Олон улсын таеквондогийн ууган тамирчин, хар бүс, 4 дант С.Амарсайханы нэрэмжит мастеруудын улсын аварга шалгаруулах анхдугаар тэмцээн 2026 оны 04 дүгээр сарын 25-ны өдөр Налайх дүүргийн Спорт цогцолборт амжилттай зохион байгуулагдаж өндөрлөлөө.

Уг арга хэмжээг олон улсын таеквондогийн спортыг олон нийтэд сурталчлан таниулах, 35 ба түүнээс дээш насны иргэдийг идэвхтэй хөдөлгөөн, спортоор хичээллэхэд уриалах, мастеруудын ур чадварыг түгээн дэлгэрүүлэх, залуу үед үлгэр дуурайлал үзүүлэх, мөн 2026 оны 08 дугаар сард Монгол Улсын Ерөнхий сайдын ивээл дор зохион байгуулагдах Ази тивийн аварга шалгаруулах тэмцээнд оролцох тамирчдыг сонгон шалгаруулах зорилгоор зохион байгуулсан билээ.

Тэмцээн хувийн тулаан, багийн тулаан, түль, хатуу биет хагалах төрлүүдээр явагдаж, олон улсын таеквондогийн дүрмийн дагуу хагас контакт онооны журмаар шүүн шилдгүүдийг тодрууллаа.

Тэмцээнийг 35–44, 45 ба түүнээс дээш насны ангиллаар зохион байгуулж, нийт 12 байгууллагын 100 гаруй тамирчин оролцов.

Үүнээс Цагдаа, дотоодын цэргийн байгууллагын 20 алба хаагч оролцож, бие бялдар, ур чадвар, авхаалж самбаагаараа тэргүүлж 7 алт , 6 мөнгө, 8 хүрэл медаль хүртэж багийн нийлбэр дүнгээр тэргүүн байр эзэлж аваргын цом өргөж амжилттай оролцлоо.