Олон улсын эрх зүйн хөгжлийн байгууллага (IDLO)-аас хэрэгжүүлж буй “Монгол Улсад жендерт суурилсан хүчирхийлэлтэй тэмцэх нь” (2025–2030) төслийн хоёрдугаар шатны хүрээнд гэр бүлийн хүчирхийллийн зөрчил шалган шийдвэрлэх эрх бүхий алба хаагчдын хууль хэрэглэх ур чадварыг дээшлүүлэх, хүчирхийлэл үйлдэгчид хуульд заасан хариуцлагыг тухай бүр оногдуулах, гэр бүлийн хүчирхийллийг эрт илрүүлэх, хохирогчийг хамгаалах, шаардлагатай үйлчилгээтэй холбон зуучлах ажиллагааны үр нөлөөг нэмэгдүүлэх зорилготой сургалтыг 2026 оны 06 дугаар сарын 11-нээс 24-ний өдрүүдэд зохион байгуулж байна.

Сургалтад нийслэлийн 9 дүүргийн цагдаагийн газрын харьяа 17 хэлтсийн алба хаагчид хамрагдаж байгаа бөгөөд Цагдаагийн ерөнхий газрын Урьдчилан сэргийлэх алба, Гэмт хэрэг, зөрчил шалгах алба, Нийслэлийн цагдаагийн удирдах газар нь Дүүргийн эрүү, иргэний хэргийн хялбар ажиллагааны анхан шатны тойргийн шүүх, Улсын ерөнхий прокурорын газар болон Олон улсын эрх зүйн хөгжлийн байгууллага (IDLO)-тай хамтран зохион байгуулж байна.

Өнөөдөр (2026.06.11) болсон сургалтад Чингэлтэй дүүргийн прокурорын газрын Зөрчлийн хэргийн хяналтын прокурорууд оролцож, гэр бүлийн хүчирхийллийн зөрчлийг бүртгэх, шалган шийдвэрлэх, прокурорын хяналт, шүүхийн шийдвэрлэлтийн үйл ажиллагаатай холбоотой асуудлаар мэдээлэл өгч, мэргэшсэн сургагч багш нар хичээл заалаа. Тус сургалтын онцлог нь гэр бүлийн хүчирхийллийн зөрчлийн хэрэг цагдаагийн байгууллагад бүртгэгдсэнээс эхлэн шүүхээр эцэслэн шийдвэрлэгдэх хүртэлх бүхий л үе шатны ажиллагааг цогцоор нь хамруулж байгаад оршино.

“Монгол Улсад жендерт суурилсан хүчирхийлэлтэй тэмцэх нь” төслийн хүрээнд гэр бүлийн хүчирхийлэлтэй тэмцэх тогтолцоог бэхжүүлэх, хохирогч төвтэй үйлчилгээний хандлагыг төлөвшүүлэх, хууль сахиулах байгууллага, шүүх эрх мэдлийн байгууллага болон иргэний нийгмийн байгууллагуудын хамтын ажиллагааг сайжруулахад чиглэсэн олон талт арга хэмжээг хэрэгжүүлж байна.