Хүүхэд, багачуудад биеийн тамир, эрүүл амьдралын хэв маяг, зан үйлийг төлөвшүүлэх замаар тусгай хэрэгцээт хүүхдийг өөртөө итгэлтэй болгож, амьдралын чанарыг дээшлүүлэх зорилгоор “Ахиллис Монгол” олон улсын байгууллагаас “Багачуудын хөгжилтэй гүйлт-2023” арга хэмжээг өнөөдөр /2023.05.21/ зохион байгууллаа.

Үндэсний цэцэрлэгт хүрээлэнд болсон энэхүү арга хэмжээнд “Ахиллис Хүүхэд” хөтөлбөрт хамрагдаж буй нийслэлийн ерөнхий боловсролын тусгай сургуулиудын сурагчид болон гүйх сонирхолтой хүүхэд, багачууд оролцов.

“Багачуудын хөгжилтэй гүйлт-2023” арга хэмжээнд нийт 680 гаруй хүүхэд, багачууд 6-7 нас, 8-10 нас, 11-13 нас, 14-15 насны дөрвөн ангилалд амжилттай оролцлоо.

Хүүхэд бүр тэгш эрхтэй бөгөөд ялгаатай байдлын эсрэг үзэл хандлагыг хүүхэд, багачуудад төлөвшүүлэх зорилгоор энэхүү арга хэмжээнд цагдаагийн байгууллага хоёр дахь жилдээ хамтран ажиллаж, 30 гаруй алба хаагчид хөтөч гүйгчээр оролцсон юм.

Энэхүү гүйлт нь “Ахиллис хүүхэд” хөтөлбөрийн хичээлийн жилийн хаалтын арга хэмжээ ба хөтөлбөрийн оролцогч хүүхдүүд, гүйх сонирхолтой хүүхдүүдтэй хамтдаа нэг гараанаас гарч, богино зайд уралдсан, амжилтаа тэмдэглэсэн баярт өдөр болж байгаагаараа онцлогтой байв.

“ᠪᠠᠭ᠎ᠠ ᠨᠤᠭᠤᠳ ᠤ᠋ᠨ ᢈᠥᢉᠵᠢᠯᠲᠡᠢ ᢉᠦᠶᠦᠯᠲᠡ ᠒᠐᠒᠓” ᠠᠷᠭ᠎ᠠ ᢈᠡᠮᠵᠢᠶ᠎ᠡ ᠪᠣᠯᠤᠯᠤᠭ᠎ᠠ 

ᢈᠡᠦᢈᠡᠳ᠂ ᠪᠠᠭᠠᠴᠤᠳ ᠲᠤ ᠪᠡᠶ᠎ᠡ ᠶ᠋ᠢᠨ ᠲᠠᠮᠢᠷ᠂ ᠡᠷᠡᢉᠦᠯ ᠠᠮᠢᠳᠤᠷᠠᠯ ᠤ᠋ᠨ ᢈᠡᠪ ᠮᠠᠶ᠋ᠢᠭ᠂ ᠵᠠᠩ ᠦᠶᠢᠯᠡ ᠶ᠋ᠢ ᠲᠥᠯᠦᠪᠰᠢᢉᠦᠯᢈᠦ ᠵᠠᠮ ᠢ᠋ᠶᠠᠷ ᠲᠤᠰᠬᠠᠢ ᢈᠡᠷᠡᢉᠴᠡᢉᠡᠲᠦ ᢈᠡᠦᢈᠡᠳ ᠢ᠋ ᠥᠪᠡᠷ ᠲᠦ ᠪᠡᠨ ᠢᠲᠡᢉᠡᠯᠲᠡᠢ ᠪᠣᠯᠭᠠᠵᠤ᠂ ᠠᠮᠢᠳᠤᠷᠠᠯ ᠤ᠋ᠨ ᠴᠢᠨᠠᠷ ᠢ᠋ ᠳᠡᢉᠡᢉᠰᠢᠯᠡᢉᠦᠯᢈᠦ ᠵᠣᠷᠢᠯᠭ᠎ᠠ ᠪᠠᠷ “ᠠᢈᠢᠯᠯᠢᠰ ᠮᠣᠩᠭᠤᠯ” ᠣᠯᠠᠨ ᠤᠯᠤᠰ ᠤ᠋ᠨ ᠪᠠᠶᠢᠭᠤᠯᠤᠯᠭ᠎ᠠ ᠠ᠋ᠴᠠ “ᠪᠠᠭ᠎ᠠ ᠨᠤᠭᠤᠳ ᠤ᠋ᠨ ᢈᠥᢉᠵᠢᠯᠲᠡᠢ ᢉᠦᠶᠦᠯᠲᠡ ᠒᠐᠒᠓” ᠠᠷᠭ᠎ᠠ ᢈᠡᠮᠵᠢᠶ᠎ᠡ ᠶ᠋ᠢ ᠥᠨᠦᠳᠦᠷ /᠒᠐᠒᠓᠂᠐᠕᠂᠒᠑/ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠯ᠎ᠠ᠃ 

ᠦᠨᠳᠦᠰᠦᠨ ᠦ᠋ ᠴᠡᠴᠡᠷᠯᠢᢉᠲᠦ ᢈᠦᠷᠢᠶᠡᠯᠡᠩ ᠳ᠋ᠦ ᠪᠣᠯᠤᠭᠰᠠᠨ ᠡᠨᠡ ᢈᠦ ᠠᠷᠭ᠎ᠠ ᢈᠡᠮᠵᠢᠶ ᠡᠨ ᠳ᠋ᠦ “ᠠᢈᠢᠯᠯᠢᠰ ᢈᠡᠦᢈᠡᠳ” ᢈᠥᠲᠦᠯᠪᠦᠷᠢ ᠳ᠋ᠦ ᠬᠠᠮᠤᠷᠤᠭᠳᠠᠵᠤ ᠪᠤᠢ ᠨᠡᠶᠢᠰᠯᠡᠯ ᠦ᠋ᠨ ᠶᠡᠷᠦᠩᢈᠡᠢ ᠪᠣᠯᠪᠠᠰᠤᠷᠠᠯ ᠤ᠋ᠨ ᠲᠤᠰᠬᠠᠢ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠤ᠋ᠨ ᠰᠤᠷᠤᠭᠴᠢᠳ ᠪᠣᠯᠤᠨ ᢉᠦᠶᠦᢈᠦ ᠰᠣᠨᠢᠷᠬᠠᠯ ᠲᠠᠢ ᢈᠡᠦᢈᠡᠳ᠂ ᠪᠠᠭᠠᠴᠤᠳ ᠣᠷᠤᠯᠴᠠᠪᠠ᠃ 

“ᠪᠠᠭ᠎ᠠ ᠨᠤᠭᠤᠳ ᠤ᠋ᠨ ᢈᠥᢉᠵᠢᠯᠲᠡᠢ ᢉᠦᠶᠦᠯᠲᠡ ᠒᠐᠒᠓” ᠠᠷᠭ᠎ᠠ ᢈᠡᠮᠵᠢᠶ ᠡᠨ ᠳ᠋ᠦ ᠨᠡᠶᠢᠲᠡ ᠖᠘᠐ ᠭᠠᠷᠤᠢ ᢈᠡᠦᢈᠡᠳ᠂ ᠪᠠᠭ᠎ᠠ ᠨᠤᠭᠤᠳ ᠖᠆ ᠗ ᠨᠠᠰᠤ᠂ ᠘᠆᠑᠐ ᠨᠠᠰᠤ᠂ ᠑᠑᠆᠑᠓ ᠨᠠᠰᠤ᠂ ᠑᠔᠆᠑᠕ ᠨᠠᠰᠤᠨ ᠤ᠋ ᠳᠥᠷᠪᠡᠨ ᠠᠩᢉᠢᠯᠠᠯ ᠳ᠋ᠤ ᠠᠮᠵᠢᠯᠲᠠ ᠲᠠᠢ ᠣᠷᠤᠯᠴᠠᠯ᠎ᠠ᠃ 

ᢈᠡᠦᢈᠡᠳ ᠪᠦᠷᠢ ᠲᠡᢉᠰᠢ ᠡᠷᢈᠡ ᠲᠡᠢ ᠪᠥᢉᠡᠳ ᠢᠯᠭᠠᠭᠠᠲᠠᠢ ᠪᠠᠶᠢᠳᠠᠯ ᠤ᠋ᠨ ᠡᠰᠡᠷᢉᠦ ᠦᠵᠡᠯ ᠬᠠᠨᠳᠤᠯᠭ᠎ᠠ ᠶ᠋ᠢ ᢈᠡᠦᢈᠡᠳ᠂ ᠪᠠᠭᠠᠴᠤᠳ ᠲᠤ ᠲᠥᠯᠦᠪᠰᠢᢉᠦᠯᢈᠦ ᠵᠣᠷᠢᠯᠭ᠎ᠠ ᠪᠠᠷ ᠡᠨᠡ ᢈᠦ ᠠᠷᠭ᠎ᠠ ᢈᠡᠮᠵᠢᠶᠡᠨ ᠳ᠋ᠦ ᠴᠠᠭᠳᠠᠭ᠎ᠠ ᠶ᠋ᠢᠨ ᠪᠠᠶᠢᠭᠤᠯᠤᠯᠭ᠎ᠠ ᠬᠣᠶᠠᠷ ᠳᠠᢈᠢ ᠵᠢᠯ ᠳ᠋ᠦ ᠪᠡᠨ ᠬᠠᠮᠲᠤᠷᠠᠨ ᠠᠵᠢᠯᠯᠠᠵᠤ᠂ ᠓᠐ ᠭᠠᠷᠤᠢ ᠠᠯᠪᠠ ᠬᠠᠭᠠᠭᠴᠢ ᠳ᠋ᠤ ᢈᠥᠲᠦᠴᠢ ᢉᠦᠶᠦᢉᠴᠢ ᠪᠡᠷ ᠣᠷᠤᠯᠴᠠᠭᠰᠠᠨ ᠶᠠᠭᠤᠮ᠎ᠠ᠃ 

ᠡᠨᠡ ᢈᠦ ᢉᠦᠶᠦᠯᠲᠡ ᠨᠢ “ᠠᢈᠢᠯᠯᠢᠰ ᢈᠡᠦᢈᠡᠳ” ᢈᠥᠲᠦᠯᠪᠦᠷᠢ ᠶ᠋ᠢᠨ ᢈᠢᠴᠢᠶᠡᠯ ᠦ᠋ᠨ ᠵᠢᠯ ᠦ᠋ᠨ ᠬᠠᠭᠠᠯᠲᠠ ᠶ᠋ᠢᠨ ᠠᠷᠭ᠎ᠠ ᢈᠡᠮᠵᠢᠶ᠎ᠡ ᠪᠠ ᢈᠥᠲᠦᠯᠪᠦᠷᠢ ᠶ᠋ᠢᠨ ᠣᠷᠤᠯᠴᠠᠭᠴᠢ ᢈᠡᠦᢈᠡᠳ ᠦ᠋ᠳ᠂ ᢉᠦᠶᠦᢈᠦ ᠰᠣᠨᠢᠷᠬᠠᠯᠲᠠᠢ ᢈᠡᠦᢈᠡᠳ ᠦ᠋ᠳ ᠲᠡᠢ ᠬᠠᠮᠲᠤ ᠳ᠋ᠤ ᠪᠠᠨ ᠨᠢᢉᠡ ᠭᠠᠷᠤᠭᠠᠨ ᠠ᠋ᠴᠠ ᠭᠠᠷᠴᠤ᠂ ᠪᠣᠭᠤᠨᠢ ᠵᠠᠢ ᠳ᠋ᠤ ᠤᠷᠤᠯᠳᠤᠭᠰᠠᠨ᠂ ᠠᠮᠵᠢᠯᠲᠠ ᠪᠠᠨ ᠲᠡᠮᠳᠡᢉᠯᠡᢉᠰᠡᠨ ᠪᠠᠶᠠᠷᠲᠤ ᠡᠳᠦᠷ ᠪᠣᠯᠵᠤ ᠪᠠᠶᠢᠭ᠎ᠠ ᠪᠠᠷ ᠢ᠋ᠶᠠᠨ ᠣᠨᠴᠠᠯᠢᠭ ᠲᠠᠢ ᠪᠠᠶᠢᠪᠠ᠃