Дотоод хэргийн их сургуулийн 2024-2025 оны хичээлийн жилийн төгсөлтийн үйл ажиллагаа өнөөдөр /2025.06.21/ Их жанжин Д.Сүхбаатарын талбайд ёслол төгөлдөр боллоо.

Ийнхүү цагдаа, дотоодын цэргийн байгууллагын захиалгаар Дотоод хэргийн их сургуулийн Цагдаагийн сургуулийг 6 хөтөлбөрт 225 сонсогч суралцаж, амжилттай төгсөв.

Энэхүү ёслолын ажиллагаанд Монгол Улсын Ерөнхийлөгч, Зэвсэгт хүчний ерөнхий командлагч У.Хүрэлсүх, Монгол Улсын Их Хурлын гишүүн, Хууль зүй, дотоод хэргийн сайд Л.Мөнхбаатар, Цагдаагийн ерөнхий газрын Дэд бөгөөд Стратеги, бодлого, инновац хөгжлийн албаны дарга, цагдаагийн хурандаа О.Ганбат, Цагдаагийн ерөнхий газрын Дэд дарга, цагдаагийн хурандаа Н.Мөнхзул, Дотоодын цэргийн штабын дарга, хурандаа М.Лувсандорж болон хүндэт зочин төлөөлөгч, сонсогч, суралцагч, эцэг эхчүүд хүрэлцэн ирсэн юм.

Ийнхүү төгсөгчид улс орныхоо аюулгүй байдлыг хангах, ард иргэдийн амар тайван амьдралыг сахин хамгаалах үүрэг бүхий тусгай албанд эх орныхоо дөрвөн зүг найман зовхист томилогдон ажиллахад бэлэн боллоо.

Амьдралын хөлгүй их далайд хүсэл мөрөөдлийнхөө төлөө зүтгэхээр сэтгэл шулуудан амаргүй бөгөөд нэр төртэй албанд бие сэтгэл, залуу насаа зориулахаар шийдсэн шинэхэн алба хаагч нартаа ажлын амжилт хүсье.

Та бүхний үйлс ариун, мөр цагаан, нэр цэвэр байх болтугай!