Цагдаа, дотоодын цэргийн ахмадын байгууллагын удирдах ажилтны нэгдсэн зөвлөгөөнийг өнөөдөр /2025.01.09/ Цагдаагийн ерөнхий газарт зохион байгууллаа.

Зөвлөгөөнд Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболд, Тэргүүн дэд дарга, бригадын генерал Ц.Ням-Очир, Цагдаа, дотоодын цэргийн Ахмадын хорооны дарга, хошууч генерал Ч.Амарболд болон ахмадын салбар, хороо, зөвлөлийн удирдах ажилтнууд тус тус оролцов.

Зөвлөгөөнийг нээж Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболд хэлсэн үгэндээ: “Цагдаа, дотоодын цэргийн ахмадын байгууллагын удирдах ажилтны анхдугаар зөвлөгөөнд оролцож байгаа Эрхэм хүндэт ахмад ажилтнууд Та бүхний энэ өдрийн амар мэндийг эрэн мэндчилье.

Цагдаа, дотоодын цэргийн байгууллагын хөгжил дэвшил, ард иргэдийнхээ амар тайван амьдралын төлөө халуунд халж, хүйтэнд хөрж, залуу нас, мэдлэг боловсрол, оюун ухаан, хүч хөдөлмөрөө зориулан өнөөдрийн энэ ололт, амжилтын суурийг тавьсан үе үеийн ахмадууд Та бүхэнд Цагдаагийн ерөнхий газрын даргын зөвлөлийн гишүүдийн нэрийн өмнөөс болон хувиасаа гүн талархал илэрхийлье...

...Цагдаагийн төв байгууллагын үе үеийн удирдлага, нийт бие бүрэлдэхүүн ахмадын байгууллага, ахмад ажилтнуудтайгаа байнгын харилцаатай байж, ахмад, дунд, залуу үеийн уламжлалт холбоог тасралтгүй үргэлжлүүлж, ахмад ажилтнууддаа үзүүлэх дэмжлэгийг боломжит түвшинд нэмэгдүүлсээр байна.

Цагдаа, дотоодын цэргийн байгууллагаас ахмад настанд үзүүлэх дэмжлэг, үйлчилгээнд хамруулах ажлыг зохион байгуулах, ахмад настанд зориулсан бодлого, төсөл, хөтөлбөрийг үе шаттай хэрэгжүүлэх, нийгэмд идэвхтэй гишүүн байж, оролцоог сайжруулах, хөдөлмөр эрхлэх таатай боломжийг бий болгож, нэмэлт орлого олох, санхүүгийн нөөц бүрдүүлэх, амьдралын чанарыг сайжруулахад дэмжлэг үзүүлнэ...” хэмээв.

Цагдаа, дотоодын цэргийн ахмадын хороо нь 2009 оноос хойш үйл ажиллагаагаа тасралтгүй, идэвхтэй явуулж, 5800 гаруй ахмадуудыг эгнээндээ нэгтгэсэн, 54 салбар зөвлөлтэй төрийн бус байгууллага юм.

Сүлдэт жагсаалдаа залуу, халуун насаа дархалж үлдээсэн, ахмад ажилтан, настан буурлууд Та бүхэндээ эрүүл энх, аз хийморь, инээд баясал бялхаж ажлын амжилтаар дүүрэн байхыг хүсэн ерөөе.