“Нягтлах тусам аюулгүй”

Монголчууд дэндүү гэнэн, итгэмтгий бас хэтэрхий өрөвч хүмүүс. Хэн нэгэн хүн яаралтай мөнгө хэрэг боллоо, энэ дансруу тэдэн төгрөг шилжүүлээд өг, энэ картнаас мөнгө аваад өг гэхэд үгүй гэж хэлж чаддаггүй. Үүнээсээ болж залилах гэмт хэргийн хохирогч болох эрсдэл маш өндөр байдаг.

Тухайлбал таныг банк, АТМ дээр оочирлоод зогсож байхад “Миний карт болохгүй байна, дансруу чинь мөнгө шилжүүлээд өөрөөс чинь бэлэн авчихъя”, “Эгчээ та энэ картнаас мөнгө аваад өгөөч, би ажиллуулж мэддэггүй юм” гэх мэт хэн нэгэн таниас тусламж гуйж байсан уу?

Тэр үед та энэ хүнд тусламж хэрэгтэй байгаа юм байна гэж бодохоос цагдаа, шүүхийн байгууллагын хаалгыг татна хэмээн яаж бодох билээ.

Гэтэл тэд хэн нэгний аргыг олчихсон, хэн нэгнийг хуурч мэхэлж, залилаад сурчихсан байна. Таниас тусламж хүсч байгаа нэрийдлээр эелдгээр хэрэгтэн болгож байж мэднэ.

Ингэж гэнэн бас хэт тусархуу байж үл болно. Үнэхээр яг тусламж хэрэгтэй байгаа болов уу? эсвэл гэмт хэрэг, зөрчил үйлдэж байна уу гэдгийг тус хүргэхээсээ өмнө анзаарч нэг хараарай.

Хуулийн байгууллагын гадаа би хэзээ ч хүн залилж, мэхэлж, хуурч байгаагүй тэгэх ч хүн биш яагаад ийм юм болчихвоо гээд уйлаад суух хүн цөөнгүй байдаг.

Цагдаагийн байгууллага энэ төрлийн гэмт хэргээс урьдчилан сэргийлэх зорилгоор энэ онд “Ятгах тусам нягтал”, “Нягтлах тусам аюулгүй” зэрэг аян, арга хэмжээг зохион байгуулсан нь үр дүнгээ өгч байна.

Энэ төрлийн гэмт хэрэг нь хүний иргэдийн эд хөрөнгө, эд хөрөнгийн эрхэд халдсан, нийгэмд аюултай, Эрүүгийн хуульд заасан гэм буруутай үйлдлийн цогц гэж ойлгож болно. Залилах гэмт хэрэг нь хамгийн түгээмэл үйлдэгддэг өмчийн эсрэг гэмт үйлдлийн төрөлд хамаардаг.

Монгол Улсын Эрүүгийн хуулийн 17.3-д “Хуурч, эсхүл баримт бичиг, эд зүйл, цахим хэрэгсэл ашиглаж, эсхүл зохиомол байдлыг зориудаар бий болгох, сүсэг бишрэлийг далимдуулах, бодит байдлыг нуух замаар бусдыг төөрөгдөлд оруулж, эсхүл нэр хүнд, урьдын харилцааны явцад бий болсон итгэлийг урвуулан ашиглаж эзэмшигч, өмчлөгчийн эд хөрөнгө, эд хөрөнгийн эрхийг шилжүүлэн авах” нь залилах гэмт хэрэг гэж заасан байдаг.

Таны нэр хүнд, сүсэг бишрэл, итгэл үнэмшлийг ашиглан хэрэгтэн, аль эсвэл хохирогч болгох гэж байх вий. Үргэлж сонор сэрэмжтэй бай!

“Ятгах тусам нягтал, нягтлах тусам аюулгүй”.