Зөрчлийн хэрэг бүртгэх албанаас 2023 оны ажлаа дүгнэж, үйл ажиллагааны тайлангийн хурал, шагнал гардуулах ёслолын ажиллагааг өнөөдөр /2023.12.27/ зохион байгууллаа.

Тайлангийн хуралд Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Зөрчлийн хэрэг бүртгэх албаны дарга, цагдаагийн хурандаа Э.Товуудорж болон албаны зөвлөлийн гишүүд, албад, төв, орон нутгийн цагдаагийн газар, хэлтсийн Зөрчлийн хэрэг бүртгэх тасгийн алба хаагчид 23 байршлаас цахимаар 45, танхимаар 93 нийт 138 алба хаагч хамрагдсан юм.

Хурлыг нээж, Зөрчлийн хэрэг бүртгэх албаны дарга, цагдаагийн хурандаа Э.Товуудорж хэлсэн үгэндээ “Улмаар цагдаа, дотоодын цэргийн байгууллагаас хэрэгжүүлж байгаа зөрчил шалган шийдвэрлэх ажиллагаанд тулгамдаж буй асуудалд дүн шинжилгээ хийснээр удирдлага, зохион байгуулалтыг оновчтой болгож, түүний харьяа нэгжүүдийн үйл ажиллагааг жигдрүүлэх, эрх бүхий алба хаагчдын ажлын ачааллыг тэнцвэржүүлж, ажлын шуурхай байдлыг хангах хэрэгцээ, шаардлагыг харгалзан Монгол Улсын Засгийн газрын 2023 оны 400 дугаар тогтоол, Хууль зүй, дотоод хэргийн сайдын 2023 оны А/392 дугаар тушаалаар Цагдаагийн байгууллагын зохион байгуулалтын бүтцийг шинэчлэн баталсантай холбогдуулан Зөрчлийн хэрэг бүртгэх нэгжийг “Алба” болгон өөрчилж, батлагдсан төсвийн хүрээнд тухайн албаны алба хаагчдын ажлын байр, албаны хэрэгцээнд ашиглах техник, хэрэгсэл, тоног төхөөрөмжийг шийдвэрлэх чиглэлээр зохион байгуулалтын үе шаттай арга хэмжээнүүдийг авч, хэрэгжүүлж байна." гэдгийг онцоллоо. 

Зөрчлийн хэрэг бүртгэх алба нь цагдаагийн байгууллагад бүртгэгдсэн нийт зөрчлийн 2994541 буюу 99.8 хувийг шийдвэрлэж, зөрчлийн улмаас иргэд, хуулийн этгээдэд учирсан хохирлын 93.5 хувийг нөхөн төлүүлж, амжилт бүтээлээр дүүрэн 2024 оноо угтаж байна.

Тайлангийн хуралд Монгол Улсын зүүн хязгаар Дорнод аймгийн цагдаагийн газрын нийт бие бүрэлдэхүүнээс болон баруун хязгаар Баян-Өлгий аймгийн цагдаагийн газрын Зөрчлийн хэрэг бүртгэх тасгийн хамт олноос Зөрчлийн хэрэг бүртгэх албаны нийт бие бүрэлдэхүүнд цахим мэндчилгээ дэвшүүлж оролцсон нь онцлог үйл явдал боллоо. 

Энэ үеэр ажил хөдөлмөрөөрөө бусдыгаа хошуучлан ажилласан Зөрчлийн хэрэг бүртгэх тасаг хамт олон, зөрчил шалган шийдвэрлэх эрх бүхий албан тушаалтнуудыг шагнаж урамшууллаа. Тухайлбал:

Ажил, мэргэжлийн аварга хамт олноор Дархан-Уул аймгийн Цагдаагийн газрын Зөрчлийн хэрэг бүртгэх тасаг;

Ажил, мэргэжлийн аварга алба хаагчаар:

Баянзүрх дүүргийн цагдаагийн газрын гуравдугаар хэлтсийн Зөрчлийн хэрэг бүртгэх тасгийн дарга, цагдаагийн хошууч Д.Гантулга;

Сүхбаатарын дүүргийн цагдаагийн газрын нэгдүгээр хэлтсийн Зөрчлийн хэрэг бүртгэх тасгийн ахлах байцаагч, цагдаагийн ахлах дэслэгч Э.Пүрэвбаатар;

Баянзүрх дүүргийн цагдаагийн газрын нэгдүгээр хэлтсийн Зөрчлийн хэрэг бүртгэх тасгийн байцаагч, цагдаагийн дэслэгч Б.Энх-Амгалан;

Баянхонгор аймгийн цагдаагийн газрын Зөрчлийн хэрэг бүртгэх тасгийн байцаагч, цагдаагийн ахлах дэслэгч Г.Алтанхуяг;

Орхон аймгийн цагдаагийн газрын Зөрчлийн хэрэг бүртгэх тасгийн байцаагч, цагдаагийн ахмад Э.Чамин-Эрдэнэ;

Хан-Уул дүүргийн цагдаагийн газрын Замын цагдаагийн хэлтсийн зөрчил хариуцсан байцаагч, цагдаагийн дэслэгч Б.Чойсүрэн нар шагнагдлаа.

Нийт шагнагдсан алба хаагчдадаа баяр хүргэж, амжилт хүсье!

Монголын цагдаагийн мэлмий тунгалаг, өлмий бат орших болтугай.