Цагдаагийн байгууллагаас өнгөрсөн долоо хоногт /2025.07.18-2025.07.25/ 76.267 хэрэгт мөрдөн шалгах ажиллагаа явуулж, 279 хэргийг шүүхэд шилжүүлэх саналтай прокурорын байгууллагад хүргүүлсэн байна. Үүнээс:

-Хүний амьд явах эрхийн эсрэг 7

-Хүний эрүүл мэндийн халдашгүй байдлын эсрэг 93

-Хүний бэлгийн эрх чөлөө халдашгүй байдлын эрэг 8

-Өмчлөх эрхийн эсрэг 93

-Олон нийтийн аюулгүй байдал, ашиг сонирхлын эсрэг 1

-Хүрээлэн байгаа орчны эсрэг 7

-Хөдөлгөөний аюулгүй байдал, тээврийн хэрэгслийн ашиглалтын журмын эсрэг 56

-Бусад 17 хэрэг байна. 

Зөрчлийн шинжтэй 66292 зөрчилд 65607 хүн холбогдуулан шалгаж зөрчил шалган шийдвэрлэх ажиллагаа явуулж, 148 иргэнд баривчлах шийтгэл оногдуулж, 96 баривчилж, эрх хасаж, 474 иргэнийг торгож, эрх хасаж, 1658 иргэнийг шийтгэврээр торгож шийдвэрлэсэн байна.

Мөн 2379 зөрчлийн шинжтэй үйлдэлд зөрчил шалган шийдвэрлэх ажиллагаа явуулж, эрх бүхий албан тушаалтны шийдвэрээр 1574 шийдвэрлэж, шүүхээр 805 зөрчлийг шийдвэрлүүлсэн байна.Үүнээс:

-Олон нийтийн газарт зүй бусаар биеэ авч явах 9

- Танхайрах 119

-Хүний биед халдах 307

-Гэр бүлийн хүчирхийлэлтэй тэмцэх тухай хууль зөрчих 118

-Замын хөдөлгөөний аюулгүй байдлын тухай хууль зөрчих 1346 бусад 480 зөрчил байна.

Мөн Хүүхдийн эрхийг зөрчсөн 75 иргэнд 22.200.000 төгрөгний шийтгэл оногдуулж гэр бүлийн хүчирхийлэл үйлдсэн 107 иргэнийг шүүхээр 7-30 хоног баривчилж, 11 иргэнийг 1.805.000 төгрөгөөр торгосон.

Шийдвэрлэсэн хэргээс дурдвал:

-Цагдаагийн байгууллагад “Сонгинохайрхан дүүргийн нутаг дэвсгэрт таксинд явж байх үед үйлчлүүлсэн иргэн буухдаа миний гар утсыг ашиглан данснаас 560,000 төгрөг шилжүүлж авсан байна” гэх хэрэг бүртгэгдсэн.

Тус хэрэгт мөрдөн шалгах ажиллагаа явуулж хэрэгт холбогдогчийг Монгол улсын Эрүүгийн хуулийн тусгай ангийн 26.1 дүгээр зүйлийн 1 дэх хэсэг, 17.1 дүгээр зүйлийн 1 хэсэгт зааснаар эрүүгийн хэрэг үүсгэж яллагдагчаар татан мөрдөн шалгах ажиллагаа явуулж хэргийг шүүхэд шилжүүлэх саналтай Хан-Уул дүүргийн прокурорын газарт хүргүүлсэн.

-Бүгд Найрамдах Хятад Ард Улсаас карго илгээмжийн үйлчилгээ ашиглан метамфетамин буюу “мөс” гэх нэршилтэй 67 грамм бодисыг Монгол Улсын хилээр нэвтрүүлсэн үйлдлийг илрүүлж мөрдөн шалгах ажиллагаа явуулж байна.

Тухайн этгээд нь өөрийн төрсөн аав, ах, эхнэр болон төрөл садангийн этгээдүүдтэй хамтран зохион байгуулалттайгаар худалдан борлуулдаг байж болзошгүй нөхцөл байдал урьдчилсан байдлаар тогтоогдоод байна. Эрүүгийн хуулийн Тусгай ангийн 20.7 дугаар зүйлийн 3 дахь хэсгийн 3 дахь заалтад “улсын хилээр нэвтрүүлж үйлдсэн бол таван жилээс арван хоёр жил хүртэл хугацаагаар хорих ял шийтгэнэ” гэж заасан байдаг.

Шалгаж шийдвэрлэсэн онцлог зөрчлийн талаарх:

-Цахим орчинд энэ оны 07 дугаар сарын 17-ны өдөр “Голын усанд хувцсаа угаагаад байгаа Оркуудад арга хэмжээ авна уу” гэсэн мэдээлэл олон нийтийн сүлжээнд нийтлэгдсэн. Цагдаагийн байгууллагаас зөрчил шалган шийдвэрлэх ажиллагаа явуулж,  зөрчил гаргасан 2 иргэнийг ЗТХ-ийн 7.15 дугаар зүйлийн 8 дахь хэсэг зааснаар тус бүр 100 нэгжээр торгох шийтгэл оногдуулсан.

-Мөн  2025 оны 07 дугаар сарын 11-ний өдөр цахим орчинд “Энэ эмэгтэй хогоо ил задгай хаяаад шаардлага тавихаар хэрэлдээд байх юм. Арга хэмжээ авна уу. ЦЕГ" гэсэн гарчигтай мэдээлэл олон нийтийн сүлжээнд нийтлэгдсэн. Уг зөрчилтэй холбогдуулан цагдаагийн байгууллагаас зөрчил шалган шийдвэрлэх ажиллагаа явуулж, Иргэн С-д 2025 оны 07 дугаар сарын 24-ний өдөр ЗТХ-ийн 5.1 дүгээр зүйлийн 1 дэх хэсэг зааснаар 20 нэгжээр торгох шийтгэл оногдуулсан.

Нийтийн мэдээллийн ил тод байдлын тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг чанд баримтлан товч байдлаар олон нийтэд мэдээлж байгаа болно.