Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

“ХУУЛЬЧИЙН ПРО БОНО ӨДӨР-2023” ӨДӨРЛӨГИЙН ҮЕЭР ИРГЭДЭД МЭДЭЭЛЭЛ ХҮРГЭЛЭЭ

Монголын Хуульчдын холбооноос жил бүр уламжлал болгон зохион байгуулдаг иргэдийн эрх, хууль ёсны ашиг сонирхлыг хамгаалах зорилготой хууль зүйн үнэгүй зөвлөгөө өгөх “Хуульчийн Про Боно өдөр-2023” өдөрлөг энэ оны 05-р сарын 01-ний өдөр зохион байгуулагдлаа.

Өдөрлөгт Цагдаагийн ерөнхий газрын Хуулийн хэлтэс, Урьдчилан сэргийлэх хэлтэс, Зөрчлийн хэрэг бүртгэх газар, Бүртгэл хяналтын төв, Экологийн цагдаагийн алба, Тээврийн цагдаагийн алба, Мөрдөн байцаах алба, Нийслэлийн цагдаагийн удирдах газар, Төмөр замын цагдаагийн газраас оролцож байгууллагын үйл ажиллагааны талаар иргэдэд мэдээ, мэдээлэл хүргэн хууль эрх зүйн зөвлөгөө өглөө.

МЭРГЭЖИЛ ОЛГОХ СУРГАЛТАД ХАМРАГДСАН ХУГАЦААТ ЦЭРГИЙН АЛБА ХААГЧДАД “ГЭРЧИЛГЭЭ” ГАРДУУЛЛАА

Дотоодын цэрэгт 2022 оны нэгдүгээр ээлжийн цэрэг татлагаар татагдан ирж, хугацаат цэргийн алба хаах хугацаа дууссан түрүүч, байлдагч нарыг хугацаат цэргийн албанаас бэлтгэлээр халах ёслолын арга хэмжээ боллоо.

Цагдаа, дотоодын цэргийн сургалтын нэгдсэн төвийн “Хамгаалалтын ажилтан”, “Цагдаа-жолооч” мэргэжил олгох сургалтад хамрагдаж, амжилттай төгссөн хугацаат цэргийн алба хаагчдад “Гэрчилгээ” гардууллаа.

 Мэргэжил олгох сургалтад хугацаат цэргийн 54 алба хаагч амжилттай хамрагдан төгсөж, Төрийн албаны зөвлөлийн Цагдаагийн ерөнхий газрын дэргэдэх Салбар зөвлөлийн тогтоолоор ахлагчийн албан тушаалын нөөцөд бүртгэгдлээ.

ЦАГДААГИЙН АЛБАНЫ БОЛОН ДОТООДЫН ЦЭРГИЙН БАЙЛДААНЫ ТУГАНД ХҮНДЭТГЭЛ ҮЗҮҮЛЭХ, ЦАГДААГИЙН ТАНГАРАГ ДАВТАХ ЁСЛОЛЫН АЖИЛЛАГАА ДОРНОГОВЬ, ГОВЬСҮМБЭР АЙМГУУДАД БОЛОН НАЛАЙХ, БАГАХАНГАЙ ДҮҮРГҮҮДЭД АМЖИЛТТАЙ ЗОХИОН БАЙГУУЛАГДЛАА

Цагдаагийн ерөнхий газрын дарга, Дотоодын цэргийн командлагчийн тушаалаар албаны үйл ажиллагааг сурталчлах, алба хаагчдын албандаа итгэх итгэл, албаараа бахархах, урам зоригийг сэргээх, өсвөр үе, хүүхэд залуучуудад тусгаар тогтнол, үндэсний эв нэгдэл, эрх чөлөөний үнэ цэнийг ойлгуулах, түүх соёлоо хайрлан хамгаалах, эх оронч иргэнийг төлөвшүүлэх зорилгоор Цагдаа, дотоодын цэргийн алба хаагчдын бахархал, үнэт зүйл болсон Цагдаагийн албаны болон Дотоодын цэргийн байлдааны туганд хүндэтгэл үзүүлэх, цагдаагийн болон цэргийн тангараг давтах ёслолын арга хэмжээ Дорноговь, Говьсүмбэр аймгуудад  болон Налайх, Багахангай дүүргүүдэд амжилттай зохион байгуулагдлаа.

“ПРЕСТИЖ-2023” УРАЛДААНААС ГРИН ПРИ ШАГНАЛ ХҮРТЛЭЭ

Оросын холбооны улсын Буриад улсын Улан-Удэ хотноо энэ оны 04 дүгээр сарын 27-ноос 30-ны өдрүүдэд олон улсын мэргэжлийн бүжиг дэглээчдийн “Престиж-2023” уралдаан зохион байгуулагдсан юм. Энэхүү уралдаанд Дотоодын цэргийн 805 дугаар ангийн хоёрдугаар салбарын хамгаалалтын ажилтан, дэд ахлагч Б.Ууганбилэг амжилттай оролцож, "ГРАН ПРИ" шагнал хүртлээ.Тэрээр Цагдаагийн “Сүлд” чуулгын бүжиг дэглээч, туслах найруулагч МУСТА, цагдаагийн ахлах дэслэгч Ё.Дамчаабадгарын дэглэсэн “Сарлагийн эзэн”, “Алтайн ятга” бүжгээрээ амжилттай оролцлоо.  

НУТАГ ДЭВСГЭР ХАРИУЦСАН ЦАГДААГИЙН ГАЗАР, ХЭЛТСИЙН ДАРГА НАРТАЙ ЧӨЛӨӨТ УУЛЗАЛТ ЗОХИОН БАЙГУУЛЛАА

Цагдаагийн ерөнхий газрын удирдлагуудаас нутаг дэвсгэр хариуцсан газар, хэлтсийн дарга нартай ажил хэргийн чөлөөт /зангиагүй/ уулзалтыг анх удаа зохион байгуулж, үйл ажиллагаатай нь танилцан, санал солилцлоо.

“ЗАЛУУ НАС-УРАН БҮТЭЭЛЧ АХМАДУУД” ӨДӨРЛӨГ ЗОХИОН БАЙГУУЛЛАА

Цагдаа, дотоодын цэргийн байгууллагын “Ахмад, дунд, залуу үеийн залгамж холбоо” хөтөлбөрийн хүрээнд Цагдаагийн ерөнхий газрын Мөрдөн байцаах албанаас “Залуу нас-Уран бүтээлч ахмадууд” өдөрлөгийг зохион байгууллаа.

Өдөрлөгт Мөрдөн байцаах албаны удирдлагууд болон Цагдаа, дотоодын цэргийн Ахмадын хороо, Мөрдөн байцаах албаны Ахмадын зөвлөл болон ахмад ажилтан, алба хаагчид оролцсон юм.

Энэхүү арга хэмжээнд 50 гаруй ахмад ажилтнууд оролцон өөрсдийн хийж буй гар урлал, хүнсний бүтээгдэхүүний үзэсгэлэн гаргаж, танилцуулга хийлээ.