“Үзэсгэлэн болгогч” хэмээх туулай жилийн сар шинийн баярыг угтан өдгөө 100 насыг зооглож буй ахмад ажилтан, цагдаагийн хошууч Б.Рагчаад цагдаагийн байгууллагаас хүндэтгэл үзүүлж, сар шинийн мэндчилгээ дэвшүүлэн тавгийн идээ гардууллаа.  

Тэрээр улс орныхоо хувь заяаг мөрөн дээрээ өргөж, 1945 оны чөлөөлөх дайны ялалтад өөрийн мятаршгүй зориг, цуцашгүй зүтгэлээр үнэлж баршгүй хувь нэмрээ оруулан, энх цагийг авчирсан эрхэм дайчин билээ. Б.Рагчаа нь Улаанбаатар хотын дээд шүүхийн харьяа Хууль цаазын дунд сургуульд суралцаж төгсөөд, цагдаагийн байгууллагад ажиллах хүсэлт гаргаж 1960 онд Амгалангийн цагдаагийн 6 дугаар ангид ахлагч цолтой, паспортын байцаагчаар ажлын гараагаа эхэлж байсан юм.

Цагдаагийн байгууллагад ажиллаж байх хугацаандаа түүний хөдөлмөрийг төр засгаас өндрөөр үнэлж “Онц сэргийлэгч”, “Цэргийн гавьяаны улаан тугийн одон”, “Байлдааны гавьяаны улаан тугийн одон”, “Алтан гадас одон”, “Бид ялав”, “Жуковын медаль”, “Эх орны 2 дугаар дайнд ялсны 70, 75 жилийн ойн медаль”, “Халх голын 30, 80 жилийн ойн медаль”, “Чөлөөлөх дайны 65, 70 жилийн ойн медаль”, “Улсыг аюулаас хамгаалах байгууллагын 50 жил”, “Цагдаагийн байгууллагын 50 жил”, “Монгол цагдаа 80, 90 жилийн медаль”, “Тусгаар тогтнолын одон”, “Ахмад зүтгэлтэн тэмдэг”, “Ардын хувьсгалын 50, 60, 70, 80, 90 жилийн он медаль”-иар тус тус шагнагдсан.

Дайны үед эх орон газар шороогоо хамгаалахад залуу халуун насаа зориулж, энх цагт төр түвшин, түмэн олныхоо төлөө үнэнчээр зүтгэсэн ахмад буурал Б.Рагчаа танд эрүүл энх, аз жаргал, сайн сайхан бүхнийг хүсэн ерөөе.