд чиглэсэн процессын дахин инженерчлэлийн судалгаа, шинжилгээний ажил болон баруун бүсийн нэгдсэн сургалт Ховд аймагт зохион байгуулагдсан.

Процессын дахин инженерчлэлийн баруун бүсийн нээлтийн үйл ажиллагаанд Засгийн газрын Хяналт хэрэгжүүлэх газрын дарга Б.Батцэцэг, тус газрын Төлөвлөлт, дахин инженерчлэлийн хэлтсийн дарга Н.Баясгалан нар оролцож Цагдаа, дотоодын цэргийн байгууллагад хийгдэж байгаа процессын дахин инженерчлэлийн явц, хүрэх үр дүнгийн талаар мэдээлэл хийсэн юм.