Дотоодын цэргийн штабаас Тулгар төрийн 2228, Их монгол улс байгуулагдсаны 813, Ардын хувьсгалын 98 жилийн ой, Үндэсний их баяр наадам, Цагдаагийн байгууллагын 98, Дотоодын цэргийн 97 жилийн ойг тохиолдуулан "Ёслол хүндэтгэлийн арга хэмжээ" зохион байгуулав. Энэхүү үйл ажиллагааны үеэр Дотоодын цэргийн анги, байгууллагуудын алба хаагчдын ёслолын жагсаал болж, шагнал авсан алба хаагчдын гэр бүл, үр хүүхдүүд оролцлоо.

Үндэсний их баяр наадам, байгууллагын тэмдэглэлт ойн баярын өмнө түүхэн уламжлал, дайчин замналтай Дотоодын цэргийн ариун эгнээнээс ажил үйлсээрээ анги, салбар, хамт олноо хошуучлан ажиллаж байгаа таван алба хаагчийг Төрийн дээд одон медалиар, таван алба хаагчийг Хууль зүй, дотоод хэргийн яамны, 11 алба хаагчийг Цагдаагийн ерөнхий газрын, 52 алба хаагчийг Дотоодын цэргийн штабын даргын шагналаар тус тус шагнаж, урамшуулсан юм.

Шагнал авсан алба хаагч нарт хандаж, Дотоодын цэргийн штабын дарга, хурандаа С.Ганбат мэндчилгээ дэвшүүлж, энэхүү үйл ажиллагаанд тус штабын Зөвлөлийн гишүүд бүрэн бүрэлдэхүүнээрээ оролцлоо.

Дотоодын цэргийн штабын дарга, хурандаа С.Ганбат:  Дотоодын цэргийн штабаас хэдхэн хоногийн өмнө энэ оныхоо эхний хагас жилийн ажлаа дүгнэн, тайлангийн хурал, сахилгын зөвлөгөөнийг цахимаар зохион байгуулж, цаашид авч хэрэгжүүлэх ажил, арга хэмжээ, анхаарах асуудлын талаар бие бүрэлдэхүүнд үүрэг, ажлын чиглэл өгсөн билээ.

Өгсөн үүрэг, ажлын чиглэлийг бүрэн хэрэгжүүлж, хуулиар хүлээлгэсэн чиг үүргүүдийг Төр, Засгаас тавиж буй шаардлагын хэмжээнд хариуцлагатай биелүүлэхийн төлөө алба хаагч бүр хичээл, зүтгэл гарган ажиллана гэдэгт итгэл төгс байна. Дотоодын цэргийн хийморьлог жагсаалд мөр зэрэгцэн жагсаж, улс эх орныхоо дотоод аюулгүй байдлыг сахин хамгаалах хариуцлагатай бөгөөд нэр хүндтэй албанд үнэнчээр зүтгэж буй алба хаагчид Та бүхэндээ Тулгар төрийн 2228, Их Монгол Улсын 813, Ардын хувьсгалын 98 жилийн ой, Үндэсний их баяр наадмын мэнд дэвшүүлж, ажилд тань амжилт, амьдралд тань сайн сайхан бүхнийг хүсье. Дотоодын цэргийн өлмий бат, мэлмий тунгалаг байх болтугай" гэж хэлсэн юм.