Монгол Улсын Ерөнхийлөгч, Зэвсэгт хүчний Ерөнхий командлагчийн ивээл дор зохион байгуулагдаж буй “Төрийн цэргийн болон хууль сахиулах байгууллагуудын залуу офицерын хөгжлийн жил”-ийн арга хэмжээний нээлт өнөөдөр /2026.04.17/ Цэргийн дуу, бүжгийн эрдмийн чуулгад боллоо.

Нээлтийн арга хэмжээнд Монгол Улсын Ерөнхийлөгчийн Тамгын газар, Батлан хамгаалах яам, төрийн цэргийн болон хууль сахиулах байгууллагуудын удирдлага, мөн төрийн цэргийн болон хууль сахиулах байгууллагуудын залуу офицерын төлөөлөл оролцов.

Арга хэмжээг нээж Батлан хамгаалахын дэд сайд, ажлын хэсгийн ахлагч Д.Баасандамба үг хэлж, Монгол Улсын Их Хурлын гишүүн, Засгийн газрын гишүүн, Батлан хамгаалахын сайд Д.Батлут оролцогчдод мэндчилгээ дэвшүүлсэн юм.

Төрийн цэргийн болон хууль сахиулах байгууллагуудад 2023 оныг “Залуу офицерын жил”, 2024 оныг “Ахлагчийн жил”, 2025 оныг “Ахлах офицерын жил” болгон зарлаж, алба хаагчдын нийгмийн баталгаа, ажиллах нөхцөлийг бодлогын түвшинд сайжруулсан.

Энэ удаагийн арга хэмжээ нь төрийн цэргийн болон хууль сахиулах байгууллагуудын залуу офицеруудын хөгжил, манлайлал, мэргэжлийн ур чадварыг дээшлүүлэхэд чиглэсэн ач холбогдолтой билээ.