Монгол Улсын Засгийн газраас 2023-2025 оныг “Монголд зочлох жил” болгон зарласантай холбогдуулан Нийслэлийн Иргэдийн Төлөөлөгчдийн хурал, Нийслэлийн Цагдаагийн удирдах газар, Нийслэлийн Аялал жуулчлал газар, Монголын Оюутны холбоо хамтран “Оюутан цагдаа” арга хэмжээг 9 дэх жилдээ зохион байгуулж байна.

“Оюутан цагдаа” хөтөлбөрт их, дээд 21 сургуулийн 150 оюутан, залуучууд хамрагдаж байгаа бөгөөд гадаадын иргэд жуулчид ихээр төвлөрдөг зорчдог газруудад гэмт хэрэг, зөрчлөөс урьдчилан сэргийлэх, хэрэгцээт мэдээ, мэдээлэл, дэмжлэг туслалцаа, зөвлөгөө өгөх, аялал жуулчлалын үйл ажиллагаатай холбоотой газар, үйлчилгээний цэг байршлын талаарх шаардлагатай мэдээллийг түргэн шуурхай хүргэж ажиллах зорилготой юм.

Энэхүү хөтөлбөрийн нээлтийн арга хэмжээ өнөөдөр /2023.06.23/ боллоо. Арга хэмжээний үеэр “Оюутан цагдаа” нарт ашиглагдах унадаг дугуй, цахилгаан дугуй болон хувцас хэрэгслийг гардуулан өгөв.

“Оюутан цагдаа-2023” хөтөлбөрт хамрагдаж байгаа оюутнууд 10:00-14:00, 14:00-18:00 цагийн хооронд өдөрт 2 ээлжээр эргүүлд ажиллана.