Бид ирээдүйгээ үргэлж сайнаар төсөөлж, хамгийг гэгээлэн бүхнийг өөртөө болон бусдад хүсдэг. Гэвч хүний амьдралд юу эс тохиолдох билээ. Өвдөх, ядрах, шантрах гээд олон олон асуудал гарч ирсээр байдаг.

Гэхдээ бид үүнийг материаллаг эд зүйл болон сэтгэлийн тэнхээгээрээ ялан туулдаг. Өвдвөл эм ууж, өлсвөл хоол идэж, ядарвал амарч...

Энэ бүхэн эцэстээ юуны төлөө юм бэ? Үр хүүхдүүдээ сайн сайхан амьдруулах, эрдэм боловсролтой болгохын тулд өөрөө өөрийгөө умартан зүтгэж яваа Монголын мянга мянган аав, ээжүүд бий.

Хүүхэд минь л мэдлэг боловсролтой, эх орондоо ихийг хийж бүтээвэл болох нь тэр, үр хүүхэд минь л өвдөж зовохгүй бол тэр хамгийн сайхан зүйл, охин минь, хүү минь л аз жаргалтай байвал би болно доо гэх маш олон эцэг, эх, эмээ, өвөө нар байдаг.

Хүүхэд гэдэг өөрөө аз жаргал, амьдралын гэрэл гэгээ, сахиусан тэнгэрүүд байдаг. Инээж байгаа хүүхдийн өөдөөс хараад уурладаг хүн байхыг мэдэхгүй. Эцэг, эхийнхээ амьдралын утга учир, элбэрэл хайрын даль жигүүр бол яахын аргагүй бидний үргэлжлэл бяцхан ертөнцүүд.

Тэднийг баярлаж байхад, тэднийг инээж байхад, тэд даль жигүүрээ нээж байхад хүн бүр өөрийн эрхгүй нүүрэндээ инээмсэглэл тодруулдаг. Тэд бол аз жаргал бэлэглэгчид.

Гэвч бид дэндүү хэнэггүй, дэндүү хайнга хүмүүс. Бид завгүй ажиллаж, хөдөлмөрлөж байгаа хэдий ч үр хүүхэддээ яагаад бүрэн гүйцэт анхаарал хандуулж чадахгүй байна вэ?

Та яг одоо өөрөөсөө асуугаад үзээрэй. Хайрын минь гэрч болсон, аз жаргал, амьдралын минь даль жигүүр болсон хонгор үрдээ би хангалттай цаг зав, анхаарал халамж тавьдаг уу? гээд... Хариултыг та өөртөө үлдээ.

Үр хүүхдийнхээ ирээдүйн сайн сайхны төлөө ажилладаг хэдий ч өнөөдөр, яг одоо таны анхаарал халамж таны хүүхдэд маш их хэрэгтэй байгааг мартаж болохгүй.

Таны анхааралгүй өнгөрүүлсэн хором таны хүүхдэд эрсдэл учруулж болзошгүй. Тэд буцалж байгаа ус халуун гэж мэдэхгүй, тэд таван давхар барилгыг өндөр гэж мэдэхгүй, тэд цахилгааны утсыг тогтой гэж мэдэхгүй, тэд аюул гэж юу болохыг огт мэдэхгүй.

Хайртай энхрий бяцхан үрсийнхээ төлөө аюул бүрийг тэднээс холдуулж, цаг, хором мөч бүрийн анхаарлаа тэдэнд зориулъя!

Тиймээ тэд энэ хорвоо ертөнцийн гэрэл гэгээ, амьдралын даль жигүүрүүд.