Хууль зүй, Дотоодын хэргийн сайдын санаачилгаар Цагдаагийн байгууллагаас иргэнд үзүүлэх ажил үйлчилгээг түргэн шуурхай хүргэх, мөрдөгчдийн ажлын ачааллыг бууруулах, цаг хугацааг хэмнэх, иргэдийг чирэгдүүлэхгүй байх зорилгоор мэдүүлэг өгөгчийн яриаг шууд, эсхүл мэдүүлгийн үед бэхжүүлсэн дууны, дуу дүрсний бичлэгийг бичвэрт хөрвүүлэх хиймэл оюунд суурилсан "Meduuleg Al" технологийн системийг 2025 оны 01 дугаар сарын 01-ний өдрөөс үйл ажиллагаандаа нэвтрүүлээд байна.

Тус системийг нэвтрүүлснээр мэдүүлгийн тэмдэглэл үйлдэх механик ажил ачаалал дуусгавар болж, технологийн дэвшилд суурилан цаг хугацаа хэмнэсэн, хүний эрхийг хангах үр дүнтэй ажил болсон.

Байгаль цаг агаарын хүнд нөхцөл, газар орны байршлаас шалтгаалан мөрдөгчид хэргийн газрын үзлэгийг төрөл бүрийн орчинд хийхдээ тэмдэглэл үйлдэх явцад цаг хугацаа, механик ажиллагаа ихээр шаарддаг байсныг өөрчлөн, тэмдэглэлийг дүрст болон аудио хэлбэрээр бэлтгэж бичвэрт хөрвүүлж байгаа нь цаг хугацаа хэмнэсэн шинэлэг ажил болсон.

Эрүүгийн хэрэг хянан шийдвэрлэх тухай хуульд зааснаар хэргийн газрын үзлэгийн явцад бэхжүүлсэн дуу-дүрсний бичлэгийг бичвэрт хөрвүүлэн ашиглаж байгаа нь нотлох баримтын хэмжээнд адил түвшинд үнэлэгдэх юм.