Кибер аюулгүй байдлын зөвлөлөөс санаачлан Кибер халдлага, зөрчилтэй тэмцэх төв, Шинжлэх ухаан, технологийн их сургууль, Цагдаагийн ерөнхий газар хамтран “Цахим залилан болон кибер гэмт хэрэгтэй тэмцэх” чиглэлээр мөрдөгч нарын ур чадварыг дээшлүүлэх, сургагч багш бэлтгэх сургалтыг улсын хэмжээнд үе шаттайгаар зохион байгуулахаар төлөвлөөд байна.

Өнөөдрийн сургалтад Монгол Улсын Их Хурал, Засгийн газрын гишүүн Цахим хөгжил, инновац, харилцаа холбооны сайд Ч.Номин, Цагдаагийн ерөнхий газрын захиргааны удирдлагын газрын дарга, цагдаагийн хурандаа П.Батбаатар, ЦЕГ-ын Сургалтын бодлого, зохицуулалтын хэлтсийн дарга, цагдаагийн хурандаа Ц.Сугаржав, Сонгинохайрхан дүүргийн цагдаагийн газрын дарга, цагдаагийн хурандаа Г.Байдраг, Кибер аюулгүй байдлын зөвлөлийн Ажлын албаны дарга Ч.Золбаяр, Кибер халдлага, зөрчилтэй тэмцэх Нийтийн төвийн захирал Э.Амарсанаа, Кибер халдлагаас урьдчилан сэргийлэх газрын дарга Г.Гантуяа болон илтгэгч багш, Сонгинохайрхан дүүргийн Цагдаагийн газрын 203 алба хаагч нар оролцлоо.

Сургалтыг нээж Монгол Улсын Их Хурлын гишүүн, Цахим хөгжил, инновац, харилцаа холбооны сайд Ч.Номин цахим орчинд үйлдэгдэж буй гэмт хэргийн нөхцөл байдал, тулгамдсан асуудал болон цаашид хэрэгжүүлэх арга хэмжээний талаар мэдээлэл өглөө.

Тэрээр “Өнөөдөр цахим технологийн хөгжил, цахим үйлчилгээний хэрэглээ эрчимтэй нэмэгдэхийн зэрэгцээ цахим орчинд үйлдэгдэх гэмт хэргийн тоо, хэлбэр, аргачлал улам боловсронгуй болж, хууль сахиулах байгууллагын өмнө шинэ сорилтуудыг бий болгож байна” хэмээн онцолж “Иргэдийг цахим залилан, цахим гэмт хэргээс урьдчилан сэргийлэх, тэдний эрх, хууль ёсны ашиг сонирхлыг хамгаалахын тулд мөрдөн шалгах чиг үүрэг хэрэгжүүлдэг алба хаагчдын мэдлэг, ур чадварыг тогтмол дээшлүүлж, цахим нотлох баримттай ажиллах чадавхыг бэхжүүлэх шаардлага улам бүр нэмэгдэж байна” хэмээн тэмдэглэлээ.

Сургалтын үеэр оролцогчдод цахим гэмт хэргийн онцлог, мөрдөн шалгах арга зүй, цахим нотлох баримт цуглуулах, шинжлэх, ашиглах аргачлал болон кибер аюулгүй байдлын суурь мэдлэгийг олгох юм.

Мөн өмнөх шатны сургалтад амжилттай хамрагдсан Сонгинохайрхан дүүргийн Цагдаагийн газрын харьяа гурван хэлтсийн 11 мөрдөгчид гэрчилгээ гардуулж, цаашид өөрийн байгууллагын хэмжээнд мэдлэг, туршлагаа түгээн ажиллахыг захиж, ажлын амжилт хүслээ.