Бүгд Найрамдах Солонгос Улсын Ерөнхий Прокурорын газартай хамтран хэрэгжүүлж буй “Монгол Улсын Хар тамхитай тэмцэх чадавхыг бэхжүүлэх төсөл”-ийн хүрээнд Хар тамхитай тэмцэх газраас Сэлэнгэ аймгийн Алтанбулаг хилийн боомтын Гааль, Хил хамгаалах байгууллагын 50 гаруй алба хаагчдад “Оросын холбооны улсаас хилээр нэвтэрч болзошгүй мансууруулах, сэтгэцэд нөлөөт эм, бодисыг таних, илрүүлэх” сэдэвт практик дадлага, сургалтыг хоёр өдрийн турш зохион байгууллаа.

Мөн дээрх боомтоор Оросын Холбооны Улс, Монгол Улс руу нэвтэрч буй иргэдийн ачаа тээш, тээврийн хэрэгсэлд олон улсын хилийн боомтод ашиглагдаж байгаа мансууруулах эм, сэтгэцэд нөлөөт бодисыг илрүүлэх “Target-ID”, “Sabre 5000”, “Ionscan 600”, “HBI-120” зэрэг тоног төхөөрөмж, техник хэрэгслийг ашиглан хяналт шалгалт зохион байгуулав.