Нийслэлийн цагдаагийн удирдах газрын Мөрдөн шалгах газраас алба хаагчдын хүний эрхэд суурилсан харилцаа, хандлага, сахилга, ёс зүйн зөрчлөөс урьдчилан сэргийлэх ажлыг сайжруулах “Эерэг хандлага-2023” нөлөөллийн аяны хүрээнд “Хуульч ажиллагаа” арга хэмжээг өнөөдөр буюу энэ оны 10 дугаар сарын 11-ний өдөр албан ёсоор эхлүүлж байна.

Тус арга хэмжээнд Нийслэлийн цагдаагийн удирдах газрын Дэд бөгөөд Мөрдөн шалгах газрын дарга, цагдаагийн хурандаа Д.Отгонжаргал, Дотоод аюулгүй байдлын хэлтсийн дарга, цагдаагийн хурандаа Ч.Чинбат, Баянзүрх дүүргийн цагдаагийн газрын дарга, цагдаагийн хурандаа П.Очбадрах болон Мөрдөн шалгах газар, Баянзүрх дүүргийн цагдаагийн газар, хэлтсийн алба хаагчид оролцлоо.

Арга хэмжээний хүрээнд цагдаагийн байгууллагын мэдээллийн сангийн дотоод сүлжээнд “Цахим ном” цэс шинээр нэвтрүүлж, хэргийн газрын үзлэг, хэрэг мөрдөх аргачлал зэрэг гадаад, дотоодын 420 гаруй гарын авлага, аргачлал, сурах бичиг, номыг байршуулахаар төлөвлөж байна.

Энэ нь алба хаагчид цахим номын сангаас олон талт мэдээллийн эх сурвалжийг хүлээн авч улмаар мэдлэг, ур чадвараа нэмэгдүүлэх чухал ач холбогдолтой юм.

Түүнчлэн Мөрдөн шалгах газраас шинээр томилогдсон залуу алба хаагчдыг ажлын байран дээр нь мөрдөн шалгах ажиллагаанд сурган дадлагажуулах, хуульч ажиллагааг төлөвшүүлэх чиглэлээр Мөрдөн байцаах тасгийн дарга нарыг залуу мөрдөгч нартай хамт нэг өрөөнд суулгах ажлыг эхлүүлсэн нь шинэ залуу алба хаагчдад олон жил ажилласан туршлагатай алба хаагчдын туршлагыг судлах, мөрдөн шалгах ажиллагааны явцад хүний эрхийн зөрчилгүй ажиллахад сайн туршлага болох юм.

Нээлтийн арга хэмжээнд цагдаагийн хурандаа Д.Отгонжаргал: "Хүний эрх, эрх чөлөөг хангах, зөрчигдсөн эрхийг сэргээн эдлүүлэхэд мөрдөгч алдаа гаргах эрхгүй" гэж онцлон хэллээ.