Бүгд Найрамдах Сингапур Улс дахь Интерполын Дэлхийн инновацын цогцолборт энэ оны 08 дугаар сарын 31-нээс 09 дүгээр сарын 04-ний өдрүүдэд зохион байгуулагдсан “Хохирогч таньж тогтоох Азийн бүсийн ажлын хэсэг”-ийн уулзалтад Мөрдөн шалгах албаны Хүүхдийн эсрэг болон хүүхдээс үйлдсэн гэмт хэрэг мөрдөн шалгах хэлтсийн алба хаагч оролцлоо.

Энэхүү уулзалтын зорилго нь Азийн бүсийн мэргэшсэн мөрдөгчдийг нэгтгэн, хүүхдийн бэлгийн мөлжлөгийн шинжтэй дүрс, бичлэгийн материалд хамтарсан дүн шинжилгээ хийх, хохирогч, гэмт этгээд болон гэмт хэрэг үйлдэгдсэн байршлыг тогтоох, мөрдөн шалгах ажиллагаанд ач холбогдол бүхий мэдээллийг илрүүлэхэд чиглэсэн юм.

Оролцогчид өөрсдийн мөрдөн шалгах ажиллагааны туршлага, хэл, соёлын онцлогт тулгуурласан мэдлэгээ харилцан хуваалцаж, мэдээлэлд хамтран дүн шинжилгээ хийснээр хохирогч, гэмт этгээдийг таньж тогтоох ажиллагааг эрчимжүүлэх, улс хоорондын мэдээлэл солилцоо болон хууль сахиулах байгууллагуудын хамтын ажиллагааг бэхжүүлэхэд чухал ач холбогдолтой байв.