Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

ҮНДЭСНИЙ БИЧГИЙН САЙХАН БИЧИГТЭН-2023 УРАЛДААН ЗОХИОН БАЙГУУЛЛАА

Тээврийн цагдаагийн албанаас “Үндэсний бичгийн сайхан бичигтэн-2023” уралдааныг зохион байгууллаа. Энэхүү уралдаанд тус албаны харьяа нэгжүүдээс 33 бичвэр ирүүлснийг бичгийн хэв, зөв бичгийн дүрэм, тиг, зурлага зэргийг харьцуулан монгол хэл бичгийн багш, заах арга зүйч Э.Ганганбайгаль шүүж, цэвэр сайхан бичигтнийг тодрууллаа.

Тэмцээний Тэргүүн байранд Замын цагдаагийн газрын Замын хөдөлгөөний удирдлагын хэлтсийн Цахим зөрчил, хөдөлгөөнт эргүүлийн тасгийн зохицуулагч, цагдаагийн ахмад С.Сэр-Од, Дэд байранд мөн тасгийн цагдаа зохицуулагч, цагдаагийн дэд ахлагч Ч.Буяннэмэх, Гутгаар байранд мөн газрын Хамгаалалтын хэлтсийн чиглэлийн ахлах зохицуулагч, цагдаагийн хошууч Б.Дэнзэнноргой нар шалгаран өргөмжлөл, мөнгөн шагналаар шагнагдлаа. Тэмцээнд амжилттай оролцсон алба хаагчдадаа цаашдынх нь ажилд амжилт хүсье.

ЦАГДААГИЙН БАЙГУУЛЛАГААС “ЦАХИМ НОМ”-ЫГ ОЛНЫ ХҮРТЭЭЛ БОЛГОЖ БАЙНА

Мэдээлэл, дүн шинжилгээ, шуурхай удирдлагын албанаас цагдаагийн байгууллагын хэмжээнд бүртгэгдсэн гэмт хэрэг, зөрчлийн нөхцөл байдлыг статистик мэдээнд тулгуурлан бэлтгэж, цуврал байдлаар жил бүр гаргадаг билээ.

Энэ жил цагдаагийн байгууллагын хэмжээнд бүртгэгдсэн гэмт хэрэг, зөрчлийн нөхцөл байдлыг сүүлийн 5 жилийн байдлаар бэлтгэн, албан ёсны цахим сайт https://police.gov.mn/-д байршуулж, хэрэглэгчдэд нээлттэй нэвтрэх боломжийг бүрдүүлэн цахим ном хэлбэрээр олны хүртээл болголоо.

ЦАГДААГИЙН БАЙГУУЛЛАГАД ОЛОН УЛСЫН ЧАНАРЫН НЭГДСЭН МЕНЕЖМЕНТИЙН ТОГТОЛЦОО НЭВТРҮҮЛЭХ ЗӨВЛӨХ ҮЙЛЧИЛГЭЭНИЙ ГЭРЭЭ БАЙГУУЛЛАА

Цагдаагийн байгууллагын үйл ажиллагаанд Чанарын удирдлагын тогтолцоо /ISO-9001:2015/, Мэдээллийн аюулгүй байдлын /ISO 27001:2015/ олон улсын стандартыг тус тус нэвтрүүлэх, зөвлөх үйлчилгээ үзүүлэх гэрээг байгууллаа.

Гэрээг Цагдаагийн ерөнхий газрын Дэд дарга, цагдаагийн хурандаа П.Оростогоо, “Менежмент ба ур чадварын хүрээлэн” ТББ-ын захирал Т.Мөнгөнбөгж нар байгуулав.

Цагдаагийн байгууллага нь дээрх олон улсын стандартуудыг үйл ажиллагаандаа нэвтрүүлснээр:

Байгууллагын ил тод байдал, эрх мэдэл, чиг үүрэг, хариуцлагын тогтолцоо сайжирч, үргүй зардал буурна. Ажлын үр дүнтэй арга барил нэвтэрч цаг хугацаа, төсөв хөрөнгө, боломжит нөөцийг хэмнэж, бүтээмж нэмэгдэнэ.

Алба хаагч, ажилтны хувьд өөрийн ур чадвар, мэдлэгийг хөгжүүлэх боломж нэмэгдэнэ. Мөн иргэдийн хүсэж буй чанарт нийцсэн бүтээгдэхүүн үйлчилгээг цагдаагийн байгууллагаас түргэн шуурхай, бодитой хүргэж, мэдээлэл алдагдах, устах, халдлагад өртөх эрсдэлээс хамгаалагдах зэрэг ач холбогдолтой юм.

“ТӨРИЙН ЦЭРГИЙН БОЛОН ЦАГДААГИЙН БАЙГУУЛЛАГЫН ЭМЭГТЭЙЧҮҮД ЭНХИЙН ҮЙЛСЭД” СЭДЭВТ ЭРДЭМ ШИНЖИЛГЭЭНИЙ ХУРАЛ БОЛЛОО

“Төрийн цэргийн байгууллагын болон цагдаагийн эмэгтэй алба хаагчдын оролцоог энхийг дэмжих ажиллагаа, аюулгүй байдлын салбарт нэмэгдүүлэх боломж" сэдэвт Монгол Улсын Үндэсний аюулгүй байдлын Зөвлөлийн Ажлын албаны захиалгат төслийн хүрээнд хийгдэж байгаа “Төрийн цэргийн болон Цагдаагийн байгууллагын эмэгтэйчүүд энхийн үйлсэд” сэдэвт эрдэм шинжилгээний хурал Үндэсний батлан хамгаалахын их сургуулийн байранд зохион байгуулагдлаа.

Энэхүү эрдэм шинжилгээний хуралд цагдаа, дотоодын цэргийн байгууллагыг төлөөлөн Гадаад харилцаа, энхийг сахиулах ажиллагааны хэлтсийн дарга, цагдаагийн хошууч Б.Эрдэнэдалай, ахлах мэргэжилтэн, цагдаагийн хурандаа П.Даваажав, Дотоодын цэргийн штабын ахлах офицер, хошууч Ц.Дугаржав нар “Цагдаагийн эмэгтэй алба хаагчид энхийн үйлсэд”, “Дотоодын цэргийн эмэгтэй алба хаагчид энхийн үйлсэд” сэдвээр тус тус илтгэл тавив.

МУАТАЙ БОКСЫН 2023 ОНЫ УЛСЫН АВАРГА ШАЛГАРУУЛАХ ТЭМЦЭЭНД ЦАГДААГИЙН АХЛАГЧ А.НАМУУНГЭРЭЛ ТЭРГҮҮН БАЙР ЭЗЭЛЛЭЭ

WMO /World Muaythai organization/ буюу Дэлхийн Муайтайн байгууллагын Монгол Улс дахь салбар холбооноос зохион байгуулсан Муатай боксын 2023 оны улсын аварга шалгаруулах тэмцээн Баянзүрх дүүргийн 14 дүгээр сургуулийн спорт зааланд 2023 оны 02 дугаар сарын 11,12-ны өдрүүдэд зохион байгуулагдлаа.

Тус тэмцээнд Цагдаагийн ерөнхий газрын Тусгай ажиллагааны газрын цагдаа, цагдаагийн ахлагч А.Намуунгэрэл 75 кг-ийн жинд амжилттай оролцож, тэргүүн байр эзэлж алтан медалийн эзэн боллоо. Алба хаагчдаа баяр хүргэж, спортын өндөр амжилт хүсэн ерөөе.