Энэ долоо хоногт Цагдаа, дотоодын цэргийн байгууллагаас иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.

“АНЗААР” АРГА ХЭМЖЭЭГ 21 АЙМАГТ ЗОХИОН БАЙГУУЛНА

Монгол Улсын хэмжээнд сүүлийн 5 жилийн хугацаанд мансууруулах эм, сэтгэцэд нөлөөт бодистой холбоотой 1064 гэмт хэрэг, 1300 яллагдагч цагдаагийн байгууллагад бүртгэгдсэн байна. Насны байдлаар авч үзвэл 53.9 хувийг 18-25 насны хүн, 32.7 хувийг 26-35 насны өсвөр үе, хүүхэд залуучууд эзэлж байгаа нь энэ төрлийн гэмт хэрэгт холбогдогчдын насны байдал залуужиж байна.

Иймд цагдаагийн байгууллагаас энэ төрлийн гэмт хэргээс урьдчилан сэргийлэх, хүүхэд залуучуудыг хорт зуршлаас ангид байлгах зорилгоор 2022 онд “Анзаар” арга хэмжээг Нийслэл хотын хэмжээнд зохион байгууллаа. Арга хэмжээний хүрээнд 852 удаагийн сургалт, мэдээллийн ажлыг танхимаар зохион байгуулж 45 мянга гаруй хүнийг хамруулснаар хүүхэд холбогдсон гэмт хэрэг 42 хувиар буурч, мансууруулах бодис, ахуйн хэрэглээний зүйл зориулалтын бусаар хэрэглэж мансуурдаг 72 хүүхдийг олж тогтоон сэтгэл зүйн зөвлөгөө өгч, мэргэжлийн байгууллагуудад холбон зуучилсан.

Энэ онд Гэр бүл, хүүхэд залуучуудын хөгжлийн газар, Боловсролын ерөнхий газартай хамтран “Анзаар” арга хэмжээг улсын хэмжээнд зохион байгуулахаар ажиллаж байна.

“ХҮҮХДЭД ЭЭЛТЭЙ ӨРӨӨ”-НИЙ НЭЭЛТ БОЛЛОО

Америкийн нэгдсэн улс, Монгол Улсын хооронд байгуулсан “Хүүхэд хамгааллын түншлэлийн компакт гэрээ”-ний дагуу Цагдаагийн ерөнхий газрын Мөрдөн байцаах албаны байранд тохижуулсан “Хүүхдэд ээлтэй өрөө”-ний нээлт 2023 оны 02-р сарын 07-ны өдөр боллоо.

Дээрх гэрээний хүрээнд 2022 онд шаардлагатай тоног төхөөрөмж, тавилга хэрэгслээр тоноглогдсон өрөөг тохижуулан Нийслэлийн цагдаагийн удирдах газрын Мөрдөн шалгах газар, Хан-Уул дүүргийн цагдаагийн хоёрдугаар хэлтэс, Сонгинохайрхан дүүргийн цагдаагийн нэгдүгээр хэлтэст хүлээлгэн өгч байсан юм. Ийнхүү цагдаагийн байгууллага 5 дахь “Хүүхдэд ээлтэй өрөө”-г хүлээн аваад байна.

Тус өрөө нь гэмт хэргийн гэрч, хохирогч болсон хүүхэдтэй ярилцлага хийх, мэдүүлэг авах үед хүүхэд таагүй үйл явдлыг эргэн санах шаардлагатай болж дахин цочролд орох эрсдэлтэй байдаг тул үүнээс сэргийлэх, хүүхдийн сэтгэл санааг амар амгалан, аюулгүй тайван байлгаж хүүхэд шаардлагатай тусламж үйлчилгээг цаг алдалгүй үзүүлэх нөхцөлийг бүрдүүлж байгаа юм.

БАЯНЗҮРХ ДҮҮРГИЙН 23, 28 ДУГААР ХОРООДОД “НОГООН БҮС” ТӨСЛИЙГ ХЭРЭГЖҮҮЛЖ БАЙНА

Иргэдийн аюулгүй, ая тухтай амьдрах орчныг бүрдүүлэх, гэмт хэрэг зөрчлөөс урьдчилан сэргийлэх, гэмт хэргийн гаралтыг бууруулах зорилгоор Баянзүрх дүүргийн цагдаагийн газрын гуравдугаар хэлтсийн хариуцсан 23, 28 дугаар хороог ногоон бүс болгож камержуулах зорилгоор Баянзүрх дүүргийн “Хөрөнгө оруулалт, бүтээн байгуулалт төв”-ийн санхүүжилтээр 35 цэгт 86 ширхэг теле хяналтын камерыг суурилууллаа.

Тус хороодын нутаг дэвсгэрийг “Ногоон бүс” болгосноор цагдаагийн байгууллагын 102 тусгай дугаарын утсанд иргэд, байгууллагаас энэ оны 01-р сард 1588 дуудлага мэдээлэл ирүүлсэн нь өмнөх оны мөн үетэй харьцуулахад 270 нэгж буюу 14,5 хувиар буурсан эерэг үзүүлэлттэй байна.

Цаашид теле хяналтын камерын цагдаа 3 ээлжээр 24 цаг үүрэг гүйцэтгэж, камерын тусламжтайгаар тус хороодыг бүрэн хяналтад авч, гэмт хэрэг, зөрчлийг илрүүлэх, урьдчилан сэргийлэх боломжтой юм.

ИРГЭДИЙН ЗАМЫН ХӨДӨЛГӨӨНИЙ АЮУЛГҮЙ БАЙДЛЫН ТАЛААРХ МЭДЛЭГИЙГ ДЭЭШЛҮҮЛЭХ ЧИГЛЭЛЭЭР СУРГАЛТ ЗОХИОН БАЙГУУЛЛАА

Тээврийн цагдаагийн албанаас “Бүх нийтийн эрх зүйн боловсролыг дээшлүүлэх үндэсний хөтөлбөр”-ийн хүрээнд “Таванбогд” ХХК, “Силк Рөүд трейдинг” ХХК, “Эрдэнэдрийлинг” ХХК, “НҮБ-ын UN Mongolia” олон улсын байгууллагын 283 ажилтан, инженер техникийн ажилтнуудад “Замын хөдөлгөөний дүрэм ба аюулгүй жолоодлого” сэдвийн хүрээнд сургалтууд зохион байгуулж, тэднийг замын хөдөлгөөнд дүрмийн дагуу оролцохыг зөвлөж ажиллалаа.

“ОХИДЫГ ХҮЧИРХИЙЛЭЛ, МӨЛЖЛӨГӨӨС ХАМГААЛАХ НЬ” ТӨСӨЛ ҮРГЭЛЖИЛЖ БАЙНА

Цагдаагийн байгууллагын мэдээллийн санд улсын хэмжээнд 2022 онд гэр бүлийн хүчирхийллийн улмаас үйлдэгдсэн гэмт хэрэг 1729 бүртгэгдсэнээс нийслэлд 51 хувь буюу 882 гэмт хэрэг бүртгэгдсэн. Энэ төрлийн гэмт хэрэгт 1664 иргэн хохирсон, хохирогч иргэдийн 86.4 хувь нь эмэгтэй, 12.9 хувийг хүүхэд эзэлж байна.

Нийслэлийн цагдаагийн удирдах газар, Хүүхдийг Ивээх Сан хамтран хүүхдийн эсрэг бэлгийн хүчирхийллийн гэмт хэрэгтэй тэмцэх, урьдчилан сэргийлэх, бэлгийн хүчирхийллийн хохирогч хүүхэдтэй хэрхэн харилцаж, хүүхэд хамгааллын хариу үйлчилгээнд хамруулах, хүүхдийн эрхийг хангах зорилгоор 2022 оны 11 дүгээр сарын 01-ний өдрөөс эхлэн “Охидыг хүчирхийлэл, мөлжлөгөөс хамгаалах нь” төслийг хамтран хэрэгжүүлж байгаа юм.