Хууль зүй, дотоод хэргийн салбарын бодлого, үйл ажиллагааг иргэд, олон нийтэд нээлттэй, ил тод хүргэх зорилгоор энэ оны 04 дүгээр сарын 27-29-ний өдрүүдэд Жанжин Д.Сүхбаатарын талбайд “Нээлттэй хаалганы өдөрлөг” зохион байгуулж байна.

“Нээлттэй хаалганы өдөрлөг”-т Хууль зүй, дотоод хэргийн яам болон харьяа агентлаг, байгууллагууд нэгдсэн байдлаар оролцож, иргэдэд төрийн үйлчилгээг нэг дороос шуурхай хүргэхийн зэрэгцээ хууль эрх зүйн зөвлөгөө өгсөн юм.

Цагдаагийн байгууллагаас иргэдэд тээврийн хэрэгсэл жолоодох эрхийн лавлагаа, жолоодох эрхийн үнэмлэх хэвлэх, сунгах, 102 аппликейшний хэрэглээ, гэмт хэрэг, зөрчлөөс хэрхэн урьдчилан сэргийлэх талаар мэдээ, мэдээлэл өгч байна.

Ийнхүү өдөрлөгийн нээлтийн үйл ажиллагаа өнөөдөр /2026.04.27/ болж, Хууль зүй, дотоод хэргийн сайд С.Амарсайхан үйл ажиллагааг нээж хэлсэн үгэндээ “Хууль зүй, дотоод хэргийн салбар нь эрх зүйн бодлого, хууль тогтоомж, хууль сахиулах, гэмт хэрэгтэй тэмцэх, урьдчилан сэргийлэх, улсын бүртгэл, хил хамгаалал зэрэг өргөн хүрээний чиг үүргийг хэрэгжүүлдэг томоохон салбар юм.

Бидний үйл ажиллагаанд ахиц гарч байгаа ч иргэдийн санал, шүүмжлэл нь ажлын чанар, хүртээмжийг сайжруулах чухал үндэс болдог тул Та бүхнийг идэвхтэй оролцож, санал бодлоо илэрхийлэхийг уриалж байна.” хэмээв.

Энэхүү үйл ажиллагааны үеэр цагдаа, дотоодын цэргийн байгууллага болон бусад байгууллагын үйл ажиллагаа, техник хэрэгслийн үзүүлэн дэлгэн танилцуулж, зөвлөгөө, мэдээллийн цэгүүд ажиллаж байна. Ингэснээр иргэд шаардлагатай мэдээллээ нэг дороос авах боломж бүрдэж байна.

Иргэд Та бүхнийг хүрэлцэн ирэхийг урьж байна.