1.Би хар тамхи татдаг.
Одоо ингэж хэлээд гайхуулах нь холгүй залуус олон болж байна. Тэд юу боддог бол....Ирээдүйгээ хэрхэн төсөөлдөг бол...Ээж аавдаа юу гэж хэлдэг бол... Тэд яагаад хэрэглэдэг юм бол... Энэ тухай ярихад маш олон асуулт гарч ирнэ. Хариулахад амархан уу? 
Хар тамхины эсрэг тэмцэж, хүний оюун санаа, эрүүл мэнд, санхүүгийн хараат байдалд оруулдаг ХАР МӨХӨЛ, ЦАГААН ТАХАЛ гээд хор уршгийнх нь талаар их л ярих болж. Харин хар тамхи, мансууруулах, сэтгэцэд нөлөөлөх бодисонд хамааралтай хүмүүс нь үүнийг олж уншихгүй, ойлгохгүй мэдэхгүй байна уу. Аль эсвэл уншаад, ойлгоод, мэдсээр байж ухамсарлахгүй байна уу. Мэргэжлийн байгууллагууд монгол улсын үндэсний аюул байдалд хор хохирол учруулах хэмжээнд хүрч болзошгүй болсон гэж үзэж байгаа энэ үед хар тамхи мансууруулах бодистой холбоотой гэмт хэрэгт залуус маань ихээхэн өртөх болсон нь дэндүү харамсалтай.

2. Тоо баримт юу өгүүлж байна вэ?
Манай улсад 2010 онд 15 гэмт хэрэгт 75 хүн, 2011 онд 26 гэмт хэрэгт 107 хүн, 2012 онд 36 гэмт хэрэгт 171 хүн, 2013 онд 37 гэмт хэрэгт 99 хүн, 2014 оны 10-р сарын 01 ний байдлаар 34 гэмт хэрэгт 99 хүн холбогдон шалгагдснаас харахад бүртгэгдсэн гэмт хэрэг, холбогдсон иргэний тоо жил бүр өсч байна. 2010-2014 оны 10 сарын байдлаар 149 гэмт хэрэгт 551 хүн шалгагдсан нь энэ төрлийн гэмт хэрэг 4,9, холбогдогч 5.1 дахин өссөн үзүүлэлттэй байна. 
Бид энэ тооны өсөлтийг зогсоох тийм боломжгүй гэж үү? Таныг завгүй завгүй гээд явж байхад таны хүүхэд ийм хэрэгт холбогдох хэмжээнд хүрчихсэн байгааг анзаараагүй байгаа юм биш үү. Залуустай ярилцах сэдэв улам л өргөн болж байна шүү дээ. Хичээл сурлага, эрүүл мэнд, үерхэл нөхөрлөл, ахуйн хэрэглээнээс хальчихсан байгааг бид сайн мэдэх хэрэгтэй байна. 
Хүүхэд залуус бие биенээ дагаж дууриах, сонирхож хэрэглэх замаар донтох явдал түгээмэл байгаа нь урьдчилан сэргийлэх ажлыг өсвөр үе, оюутан залуучуудын дунд зохион явуулах, ажил мэргэжилтэй болгоход төрийн бодлого үгүйлэгдэж эхэллээ.

3. Ийм нэгэн явдал 
Шөнийн сурвалжлага хийгээд явж байлаа. Хоёр ээж уйлаад л байх юм уйлаад л байх юм. Уйлалгүй яахав дээ. Хөвгүүд нь алдаа гаргажээ. Бид энэ хүүхдүүдийг юугаар ч дутаагаагүй, идэх өмсөх, эдлэх хэрэглэх, унах унаа....гээд л уйлаад байна. Харин тэд энэ л үед хүүтэйгээ ярилцах, анхаарах, мэдэх, таних ёстойгоо ухаарч байлаа. Охид ч ялгаагүй энэ төрлийн гэмт хэрэгт их холбогдож байна. Тал талаас нь бодоход зуун хувь ээж аавын буруу байх албагүй. Бусдад уруу татагдсан явдал их байдаг. Хар тамхинаас болж дэлхий дээр 3 минут тутам 1 хүн амь насаа алддаг гэж НҮБ-аас мэдээлж байсан. Тэгэхээр энэ төрлийн бодис бол ҮХЛИЙН ХӨТӨЧ юм. 
Нөгөө талаар шунахайн сэдэлтээр, ашиг олох зорилготой хэсэг бүлгээс зугаацаж цэнгэн, мансууруулах зорилгоор мансууруулах бодис хэрэглэгчдийн давхарга нэмэгдэж байгаагаас гадна өс хонзонгийн сэдэлтээр энэ төрлийн гэмт хэрэгт бусдыг гүтгэх гэсэн гэмт үйлдлийн аргууд нэмэгдэж болзошгүй байна гэж албаны эх сурвалж нотлож байна 
 

4. Эрүүл мэнд яах билээ? 
Энэ төрлийн бодис хэрэглэснээр ахин дахин улам ихээр хэрэглэх эмгэг дуршлыг бий болгож сэтгэц болон бие махбодыг хараат байдалд оруулан "донтох эмгэг" үүсгэдэг мансууруулах болон сэтгэцэд нөлөөт эм, бэлдмэл бодис болохыг мэргэжлийн хүмүүс батласан. Шүд унах, яс хэврэгших бие эрхтэний системүүдэд сөргөөр нөлөөлж удмын санд өөрчлөлт оруулах юм. Мөн бие сэтгэцийн гажигтай хүүхэд төрөх, тэвчишгүй өвдөлтийг мэдрүүлж дахин хэрэглэхийг шаардахаас гадна B,C гепатит, бэлгийн замын халдварууд, ХДХВ/ДОХ гэх мэт өвчинд өртөх аюултай. 
Залуус яагаад энэ аюулыг хүсээд байна.Энэ талаар бодох цаг хэдийнээ болжээ. 
Би хар тамхи татдаг....Хүү чинь үүний оронд ээжээ би Харвардын их сургуульд сурна гэдэг мөрөөдөлтэй, ирээдүйтэй бол сайхан биш гэж үү? Хамтдаа тэмцье.