Дотоодын цэргийн байгууллагад 2025 оны хоёрдугаар ээлжээр татагдан ирсэн хугацаат цэргийн алба хаагчдын "Цэргийн тангараг өргөх ёслолын ажиллагаа"-г өнөөдөр (2025.12.01) Дотоодын цэргийн 05, 805, 810 дугаар ангийн байрлалд тус тус зохион байгууллаа.

Тангараг өргөх ёслолын арга хэмжээнд анги бүр дайчин уламжлал, алдар гавьяаны илэрхийлэл бөгөөд бие бүрэлдэхүүний эрхэмлэн дээдлэх ариун шүтээн, золбоо хийморийн бэлгэдэл болсон "Байлдааны туг"-аа хүндэтгэн заллаа.

📌Уг арга хэмжээнд Нийслэлийн цэргийн штабын дарга, хурандаа Г.Ялалт, Дотоодын цэргийн штабын дэд бөгөөд Ажиллагааны удирдлагын газрын дарга, хурандаа Ж.Мөнхсолонго болон Дотоодын цэргийн штабын даргын зөвлөлийн гишүүд, хүндэт зочид, хугацаат цэргийн алба хаагчид болон тэдний ар гэрийн төлөөлөл оролцсон.

📌Арга хэмжээний хүрээнд шинэхэн дайчид нэг сарын хугацаанд сурч, бэлтгэсэн гардан тулаан, урлагийн тоглолт, зэвсэгтэй, зэвсэггүй үзүүлэх тоглолт, цэргийн эрдэмд хэрхэн суралцаж буйгаа сонирхууллаа.

📌Арга хэмжээнд хүрэлцэн ирсэн зочид, ар гэрийн төлөөллийг хугацаат цэргийн алба хаагчидтай уулзуулж, алба хааж буй орчин нөхцөлтэй танилцуулан хугацаат цэргийн алба хаагчдын өдөр тутмын хоолны амталгааг хийлгэж, санал хүсэлтийг нь хүлээн авлаа.

🌟Цэргийн алба нь эх орон, төр, ард түмнийхээ өмнө өргөсөн андгай бөгөөд Монгол Улсаа батлан хамгаалах үүрэг, хариуцлага хүлээлгэсэн итгэл найдвар бөгөөд цэргийн албанаас өөрийгөө олж таних, алсын хараа ирээдүйгээ тодорхойлох, эх оронч үзлээр төлөвших, тэсвэр хатуужилтай болох олон эрхэм чанарыг эзэмших юм. 

🌟Дотоодын цэргийн байгууллагад хугацаат цэргийн алба хаах хугацаанд тэдэнд мэргэжил олгож, цагдаа, дотоодын цэргийн алба хаагчаар бэлтгэх, түүнчлэн нийгэмд эрэлттэй мэргэжлээс сонгон эзэмшүүлж, мэргэжилтэй боловсон хүчнийг бэлтгэх, жолоодох эрх олгох сургалтад хамруулан А,B ангиллын жолооны үнэмлэх олгуулан залуу үеийнхний ажил, амьдралын гарааг зөвөөр эхлүүлэх боломжийг олгодог.

Эх орноо хамгаалах, хуулийн дагуу цэргийн алба хаах үндсэн үүргээ биелүүлэхээр сэтгэлийн дуудлага, хүсэл эрмэлзэлдээ хөтлөгдөн Дотоодын цэргийн байгууллагад татагдан ирж, цэргийн анхан шатны бэлтгэл эзэмшүүлэх сургалтаа амжилттай дүүргэн, цэргийн тангаргаа өргөж, аав, ээжийн хүүгээс эх орны цэрэг болж байгаа дайчдадаа халуун баяр хүргэе.

МОНГОЛ УЛСЫН ДОТООДЫН ЦЭРГИЙН БАЙГУУЛЛАГЫН СҮР ХҮЧ, СҮЛД ХИЙМОРЬ ҮЕИЙН ҮЕД МАНДАН БАДРАХ БОЛТУГАЙ!