Бүгд Найрамдах Хятад Ард Улсын Нийгмийг аюулаас хамгаалах яамны дэд сайд, цагдаагийн тэргүүн дэд комиссар Сүн Маоли, Хууль зүйн газрын орлогч дарга Ли Вэншэн, Эрүүгийн цагдаагийн газрын орлогч дарга Жэн Шаан, Олон улсын хамтын ажиллагааны газрын дэд дарга Ли Юүхөн, Тамгын газрын мэргэжилтэн Лиү Шаан, Олон Улсын хамтын ажиллагааны газрын мэргэжилтэн Сүн Юүн нар өнөөдөр /2023.10.19/ Цагдаагийн ерөнхий газарт албан айлчлал хийлээ.

Айлчлалын хүрээнд Цагдаагийн ерөнхий газрын дарга, Дотоодын цэргийн командлагч, цагдаагийн хурандаа Т.Сүхболдтой албан уулзалт хийсэн бөгөөд уулзалтад Захиргааны удирдлагын газрын дарга, цагдаагийн хурандаа Л.Нямдаваа, Эрүүгийн цагдаагийн албаны дарга, цагдаагийн хошууч Э.Сэргэлэнбаатар, Гадаад харилцаа, энхийг сахиулах ажиллагааны хэлтсийн дарга, цагдаагийн хошууч Б.Эрдэнэдалай, Эрүүгийн цагдаагийн албаны Кибер гэмт хэрэгтэй тэмцэх хэлтсийн дарга, цагдаагийн дэд хурандаа С.Тайван нар оролцов.

Энэхүү уулзалтаар манай хоёр улсын цагдаа, хууль сахиулах байгууллагын нөхөрсөг хамтын ажиллагааны хүрээнд хийж хэрэгжүүлсэн ажил, арга хэмжээний талаар ярилцаж, мөн цахим гэмт хэрэгтэй тэмцэх, ижил чиг үүрэгтэй байгууллагууд хооронд туршлага солилцох, алба хаагч нарын мэргэжлийн мэдлэг, ур чадварыг дээшлүүлэх тал дээр хамтын ажиллагааг өргөжүүлэхээр санал солилцлоо.