Монгол Улсад Мөрдөн байцаах алба үүсч байгуулагдсаны түүхт 70 жилийн ойг тохиолдуулан тус албанд ажиллаж байсан үе үеийн ахмад буурлууд, тэдний залгамж халаа болсон алба хаагчид, тэдгээрийн гэр бүлийнхэнд Цагдаагийн ерөнхий газрын даргын зөвлөлийн гишүүдийн нэрийн өмнөөс болон хувиасаа чин сэтгэлийн мэндчилгээ дэвшүүлье.
Дотоод Явдлын Яамны Сайдын 1946 оны 504 дүгээр тушаалаар Цагдан сэргийлэх байгууллагын бүтцэд ард иргэдийн өргөдөл, гомдлыг шалган барагдуулах, мөрдөн байцаалтявуулахүүрэгбүхий "Тусгай групп"-ыг байгуулснаар Монгол Улсад Мөрдөн байцаах албаны эхлэл тавигдсан түүхтэй.

Тус албаны бие бүрэлдэхүүн дотроос мөрдөн байцаагчийн амаргүй хөдөлмөрт эрдэм мэдлэг, оюун ухаан, бие сэтгэлээ харамгүй зориулсан олон арван тэргүүний ажилтнууд, ахмад зүтгэлтэн, гавьяат хуульчид төрөн гарсныг бахархан тэмдэглэж байна.

Мөрдөн байцаах алба нь байгуулагдсан цагаасаа өнөөдрийг хүртэл ард иргэдийн амар амгалан амьдрах нөхцөлийг хангаж, хуулиар хүлээсэн гэмт хэрэгтэй тэмцэх, түүнээс урьдчилан сэргийлэх үүргээ нэр төртэй биелүүлж ирсэн билээ.
Цаашид өргөсөн тангарагтаа үнэнч байж, төр, ард түмнийхээ өмнө хүлээсэн үүрэг, хариуцлагаа гүнээ ухамсарлан хүний эрх, эрх чөлөөг хүндэтгэн, хуулийг чанд сахиж, шударга ёсыг тогтоох, иргэдийнхээ хууль ёсны эрхээ бүрэн чөлөөтэй эдлэх баталгааг хангахад мэргэжлийн өндөр ур чадвар, идэвх санаачилга гарган, үр бүтээлтэй ажиллана гэдэгт итгэл төгс байна.
Монгол цагдаагийн сүлд хийморь бадарч, мэлмий тунгалаг, өлмий бат орших болтугай.

                                             ЦАГДААГИЙН ЕРӨНХИЙ ГАЗРЫН ДАРГА,
                                                  ТЭРГҮҮН КОМИССАР Р.ЧИНГИС