Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

НИЙСЛЭЛИЙН ЦАГДААГИЙН УДИРДАХ ГАЗРААС НИЙСЛЭЛИЙН ПРОКУРОРЫН ГАЗАРТАЙ ХАМТРАН ГЭМТ ХЭРЭГ, ЗӨРЧЛИЙН ИЛРҮҮЛЭЛТИЙГ НЭМЭГДҮҮЛЭХЭД САНАЛ СОЛИЛЦОХ УУЛЗАЛТЫГ ЗОХИОН БАЙГУУЛЛАА

Нийслэлийн цагдаагийн удирдах газраас Нийслэлийн прокурорын газартай хамтран гэмт хэрэг, зөрчлийн илрүүлэлтийг нэмэгдүүлэх, 2023 онд хэрэгжүүлэх ажлынхаа талаар санал солилцох уулзалтыг 03 дугаар сарын 01-ний өдөр зохион байгууллаа. 

Уулзалтад ЦЕГ-ын Дэд бөгөөд Нийслэлийн цагдаагийн удирдах газрын дарга О.Ганбат, Нийслэлийн ерөнхий прокурор Ц.Ариунболд, Нийслэлийн цагдаагийн удирдах газрын Дэд бөгөөд Мөрдөн шалгах газрын дарга Д.Отгонжаргал, Нийслэлийн цагдаагийн удирдах газрын Дэд дарга Ц.Сугаржав болон 9 дүүргийн цагдаагийн газар, хэлтсийн удирдлагууд, прокурорууд цахимаар оролцлоо. 

Уулзалтын эхэнд Нийслэлийн цагдаагийн удирдах газрын Дэд бөгөөд Мөрдөн шалгах газрын дарга Д.Отгонжаргал нийслэлийн хэмжээнд өнгөрсөн 2022 онд бүртгэгдсэн гэмт хэрэг, зөрчлийн нөхцөл байдлыг танилцууллаа. Тэрбээр танилцуулгадаа “2022 онд Нийслэлийн цагдаагийн удирдах газраас нийслэлийн хэмжээнд нийт 220,663 гэмт хэрэг, зөрчлийн шинжтэй гомдол, мэдээллийг хүлээн авснаас 98,1 хувийг нь бүрэн шийдвэрлэж ажилласан байна.

“МОНГОЛ ХУРАНДААГИЙН ӨДӨР” ХҮНДЭТГЭЛИЙН АРГА ХЭМЖЭЭ ЗОХИОН БАЙГУУЛАГДЛАА

Монгол Улсад Хурандаа цол олгож эхэлсний 87 жилийн ой  2023 оны 03-р сарын 02-ны өдөр тохиож хүндэтгэлийн арга хэмжээг Онцгой байдлын ерөнхий газар, Монгол хурандаа нийгэмлэгтэй хамтран зохион байгууллаа.

Монгол улсын тусгаар тогтнол, нутаг дэвсгэрийн бүрэн бүтэн байдал, аюулгүй байдлын төлөө зүтгэж ирсэн төрийн цэргийн “Хурандаа” цолтнуудын гавьяаг алдаршуулах зорилгоор 2016 онд Батлан хамгаалахын сайдын тушаалаар “Хурандаа нарын өдөр” болгон тэмдэглэх шийдвэр гаргаснаас хойш 7 дахь жилдээ тэмдэглэж байна.

Хурандаа цолыг анх Улсын Бага хурлын тэргүүлэгчид, Сайд нарын зөвлөлийн хамтарсан тогтоолоор 1936 оны 03 дугаар сарын 02-ны өдөр олгож эхэлсэн түүхтэй юм.

Анхлан Зэвсэгт хүчин, Хил хамгаалах байгууллагын алба хаагчдад хурандаа цолыг олгож байсан бол 1950 онд Цагдаагийн байгууллага, 1964 онд Шүүхийн шийдвэр гүйцэтгэх байгууллага, 1971 Онцгой байдлын байгууллагаас хурандаа цолтон төрөн гарч байжээ.

“ХИМИЙН УГТВАР БОДИСЫН ЭРГЭЛТИЙН ӨНӨӨГИЙН НӨХЦӨЛ БАЙДАЛ, АНХААРАХ АСУУДАЛ” СЭДЭВТ ХЭЛЭЛЦҮҮЛЭГ ЗОХИОН БАЙГУУЛЛАА

ЦЕГ-ын Хар тамхитай тэмцэх газраас Химийн угтвар бодис, мансууруулах эм, сэтгэцэд нөлөөт бодисын хор уршгийн талаар болон энэ төрлийн гэмт хэрэг, зөрчлийн шалтгаан нөхцөлийг судлах, урьдчилан сэргийлэх зорилгоор “Химийн угтвар бодисын эргэлтийн өнөөгийн нөхцөл байдал, анхаарах асуудал” сэдэвт хэлэлцүүлгийг өнөөдөр /2023.03.03/ зохион байгууллаа.

Хэлэлцүүлэгт төрийн болон төрийн бус 59 байгууллагын 92 ажилтан, алба хаагчид оролцож “Монгол Улсын мансууруулах эм, сэтгэцэд нөлөөт бодисын нөхцөл байдал, чиг хандлага”, “Монгол Улсын химийн хорт болон аюултай бодисын өнөөгийн нөхцөл байдал, хууль эрх зүйн зохицуулалт, тулгамдсан асуудал”, “Химийн хорт болон аюултай бодисын бодлого, зохицуулалт, тоо баримт”, “Химийн хорт болон аюултай бодисын импортын тоо мэдээ, ангилал, импортлоход гардаг нийтлэг зөрчил”, “Химийн хорт болон аюултай бодисын эргэлтэд тавих хяналт, анхаарах асуудал”, “Химийн хорт болон аюултай бодис, мансууруулах эм, сэтгэцэд нөлөөт бодисын хоорондын хамаарал, тулгамдсан асуудал” зэрэг сэдвийн хүрээнд хэлэлцэж, санал солилцлоо.

“АВТО МАШИНЫ НҮҮРСЭН ЯНДАНГААС ЯЛГАРЧ БУЙ БОХИРДОЛ, ОРЧНЫ АЮУЛГҮЙ БАЙДАЛ” СЭДЭВТ ХЭЛЭЛЦҮҮЛЭГ ЗОХИОН БАЙГУУЛЛАА

Өнөөдөр /2023.03.03/ Нийслэлийн цагдаагийн удирдах газрын Мөрдөн шалгах газраас “Авто машины нүүрсэн яндангаас ялгарч буй бохирдол, орчны аюулгүй байдал” сэдэвт хэлэлцүүлгийг зохион байгууллаа.

Мөрдөн шалгах газраас он гарсаар автомашины нүүрсэн яндан хулгайлах гэмт хэрэг үйлддэг дөрвөн бүлэг, 13 этгээдийг баривчлан шалгаж, энэ төрлийн 45 гэмт хэргийг үйлдсэн болохыг тогтоожээ.

Хэлэлцүүлгийн үеэр Нийслэлийн цагдаагийн удирдах газрын Дэд бөгөөд Мөрдөн шалгах газрын дарга Д.Отгонжаргал хэлэхдээ "Сүүлийн 3 жилийн байдлаар Монгол Улсын хилээр 39517 кг нүүрсэн яндангаас гардаг бодисыг гарсан. Тухайлбал нэг автомашинд дунджаар 500-700 гр бодис байдаг гэвэл хэчнээн олон автомашины нүүрсэн яндангийн бодис хилээр гарсан бэ гэдэг нь харагдана. Нөгөө талаас иргэд өөрсдөө авто машины нүүрсэн яндангийн бодисыг мөнгө олох зорилгоор худалдах тохиолдол ч их байна. Нүүрсэн яндангүй нэг автомашинаас дунджаар 200-20 тонны химийн хорт бодис ялгардаг судалгаа гарсан. Гэтэл нүүрсэн яндангүй, оношилгооны газраас зөрчилтэй илэрсэн 2500 гаруй тээврийн хэрэгсэл хотын хөдөлгөөнд оролцож, агаарын бохирдолд тодорхой хэмжээний хохирол учруулж байна.

Тиймээс Нийслэлийн цагдаагийн удирдах газраас авто машины нүүрсэн яндангаас ялгарч буй бохирдол, орчны аюулгүй байдлын талаар мэргэжлийн байгууллагуудтай хамтран хэлэлцүүлэг явуулж байна. Хэлэлцүүлгийн үр дүнд агаарын бохирдолд нөлөөлж байгаа автомашины катализатор буюу яндангийн шүүлтүүрийг хилээр гаргахгүй байх саналыг мэргэжлийн байгууллагад уламжлахаар ажиллаж байна" гэлээ.

ЦАГДААГИЙН ЕРӨНХИЙ ГАЗРЫН ТӨВ БАЙРНЫ ХАРЬЯА НЭГЖИЙН “ВОЛЕЙБОЛ”-ЫН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛАГДАЖ БАЙНА

Дотоод хяналт-Аюулгүй байдлын газрын 30 жилийн ойн хүрээнд тус газраас Цагдаагийн ерөнхий газрын төв байрны харьяа нэгжийн алба хаагчдын дунд эерэг орчин бүрдүүлэх, сэтгэлгээ, хандлагыг өөрчлөх, идэвхжүүлэх, чөлөөт цагийг зөв боловсон өнгөрүүлэх, волейболын спортыг хөгжүүлэх, эрүүл мэнд бие бялдрыг чийрэгжүүлэх зорилгоор “Волейбол”-ын аварга шалгаруулах тэмцээн зохион байгуулж байна.

Тэмцээн өнөөдөр /2023.03.03/ “Хүч” спорт хорооны зааланд зохион байгуулагдаж байгаа юм.

Энэхүү тэмцээнд Цагдаагийн ерөнхий газрын төв байрны харьяа нэгжийн 14 багийн 120 гаруй тамирчин хурд хүч, авхаалж самбаагаа сорин оролцож байна. Тэмцээнд оролцож буй нийт баг, тамирчдадаа амжилт хүсье!