ХУУЛЬ ЗҮЙН ҮНДЭСНИЙ ХҮРЭЭЛЭНГЭЭС МЭДЭЭЛЖ БАЙНА

Хууль сахиулахын их сургууль, ХБНГУ-ын “ХАННС-Зайделийн сан”, Хууль зүйн үндэсний хүрээлэн, Суурийн Жанцан сан”-гаас хамтран “Танхайрах гэмт явдал” сэдэвт эрдэмтэн, судлаачдын уулзалт, хэлэлцүүлгийг гуравдугаар сарын 28-нд Хууль зүйн үндэсний хүрээлэнгийн Хуульчдын танхимд зохион байгууллаа.
Энэ үеэр хэлэлцүүлэгт оролцогчид Монгол Улсын гавьяат хуульч, Хууль зүйн шинжлэх ухааны доктор, профессор Суурийн Жанцан агсны судалж байсан сэдэв болох танхайрах гэмт явдалтай тэмцэж ирсэн Эрүүгийн эрх зүйн түүхэн уламжлал, өнөөгийн энэ төрлийн гэмт хэргийн криминологи шинж, чиг хандлагыг эрдэмтэн, судлаачдын хүрээнд хэлэлцлээ.

Эрүүгийн хууль тогтоомжийн хөгжилд онолын үндэслэл талаас тодорхой хувь нэмэр оруулах нь тус хэлэлцүүлгийн зорилго болохыг зохион байгуулагчид онцлов.

Энэхүү уулзалт хэлэлцүүлэгт Хууль зүйн яам, Цагдаагийн ерөнхий газар, Шинжлэх ухааны академи, хууль зүйн их, дээд сургуулиуд, эрдэм шинжилгээний хүрээлэнгийн эрдэмтэн, судлаачид, төрийн бус байгууллагын төлөөлөл, талийгаачийн ар гэрийнхэн оролцов.
Г.Оюунболд: С.Жанцан агсны онол сургаал юу байсныг залуу судлаачдад хүргэхийг зорьсон

Хэлэлцүүлгийн үеэр УЕПГ-ын Хяналтын прокурор Г.Оюунболдтой уулзлаа. Тэрбээр “Танхайрах гэмт явдал” нь хүн төрөлхтний аль ч үед байсаар л өдий хүрсэн. Цаашид аль хэмжээнд авч үзэх, ял нь их үү эсвэл бага байх уу, энэ нь гэмт хэрэг биш зөрчил байх ёстой юм уу гэдэг нь шийдлийн асуудал юм. Бид өнөөдрийг хүртэл 90 жилийн түүхтэй Эрүүгийн эрх зүйн түүх, уламжлалын талаар ярилцаж, санал бодлоо солилцлоо. Эрүүгийн хууль, Зөрчлийн хууль шинээр батлагдсан. Хууль тогтоогчдод энэ хуулийн гэмт хэргийн зөрчлийг ялган шийдэх шийдлийг санал болгохыг зорьж байгаа. Танхайрахын уламжлалт шинж чанарууд бий. Ялангуяа Жанцан агсны өөрийнх нь онол сургаал юу байсныг, бид цаашид хэрхэн хөгжих ёстойг, залуу эрдэмтэн, судлаачдад хүргэхийг зорьж буй юм” гэлээ.
С.Жанцан агсны гэргий Т.Баатархүү: Ханийн маань судалж байсан сэдвийн хүрээнд хэлэлцүүлэг өрнүүлсэнд баярлалаа

Харин С.Жанцан агсны гэргий Т.Баатархүү “2014 онд Хууль сахиулахын их сургууль талийгаачийн нэрэмжит эрдэм шинжилгээний хурал зохион байгуулсан. Тухайн үед хуралд талийгаачийн ар гэр, анд нөхөд, эрдэмтэн судлаачид хүрэлцэн ирснээр “Суурийн Жанцан сан” анх байгуулагдсан. Энэхүү сан байгуулагдсанаар бид бакалаврын түвшний бөгөөд судлаачдын дунд уралдаан зохион байгуулсан. Мөн 2015 онд ХБНГУ-ын “ХАННС-Зайделийн сан”-тай хамтарч эрдэмтдийн дунд Эрүүгийн байцаан шийтгэх хуулийн чиглэлээр мөн л тодорхой арга хэмжээг зохион байгуулж байлаа. Харин энэ удаагийн хэлэлцүүлгийг Хууль сахиулахын их сургуулийн удирдлагууд, хамт олны дэмжлэгтэйгээр “ХАННС-Зайделийн сан”, Хууль зүйн үндэсний хүрээлэн, “Суурийн Жанцан сан”-тай хамтран зохион явуулсанд талархаж байна.

Гол нь ханийн маань судалж байсан сэдвийн хүрээнд хэлэлцүүлэг өрнүүлсэнд баярлалаа. Шинжлэх ухаан хурдацтай хөгжиж буй өнөө үед хүмүүс олон ургалч үзлээр үзэл бодлоо чөлөөтэй илэрхийлдэг болсон. Цаашид шинжлэх ухааныг хөгжүүлэх, тус салбарын нарийвчлан судлах үйлст “Суурийн Жанцан сан” залуу эрдэмтэн судлаачидтай хамтарч ажиллахад бэлэн. Мөн та бүхэнтэй хамтарч энэ мэт олон арга хэмжээг зохион байгуулахад бэлэн гэдгээ хэлье. Энэ дашрамд ханийн маань үе үеийн шавь нар, хамт ажиллаж байсан багш, албан хаагчид та бүхнээр бахархаж явдгаа хэлмээр байна. Тэр дундаа Хууль сахиулахын их сургуулийн удирдлагуудад талархсанаа илэрхийлье” гэв.