Байгаль орчин, уур амьсгалын өөрчлөлтийн яамны санаачилгаар байгаль хамгаалагчид, байгаль орчны улсын байцаагчид, экологийн цагдаагийн алба хаагчдын нэгдсэн зөвлөгөөн зохион байгуулагдаж байна.

Зөвлөгөөний хүрээнд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх байгаль орчны салбарын төлөөлөлтэй уулзаж, хүний эрүүл, аюулгүй орчинд амьдрах эрхийг хангах, экосистемийг хамгаалах, байгалийн баялгийг зохистой ашиглах, нөхөн сэргээх, цөлжилтөөс урьдчилан сэргийлэх, хүрээлэн буй орчны эсрэг гэмт хэрэгтэй тэмцэх чиглэлээр хэрэгжүүлж буй ажил, цаашдын зорилтын талаар санал солилцсон юм.

Мөн байгаль орчныг хамгаалах, байгаль орчны эсрэг гэмт хэрэгтэй тэмцэх үйлсэд үр бүтээлтэй ажилласан алба хаагчдад төрийн дээд болон салбарын шагнал гардууллаа. Энэ үеэр нийт 23 алба хаагч шагнагдсанаас Цэргийн гавьяаны улаан тугийн одонгоор 2, Цэргийн гавьяаны одонгоор 1, Цэргийн хүндэт медалиар 6, Байгаль орчин, уур амьсгалын өөрчлөлтийн яамны салбарын шагналаар 14 алба хаагч тус тус шагнагдсан юм.

Зөвлөгөөний үргэлжлэл болгон Экологийн цагдаагийн албанаас Нийслэлийн Гэмт хэргээс урьдчилан сэргийлэх ажлыг зохицуулах зөвлөлтэй хамтран “Экологийн асуудал хариуцсан алба хаагчдын сургалт, зөвлөгөөн”-ийг 2026 оны 06 дугаар сарын 09-ний өдөр зохион байгууллаа.

Сургалт, зөвлөгөөний хүрээнд “Хүрээлэн буй орчны эсрэг гэмт хэрэгт нотлох ажиллагаа явуулах нь”, “Хүрээлэн буй орчны эсрэг гэмт хэргийг мөрдөн шалгах, шийдвэрлэх явцад гарч буй алдаа, дутагдал, анхаарах асуудал”, “Мөрдөн шалгах ажиллагааны явцад хүний эрхийг хангах нь” зэрэг сэдвээр сургалт зохион байгуулж, оролцогчдын мэргэжлийн мэдлэг, ур чадварыг дээшлүүллээ.

Арга хэмжээ нь хүрээлэн буй орчны эсрэг гэмт хэрэг, зөрчлөөс урьдчилан сэргийлэх, илрүүлэлт, мөрдөн шалгах ажиллагааны чанар, үр нөлөөг нэмэгдүүлэх, экологийн асуудал хариуцсан алба хаагчдын хамтын ажиллагаа, мэргэжлийн ур чадварыг бэхжүүлэхэд чиглэсэн ач холбогдолтой юм.