Хугацаат цэргийн алба хаагчдад явуулж буй албаны сургалт, бэлтгэлийн талаар Дотоодын цэргийн штабын Сургалт, цэргийн албаны зохион байгуулалтын хэлтсийн дарга, дэд хурандаа Б.Чинзоригтой ярилцлаа.

Дотоодын цэрэг дахин байгуулагдаад хугацаат цэргийн алба хаагчдыг татан авч, цэргийн жинхэнэ албыг хаалгуулж байна. Цэргийн алба хаах энэ хугацаанд алба хаагчдыг сургах, хөгжүүлэх чиглэлээр ямар арга хэмжээ, сургалт зохион байгуулж байна вэ?

Монгол Улсын Засгийн газрын 2019 оны тогтоолын хэрэгжилтийг хангах ажлын хүрээнд “2020 оны хоёрдугаар ээлжийн цэрэг татлагаар дотоодын цэрэгт төв, орон нутгаас татан авах хугацаат цэргийн алба хаагчдын хяналтын тооны санал”-ыг Зэвсэгт хүчний Жанжин штабт хүргүүлж, зөвхөн Нийслэлийн хэмжээнд цэрэг татан авахаар шийдвэрийг гаргуулж, Дотоодын цэргийн командлагчийн 2020 оны А/12 дугаар “Цэргийн жинхэнэ албанд цэрэг татах ажлыг зохион байгуулах тухай” тушаалаар хугацаат цэргийн алба хаагчдыг татан авах ажлыг мөн оны 10 дугаар сарын 22-ноос 25-ны өдрүүдэд Нийслэл, дүүргүүдийн цэргийн штабууд болон цагдаагийн газар, хэлтсүүдтэй хамтран зохион байгуулсан.

Үүний дараа Дотоодын цэргийн штабын даргын 2020 оны А/18 дугаар “Цэргийн анхан шатны бэлтгэл эзэмшүүлэх сургалтын төвийг зохион байгуулах тухай” тушаалаар цэргийн анхан шатны бэлтгэл эзэмшүүлэх сургалтын төвийн үйл ажиллагааг батлагдсан хөтөлбөр, төлөвлөгөөний дагуу 45 хоногийн хугацаатай явуулж, Дотоодын цэргийн командлагчийн 2020 оны “Цэргийн тангараг өргөх ёслол зохион байгуулах, байлдааны туг залах тухай” А/15 дугаар тушаалаар өнгөрсөн оны 12 дугаар сарын 11-ний өдөр цэргийн тангараг өргүүлж, цэргийн жинхэнэ албыг хаалгуулж байна.

Хугацаат цэргийн алба хаагчидтай зохион байгуулах сургалтыг “Дотоодын цэргийн тухай хууль”, “Цэргийн нийтлэг дүрмүүд”, “Дотоодын цэргийн алба-ажиллагааны дүрэм”, “Дотоодын цэргийн үйл ажиллагааны журмууд” болон бусад холбогдох хууль тогтоомж, дүрэм, зааврыг удирдлага болгон Дотоодын цэргийн штабын даргын 2021 оны А/02 дугаар “Албаны сургалт, бэлтгэлийн хөтөлбөр, төлөвлөгөө батлах тухай” тушаалын дагуу “Дотоодын цэргийн алба-ажиллагааны үндэс”, “Харуулын алба”,  “Цэргийн хэргийн онолын үндэс”, “Хууль эрх зүй”, “Цэрэг, эх оронч хүмүүжил”, “Зэвсэг, техникийн бэлтгэл”, “Цэргийн нийтлэг дүрмүүд”, “Цэргийн биеийн тамир”, “Харилцааны соёл, сэтгэл зүй”, “Эмнэлгийн анхан шатны тусламж үзүүлэх” гэсэн чиглэлүүдээр явуулж, хугацаат цэргийн алба хаагчдад Дотоодын цэргийн тухай хуулиар хүлээсэн чиг үүргийг хэрэгжүүлэхэд шаардлагатай мэдлэг, дадлага, бие бялдар, сэтгэл зүйн  бэлтгэл эзэмшүүлэх, хөгжүүлэх сургалтыг үе шаттай зохион байгуулдаг. 

Хугацаат цэргийн албанд алба хаагчдыг хөгжүүлэхээс гадна, төлөвшүүлэх чиглэлээр багагүй ажлууд зохион байгуулдаг байх. Энэ талаар яривал?

Дотоодын цэргийн байгууллага нь улсын онц чухал объектыг хамгаалах, нийтийн хэв журам сахиулах, олон нийтийн аюулгүй байдлыг хангах, гэмт хэргийг таслан зогсооход дэмжлэг үзүүлэх, гамшиг, аюулт үзэгдэл, осол, аюул тохиолдсон үед болон эрэн хайх, аврах, хор уршгийг арилгах, хойшлуулшгүй сэргээн босгох ажиллагаанд дэмжлэг үзүүлэх, шаардлагатай үед зарим объектыг түр хугацаагаар хамгаалах, зорчигч, ачаа тээшийг харгалзан хүргэх, террорист үйлдлийг таслан зогсоох тусгай ажиллагаанд оролцох гэх мэт хуулиар хүлээсэн чиг үүргүүдийг гүйцэтгэдэг.

Хугацаат цэргийн алба хаагчдад хуулиар хүлээсэн үүргээ илүү өргөн цар хүрээнд хариуцлагатайгаар гүйцэтгэхэд шаардлагатай албаны болон сэтгэлзүйн мэдлэг, чадвар олгоход чиглэгдсэн олон төрлийн соёл хүмүүжил, мэдээлэл, сурталчилгааны ажлыг зохион байгуулахаас гадна “Цэрэг-эх оронч үзэл”-ийг төлөвшүүлэх чиглэлээр тодорхой ажлуудыг төлөвлөн зохион байгуулдаг. Дайчдад эх оронч үзэл, ухамсрыг төлөвшүүлэх, цэргийн сахилга батыг сахиулах зорилгоор зохион байгуулж байгаа ажлууд нь тухайн хугацаат цэргийн алба хаагчдыг өргөсөн тангарагтаа үнэнч байж, албаа нэр төртэй хаах, цэргийн дүрэм, журмыг мөрдөж, хэрэгжүүлж сурах, захиран захирагдах ёс, найз нөхдөө хүндлэх ухаан, цаашлаад гэр бүл, эх орондоо хайртай эр хүн болж төлөвшихөд ихээхэн ач тустай юм.

Дотоодын цэрэгт хугацаат цэргийн алба хаасан иргэд бусад албанд цэргийн жинхэнэ алба хаасан иргэдээс зарим зүйлээр онцлог болон давуу талтай байдаг. Тухайлбал, Хугацаат цэргийн албаа хаагаад цагдаа, дотоодын цэргийн байгууллагад ажиллах боломж нээгддэг шүү дээ. Та энэ талаар дэлгэрэнгүй мэдээлэл өгнө үү?

Дотоодын цэргийн байгууллагад татагдан хугацаат цэргийн алба хааснаараа Хууль эрх зүйн мэдлэг дээшлэх, Цэрэг эх оронч хүмүүжилд төлөвших, бие бялдар, сэтгэл зүйн бэлтгэл эзэмшихээс гадна, тухайн цэрэг цаашид цэрэг, цагдаагийн албан хаагч болох хүсэл сонирхолтой бол цэргийн албаа хааж байх хугацаандаа Цагдаа, дотоодын цэргийн байгууллагаас зарласан сонгон шалгаруулалтын болзол шаардлагыг хангаж, тэнцсэн тохиолдолд “Цагдаа”, “Харуулчин” мэргэжил олгох сургалтад хамрагдаж, Цагдаа, дотоодын цэргийн алба хаагчдын эгнээд орох давуу талтай байдгаараа онцлог юм.

Иймд цэргийн албанд татагдаж, цаашид Цагдаа, дотоодын цэргийн алба хаагч болох хүсэл сонирхолтой залуучуудад уриалахад манай байгууллагын үүд хаалга нээлттэй шүү гэж зөвлөе.

2020 оны II ээлжээр цэргийн жинхэнэ албанд татагдсан хугацаат цэргийн алба хаагчид халагдах дөхөж байна. Тухайн алба хаагчдаас цаашид цагдаа, дотоодын цэргийн байгууллагад ажиллах хүсэлтэй алба хаагчид байгаа байх. Эдгээр алба хаагчдад зориулсан сургалт зохион байгуулагдаж байгаа юу?

Дотоодын цэрэг цагдаагийн байгууллагын ахлагч албан тушаалын сул орон тоог нөхөх хүний нөөцийн хэрэгцээ, шаардлагын хүрээнд 2020 оны II ээлжээр Дотоодын цэрэгт татагдан ирж, цэргийн жинхэнэ алба хааж байгаа хугацаат цэргийн алба хаагчдаас Дотоодын цэргийн “Харуулчин” мэргэжил олгох сургалтад хамрагдах хүсэлт гаргасан 52, “Цагдаа” мэргэжил олгох сургалтад хамрагдах хүсэлт гаргасан 10 хугацаат цэргийн алба хаагчдыг судалж, Дотоодын цэргийн командлагчийн 2021 оны А/13 дугаар “Харуулчин мэргэжил олгох сургалт зохион байгуулах тухай” тушаалын дагуу энэ оны 08 дугаар сарын 23-ны өдрөөс 09 дүгээр сарын 24-ний өдөр хүртэлх хугацаанд “Цагдаа, дотоодын цэргийн сургалтын нэгдсэн төв”-тэй хамтран сургалтыг амжилттай зохион байгууллаа.

Цаашид Дотоодын цэрэгт татагдан ирсэн иргэдэд тусгай мэргэжил эзэмшүүлэх, ур чадварыг дээшлүүлэх зорилгоор ямар ажил, арга хэмжээ авч ажиллахаар төлөвлөж байна вэ?

Цаашид бид Дотоодын цэргийн анги, байгууллагад татагдан ирсэн иргэдийг цэргийн жинхэнэ алба хааж байх хугацаанд нь тусгай мэргэжил эзэмшүүлэх сургалтыг “Цагдаа, дотоодын цэргийн сургалтын нэгдсэн төв“ болон бусад “Мэргэжил сургалт үйлдвэрлэлийн төв”-үүдтэй хамтран зохион байгуулахаар төлөвлөн ажиллаж байна.

Улмаар тухайн хугацаат цэргийн алба хаагч цэргийн албаа хаахаас гадна алба хааж байх хугацаандаа тусгай мэргэжилтэй болж, Цагдаа, Дотоодын цэргийн байгууллагад “Цагдаа”, “Харуулчин”, “Жолооч” гэх зэрэг ажлын байранд ажиллах боломж бас нээгдэж байна гэсэн үг.

Ярилцсан баярлалаа. Танд амжилт хүсье.