Ханнс-Зайделийн сангийн Монгол дахь төлөөлөгчийн газар, Монгол Улсын Их Сургуулийн Экологийн боловсролын төв, Экологийн цагдаагийн алба хамтран “Өсвөр үеийнхэн: Байгаль орчин ба хууль” төслийн 5 дахь удаагийн нээлтийн арга хэмжээг /2026.03.11/ Монгол Улсын Их Сургуулийн Экологийн боловсролын төвийн хурлын танхимд зохион байгууллаа.

Арга хэмжээнд Ханнс-Зайделийн сангийн Монгол дахь төлөөлөгчийн газрын байгаль орчны төсөл хариуцсан мэргэжилтэн О.Оюундарь, Нийслэлийн Иргэдийн Төлөөлөгчдийн Хурлын төлөөлөгч, Нийслэлийн Засаг даргын нийгмийн бодлого хариуцсан зөвлөх Б.Сэмжидмаа, Монгол Улсын Их Сургуулийн Экологийн боловсролын төвийн эрхлэгч Р.Сүнжидмаа, Экологийн цагдаагийн албаны Урьдчилан сэргийлэх хамтын ажиллагааны хэлтсийн дарга, цагдаагийн хурандаа З.Хүрэлбагана нар оролцлоо.

Төслийн энэ удаагийн хэрэгжилтийн хүрээнд хууль бусаар ан агнах гэмт хэргээс урьдчилан сэргийлэх чиглэлээр “Амьд үлдээгээч!” өртөөг зохион байгуулж, оролцогч талууд хамтран ажиллахаар болов. Уг төсөл нь хүүхэд, залуучуудад хүрээлэн байгаа орчны эсрэг гэмт хэрэг, зөрчлийн талаарх мэдлэг, ойлголтыг нэмэгдүүлэх замаар байгаль орчноо хайрлан хамгаалах ухамсрыг төлөвшүүлэх, хууль зөрчихөөс урьдчилан сэргийлэх, экологийн тэнцвэрт байдлыг хадгалах, нийгмийн хариуцлагатай иргэнийг төлөвшүүлэхэд чухал ач холбогдолтой юм.