Төрийн цэргийн болон хууль сахиулах байгууллагын сэтгэл зүйчдийн хамтын ажиллагааг сайжруулах, мэргэжлийн ур чадварыг нэмэгдүүлэх, улс орнуудын туршлага, дэлхий нийтийн чиг хандлагаас суралцах, үйл ажиллагаанд тулгамдаж буй асуудал, цаашид авч хэрэгжүүлэх арга хэмжээний талаар санал солилцох зорилгоор нэгдсэн зөвлөгөөнийг өнөөдөр /2025.05.15/ зохион байгуулж байна.

Нээлтийн арга хэмжээ Урьдчилан сэргийлэх албаны “Сүлд-Соён гэгээрүүлэх хэлтэс”-ийн байранд болж, нээлтэд Цагдаагийн ерөнхий газрын Дэд дарга, цагдаагийн хурандаа Н.Мөнхзул оролцлоо.

Зөвлөгөөнд Цагдаа, дотоодын цэргийн байгууллага, Хил хамгаалах ерөнхий газар, Онцгой байдлын ерөнхий газар, Дотоод хэргийн их сургууль, Зэвсэгт хүчний Жанжин штабын Төрийн цэргийн болон хууль сахиулах байгууллагууд 2024 онд хийж хэрэгжүүлсэн ажил, арга хэмжээгээ танилцуулж, 2025-2026 оны хамтын хөгжлийн төлөвлөгөөний төслийг нийт сэтгэл зүйчдэд танилцуулсан юм.

Төрийн цэргийн болон хууль сахиулах байгууллагуудын сэтгэл зүйчид уг нэгдсэн зөвлөгөөнөөр өөр хоорондын хийсэн судалдгаа, практик туршлагаа бие биедээ хуваалцаж, бүлгийн сургалтад хамрагдаж байна.

Энэхүү нэгдсэн зөвлөгөөнийг Цагдаагийн ерөнхий газраас анх удаа зохион байгуулж байгаагаараа онцлог байв.