Хууль зүй, дотоод хэргийн яам, Цагдаагийн ерөнхий  газар, Гаалийн ерөнхий газар хамтран жил бүр уламжлал болгон тэмдэглэдэг уг өдөрлөгийг энэ жил “Чингис хаан” Олон улсын нисэх онгоцны буудал, Улаанбаатар хот дахь Гаалийн газар, Дорноговь аймгийн Замын-Үүд, БНХАУ-ын Эрээн хотын боомтуудад 06 дугаар сарын 26-ны өдөр зохион байгууллаа. 

Өдөрлөгийн хүрээнд мансууруулах эм, сэтгэцэд нөлөөт бодистой холбоотой гэмт хэргээс урьдчилан сэргийлэх, бусдын дайвар ачааг авч орон нутагт болон гадаадад зорчихдоо үндэстэн дамнасан зохион байгуулалттай гэмт бүлэглэлийн хууль бус үйл ажиллагаа болох хар тамхи, мансууруулах бодисын хууль бус эргэлтэд санаатай болон санамсаргүй байдлаар холбогдож, гэмт хэргийн золиос болохоос урьдчилан сэргийлэх чиглэлээр иргэдэд мэдээлэл өгсөн юм.

Сүүлийн жилүүдэд зорчигчид бусдын дайвар ачааг тээвэрлэснээр хар тамхи, мансууруулах бодис болон агаараар тээвэрлэхийг хориглосон ачаа тээшний тээвэрлэгч болох тохиолдол бүртгэгдэж байгаа тул орон нутаг, гадаад улсад зорчихдоо бусдын дайвар ачаа тээшийг аль болох авахгүй байх, авсан тохиолдолд доторх зүйлсийг сайтар шалгаж, үзэхийг цагдаагийн байгууллагаас анхаарууллаа.

Цагдаагийн байгууллага болон энэ төрлийн гэмт хэрэгтэй тэмцэх чиг үүргийн байгууллагууд хамтран олон улсын нисэх онгоцны буудал, хил гааль дээрх хамтарсан хяналт шалгалтын ажлыг эрчимжүүлсээр байна.

Түүнчлэн иргэдэд Монгол Улсын эмийн бүртгэлд бүртгэгдээгүй мансууруулах төрлийн үйлчилгээтэй эм, тариа, сэтгэцэд нөлөөт бодисыг тусгай зөвшөөрөлгүй улсын хилээр оруулж ирэхгүй байхыг сэрэмжлүүлье!    

Хэрэв мансууруулах эм, сэтгэцэд нөлөөт бодисыг улсын хилээр нэвтрүүлсэн гэмт хэргийг үйлдсэн болох нь тогтоогдвол Монгол Улсын Эрүүгийн хуулийн Тусгай ангийн 20.7 дугаар зүйлийн 20.7 дугаар зүйлийн 3 дахь хэсэгт зааснаар 5-12 жил, мөн зүйлийн 4 дэх хэсэгт зааснаар зохион байгуулалттай гэмт бүлэг үйлдсэн бол 12-20 жил хүртэл, эсхүл бүх насаар хорих ял шийтгэлтэй байдаг.