Айлчлалын хүрээнд Цагдаагийн ерөнхий газрын дэд бөгөөд Стратеги, бодлого, инновац, хөгжлийн албаны дарга, бригадын генерал О.Ганбат, Нийслэлийн цагдаагийн удирдах газрын дарга, цагдаагийн хурандаа Э.Товуудорж нар төлөөлөгчдийг хүлээн авч уулзлаа.

Уулзалтын үеэр хил дамнасан, зохион байгуулалттай гэмт хэрэгтэй тэмцэх, гэмт хэрэг үйлдээд оргон зайлсан этгээдүүдийн талаар болон шаардлагатай мэдээ, мэдээллийг шуурхай солилцох, үйл ажиллагаанд нэвтрүүлсэн техник, технологи, иннновацын талаар туршлага судлах, алба хаагч суралцуулах чиглэлээр хамтран ажиллах боломжуудын талаар санал солилцсон юм. Тухайлбал, хиймэл оюун ухаан, хяналтын систем болон дэвшилтэт технологи нэвтрүүлэх, “Big Data”-д суурилсан дүн шинжилгээ, инновацын шийдлийг хууль сахиулах байгууллагын үйл ажиллагаанд ашиглах, цахим залилан, кибер гэмт хэрэг, соёлын өвийн эсрэг гэмт хэрэгтэй тэмцэхэд алба хаагчдыг мэргэшүүлэх, мансууруулах болон сэтгэцэд нөлөөт бодисын хууль бус эргэлттэй тэмцэх чиглэлээр хамтран ажиллахаар ярилцлаа.

Гуандун муж нь БНХАУ-ын 5 мега хотын хоёр нь байрладаг муж бөгөөд эдийн засгийн өндөр ач холбогдолтой, хууль сахиулах салбарын тэргүүлэх технологийн үйлдвэрлэл хөгжсөн бүс нутаг юм.

Энэхүү айлчлал нь Нийслэлийн цагдаагийн удирдах газар болон Гуандун мужийн хууль сахиулах байгууллагуудын хамтын ажиллагаа өргөжих, шинэ түвшинд хөгжүүлэх ач холбогдолтой арга хэмжээ болж буйг талууд онцлов.