АЛТАНГЭРЭЛИЙН АМАРСАЙХАН

/1983-2023 он/

Цагдаагийн ахмад А.Амарсайхан нь 2023 оны 02 дугаар сарын 07-ны өдөр албан үүргээ гүйцэтгэж яваад алтан амиа алдаж, бид бүхэнд нөхөж баршгүй хүнд гарз тохиолоо.

Тэрээр 1983 оны 04 дүгээр сарын 20-ны өдөр Улаанбаатар хотод төрсөн. 1991-2001 онд Нийслэлийн ерөнхий боловсролын 14 дүгээр бүрэн дунд сургуулийг, 2003-2007 онд Цагдаагийн академийг Эрх зүйч мэргэжлээр тус тус төгссөн.

Ажил хөдөлмөрийн гараагаа 2001-2002 онд Баянзүрх дүүргийн цагдаагийн хэлтэст эргүүлийн цагдаа, 2002-2005 онд Цагдаагийн академид сонсогч, 2007-2009 онд Замын цагдаагийн газрын Баянзүрх дүүрэг дэх Замын цагдаагийн тасагт цагдаа зохицуулагч, 2009-2011 онд Өвөрхангай аймгийн цагдаагийн газрын Замын цагдаагийн тасагт байцаагч, 2011-2012 онд Замын цагдаагийн газрын Чингэлтэй дүүрэг дэх Замын цагдаагийн тасагт байцаагч, 2012-2021 онд Замын цагдаагийн газрын Нийслэлийн хөдөлгөөний хяналтын хэлтсийн Баянзүрх дүүрэг дэх Замын цагдаагийн тасагт байцаагч, хөдөлгөөний аюулгүй байдал хариуцсан зохицуулагч, 2021 оноос Баянзүрх дүүргийн цагдаагийн газрын Замын цагдаагийн хэлтэст зохицуулагчаар тус тус томилогдон ажилласан.

Гэмт хэрэгтэй тэмцэх, Нийтийн хэв журам хамгаалах, Замын хөдөлгөөний аюулгүй байдлыг хангах үндсэн чиг үүргээ нэр төртэй биелүүлснийг өндрөөр үнэлж Цагдаагийн ерөнхий газрын “Хүндэт жуух” бичиг, “Албаны төлөө-II, III”, “Цагдаагийн гавьяа” тэмдэг болон бусад салбарын шагнал, ойн тэмдгээр шагнаж урамшуулжээ.

Түүний зарчимч, шударга, хөдөлмөрч, тууштай, үлгэрлэн манлайлагч, эгэл даруу хүнлэг энэрэнгүй, хүний төлөө тусч сайхан зан чанарууд байгууллага, хамт олон, мөр зэрэгцэн ажиллаж байсан журмын нөхөд бидний сэтгэл зүрхэнд үүрд дурсагдан үлдэх болно.

Гэр бүл, хань, үр хүүхэд, төрөл төрөгсөд, анд нөхдөд нь гүн эмгэнэл илэрхийлье.

Мөрдөс нэгт нөхдийнхөө ариун жагсаалд нэр тань мөнх байж, тангаргийн хуудсанд үзэглэсэн гарын үсэг тань тодоос тод байх болно.

Ум сайн амгалан болтугай!

ЦАГДААГИЙН ЕРӨНХИЙ ГАЗАР