Цагдаа, дотоодын цэргийн анги, байгууллагын 2024 оны “Сагсан бөмбөг”-ийн аварга шалгаруулах тэмцээн өнөөдөр /2024.03.01/ эхэллээ. Нээлтийн үйл ажиллагаанд ЦЕГ-ын Тэргүүн дэд дарга, бригадын генерал Ц.Ням-Очир болон удирдах албан тушаалтан, баг тамирчид, хөгжөөн дэмжигчид оролцов.

22 дахь жилдээ зохион байгуулагдаж буй тус тэмцээнд энэ жил бүсчилсэн хэлбэрээр буюу 8 бүсээс шалгарсан шилдэг 30 анги, байгууллага, эрэгтэй 24 эмэгтэй 19 нийт 43 багийн 344 тамирчин хурд хүч, авхаалж самбаагаа сорин 2 өдрийн турш өрсөлдөх юм.

Цагдаа, дотоодын цэргийн анги, байгууллагын 2024 оны аварга шалгаруулах спортын уралдаан тэмцээнийг энэ жилээс багийн спортыг хөгжүүлэх зорилгоор 6 төрлөөр зохион байгуулж байгаагаас ийнхүү “Сагсан бөмбөгийн аварга шалгаруулах тэмцээн”-ээр эхэлж байна.

Энэ үеэр цагдаа, дотоодын цэргийн байгууллагын 2023 оны спортын тэмцээний нийлбэр дүнгээр шалгарсан анги, байгууллагуудад шагналыг нь гардуулан өгөв.

Улаанбаатар цагдаагийн хүрээний анги, байгууллагын багийн нийлбэр дүнгээр “Тэргүүн байр”-т Тээврийн цагдаагийн алба, “Дэд байр”-т Дотоодын цэргийн 05 дугаар анги, “Гутгаар байр”-т Нийтийн хэв журам хамгаалах, олон нийтийн аюулгүй байдлыг хангах алба;

Нутаг дэвсгэр хариуцсан цагдаагийн байгууллагын багийн нийлбэр дүнгээр “Тэргүүн байр”-т Өвөрхангай аймгийн цагдаагийн газар, “Дэд байр”-т Дархан-Уул аймгийн цагдаагийн газар, “Гутгаар байр”-т Төв болон Сэлэнгэ аймгийн цагдаагийн газрын баг тамирчид тус тус шалгарчээ.