Цагдаагийн ерөнхий газар, Америкийн Нэгдсэн Улсаас Монгол Улсад суугаа Элчин сайдын яамны Мансууруулах бодис, хууль сахиулах асуудал эрхэлсэн олон улсын товчоо, мөн улсын Хар тамхитай тэмцэх алба хамтран зохион байгуулж буй “Хар тамхитай тэмцэх үйл ажиллагаа, мөрдөн шалгах нь” сэдэвт сургалтын нээлтийн үйл ажиллагаа өнөөдөр /2023.09.05/ Мөрдөн байцаах албаны хурлын зааланд амжилттай зохион байгуулагдлаа.

Сургалтын нээлтийн арга хэмжээнд Цагдаагийн ерөнхий газрын Гадаад харилцаа, энхийг сахиулах ажиллагааны хэлтсийн дарга, цагдаагийн хошууч Б.Эрдэнэдалай, Хар тамхитай тэмцэх газрын дарга, цагдаагийн дэд хурандаа Г.Давааням, АНУ-аас МУ-д суугаа Элчин сайдын яамны Бүс нутгийн аюулгүй байдлын асуудал эрхэлсэн атташе Жоел Ортез, АНУ-ын Хар тамхитай тэмцэх албаны тусгай агент-сургагч багш Верак Сим, АНУ-аас МУ-д суугаа Элчин сайдын яамны Мансууруулах бодис, хууль сахиулах асуудал эрхэлсэн олон улсын товчооны хөтөлбөрийн зохицуулагч Ц.Эрдэнэхишиг нар болон бусад сургагч багш, сургалтад хамрагдаж буй алба хаагчид оролцсон юм.

Энэхүү сургалт нь энэ оны 09 дүгээр сарын 05-07-ны өдрүүдэд зохион байгуулагдах бөгөөд хар тамхи, мансууруулах бодис худалдан борлуулж олсон хууль бус хөрөнгийг тодорхойлох, үнэлэх, хянах, хураах тухай, хар тамхи, мансууруулах бодисын хууль бус наймаа эрхэлдэг гэмт бүлэглэлийн мөнгө угаах үйл ажиллагааг илрүүлэх, дүн шинжилгээ хийх, эрэн сурвалжлах арга, гэмт этгээдийн ашигладаг өвөрмөц аргыг илрүүлэх зэрэг онол-практик хослон зохион байгуулагдаж байгаагаараа онцлогтой байна.