Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

ХҮНИЙ ЭРХИЙН СУРГАГЧ БАГШИЙН ДАВТАН СУРГАЛТЫГ ЗОХИОН БАЙГУУЛЛАА

Цагдаагийн ерөнхий газрын харьяа алба, газар, нэгжийн хүний эрхийн сургагч багшаар бэлтгэгдсэн алба хаагчдад халдашгүй чөлөөтэй байх эрх, жагсаал, цуглааны үед хүний эрхийг хангах, эрүү шүүлтээс урьдчилан сэргийлэх үндэсний ажиллагаа, эрүү шүүлт тулгах, хүнлэг бус харьцаа, ялгаварлан гадуурхалтаас ангид байх зэрэг мэдлэг, ойлголтыг бататгах зорилготой “Хүний эрхийн сургагч багшийн давтан сургалт”-ыг амжилттай зохион байгууллаа.

“ЦАХИМ ОРЧИНД ҮЙЛДЭГДЭЖ БАЙГАА ЗАЛИЛАХ ГЭМТ ХЭРГИЙГ ИЛРҮҮЛЭХ, МӨРДӨН ШАЛГАХ АЖИЛЛАГАА ЯВУУЛАХАД АНХААРАХ АСУУДАЛ” СУРГАЛТ ЗОХИОН БАЙГУУЛАГДЛАА

“Цахим орчинд үйлдэгдэж байгаа залилах гэмт хэргийг илрүүлэх, мөрдөн шалгах ажиллагаа явуулахад анхаарах асуудал” сэдэвт сургалтад Эрүүгийн цагдаагийн алба, Мөрдөн байцаах албаны Кибер гэмт хэрэгтэй тэмцэх хэлтэс, дүүргүүдийн цагдаагийн газар, хэлтсийн мөрдөгч, эрүүгийн мөрдөгч зэрэг 120 гаруй алба хаагч хамрагдлаа.

ЦАГДААГИЙН АЛБАНЫ БОЛОН ДОТООДЫН ЦЭРГИЙН БАЙЛДААНЫ ТУГАНД ХҮНДЭТГЭЛ ҮЗҮҮЛЭХ, ЦАГДААГИЙН ТАНГАРАГ ДАВТАХ ЁСЛОЛЫН АЖИЛЛАГАА СЭЛЭНГЭ, ДАРХАН-УУЛ, ХӨВСГӨЛ, БУЛГАН АЙМГУУДАД АМЖИЛТТАЙ ЗОХИОН БАЙГУУЛАГДЛАА

Цагдаагийн ерөнхий газрын дарга, Дотоодын цэргийн командлагчийн тушаалаар албаны үйл ажиллагааг сурталчлах, алба хаагчдын албандаа итгэх итгэл, албаараа бахархах, урам зоригийг сэргээх, өсвөр үе, хүүхэд залуучуудад тусгаар тогтнол, үндэсний эв нэгдэл, эрх чөлөөний үнэ цэнийг ойлгуулах, түүх соёлоо хайрлан хамгаалах, эх оронч иргэнийг төлөвшүүлэх зорилгоор Цагдаа, дотоодын цэргийн алба хаагчдын бахархал, үнэт зүйл болсон Цагдаагийн албаны болон Дотоодын цэргийн байлдааны туганд хүндэтгэл үзүүлэх, цагдаагийн болон цэргийн тангараг давтах ёслолын арга хэмжээ Сэлэнгэ, Дархан-Уул, Хөвсгөл, Булган аймгуудад амжилттай зохион байгуулагдлаа.

ЦАГДАА, ДОТООДЫН ЦЭРГИЙН АЛБА ХААГЧ, АХМАД АЖИЛТНУУДЫН “ШАТАР”-ЫН ТЭМЦЭЭН БОЛЛОО

“Хүч” спорт хорооны “Шатар”-ын 10 удаагийн аварга, хүндэт чекист, цагдаагийн хурандаа Л.Дэндэвноров агсны мэндэлсний 100 жилийн ойг тохиолдуулан цагдаа, дотоодын цэргийн алба хаагчид, ахмад ажилтнуудын дунд шатрын спортыг хөгжүүлэх, ахмад, дунд, залуу үеийн залгамж холбоог бэхжүүлэх зорилгоор “Шатар”-ын тэмцээнийг зохион байгууллаа.

“ХҮҮХДЭД ЭЭЛТЭЙ ЦАГДАА” ӨДӨРЛӨГ ЗОХИОН БАЙГУУЛЛАА

Баянзүрх дүүргийн Цагдаагийн газрын II хэлтсээс “Хүүхдэд ээлтэй цагдаа” өдөрлөг зохион байгуулж, ерөнхий боловсролын 8 сургуулийн төлөөлөл “Өсвөрийн сэргийлэгч” бүлгэмийн хүүхэд багачуудад Гэмт хэрэг, зөрчлөөс урьдчилан сэргийлэх тухай хууль, Хүүхдийн эрхийн тухай хууль, Хүүхэд хамгааллын тухай хуулийг сурталчлан танилцуулж ажиллаа. Уг арга хэмжээнд цагдаагийн байгууллагын үйл ажиллагааг сурталчлан цагдаагийн албанд хэрэглэгддэг техник тусгай хэрэгсэл, албаны эрэлч нохойн үзүүлбэр, алба хаагчдын ёслолын жагсаалыг зохион байгууллаа.