Цагдаагийн ерөнхий газрын Хар тамхитай тэмцэх газар 2023 оны ажлаа дүгнэж, тэргүүний алба хаагчдаа шалгарууллаа. Арга хэмжээг нээж Хар тамхитай тэмцэх газрын дарга, цагдаагийн хурандаа Г.Давааням хэлсэн үгэндээ: 

“Улиран одож буй 2023 онд бид мансууруулах эм, сэтгэцэд нөлөөт бодисын хууль бус эргэлттэй тэмцэх чиглэлээр олон талт арга хэмжээг тасралтгүй зохион байгуулж ажилласнаар мансууруулах үйлчилгээтэй олсны ургамлын тархацыг 3 аймагт бүрэн устгаж, 286 хүнд холбогдох 214 гэмт хэргийг илрүүлж, 15 нэр төрлийн 75,012 хэрэглэгч нэг удаа хэрэглэх мансууруулах эм, сэтгэцэд нөлөөт бодисыг хураан авч хууль бус хэрэглээг таслан зогсоосон бол, метамфетамины төрлийн хураагдсан мансууруулах бодис өнгөрсөн онтой харьцуулахад 7 дахин өссөн зэрэг эерэг үзүүлэлт гарсныг онцоллоо.

2022 онд мансууруулах, сэтгэцэд нөлөөт болон өвчин намдаах үйлчилгээтэй эмийг урвуулан хэрэглэсний улмаас 9 иргэний амь хохирч байсан бол энэ онд хяналт шалгалт, сургалт нөлөөллийн ажлыг үр дүнтэй зохион байгуулсанаар амь хохирсон тохиолдол бүртгэгдээгүй байна.

Шинэ ондоо бид ...

• Мансууруулах эм, сэтгэцэд нөлөөт бодистой холбоотой гэмт хэрэгтэй тэмцэх ажлыг эрчимжүүлж, бусад чиг үүргийн байгууллагуудтай хамтран мансууруулах бодис хэрэглэгч, донтогч нарыг сайн дурын болон албадан эмчилгээнд хамруулах, татгалзуулах, соён гэгээрүүлэх, ухуулга нөлөөллийн ажлыг үр дүнтэй зохион байгуулах;
• Мансууруулах эм, сэтгэцэд нөлөөт бодисын хууль бус эргэлттэй холбоотой сэжигтэй этгээд, байр, байгууламж, мансууруулах үйлчилгээтэй ургамлын тархцад тавих хяналтыг сайжруулан, нотлох баримтыг цуглуулахад хүний эрхийг дээдлэн хуульч ажиллагааг хэрэгжүүлж нуугдмал гэмт үйлдлийг таслан зогсоох, илрүүлэх ажлыг эрчимжүүлэх;
• Энэ төрлийн гэмт хэрэгтэй тэмцэх, урьдчилан сэргийлэх арга барилаа өөрчилж, дүн шинжилгээ, судалгаанд суурилсан чиг хандлагыг тодорхойлж, шинэлэг арга барилаар ажиллах;
• Алба хаагчдын эрх, хууль ёсны эрх ашгийг хамгаалах, төрийн болон албаны нууцын хадгалалт хамгаалалтад анхаарч, сэжигтэй этгээдийг дайчлан баривчлах явцад эрсдэлийг тооцон аюулгүй байдлыг хангаж, мэргэшсэн үйл ажиллагаа явуулж ажилласан олон талт төлөвлөлт, зохион байгуулалтын ажлыг хийнэ гэдэгт итгэлтэй байна.