Цагдаагийн байгууллагаас өнгөрсөн оны 06 дугаар сард Булган аймгийн Сэлэнгэ сумын Зэд хантай бүтээлийн нурууны дархан цаазат газарт хяналт шалгалтын ажиллагааг зохион байгуулсан.

Хяналт шалгалтаар иргэн О нь ховор амьтны жагсаалтад багтсан “Хүрэн баавгай” агнасныг илрүүлэн эрүүгийн хэрэг үүсгэж, яллагдагчаар татан прокурорын байгууллагад шүүхэд шилжүүлэх саналтайгаар хүргүүлсэн. Иргэн О-г Орхон аймаг дахь сум дундын анхан шатны эрүүгийн шүүхээс гэмт буруутайд тооцож, Эрүүгийн хуулийн тусгай ангийн 24.5 дугаар зүйлийн 1 дэх хэсэгт зааснаар 5.400.000 төгрөгөөр торгох ял оногдуулсан.

Засгийн газрын 2023 оны 07 сарын 5-ны өдрийн 260 дугаар тогтоолоор баталсан амьтны экологи эдийн засгийн үнэлгээгээр Хүрэн баавгай /Ursus arctos/ нь 12 сая 450 мянган төгрөгөөр үнэлсэн ба холбогдох хуулийн дагуу экологи эдийн засгийн үнэлгээг 2 дахин нэмэгдүүлэн хохирлыг нөхөн төлүүлээд байна.