Энэ долоо хоногт цагдаа, дотоодын цэргийн байгууллагаас зохион байгуулсан ОНЦЛОХ үйл явдлыг тоймлон хүргэж байна

ИХ ЖАНЖИН Д.СҮХБААТАРЫН МЭНДЭЛСНИЙ 130 ЖИЛИЙН ОЙ ТОХИОЛОО

Их Жанжин Д.Сүхбаатарын мэндэлсний 130 жилийн ойг тохиолдуулан энэ сарын 01-02-ны өдрүүдэд Одонт хороо ахмадын зөвлөлөөс МУ-ын Ардын жүжигчин Г.Равдан, Монгол цэргийн музейн Мэргэжлийн албаны дарга, эрдэм шинжилгээний ажилтан А.Ганганчимэг, бэлтгэл хурандаа У.Бат-Эрдэнэ, Г.Мөнхдөл, Т.Ганболд, бэлтгэл дэд хурандаа Г.Ганзориг нар ангийн төвийн нийт бие бүрэлдэхүүн, хугацаат цэргийн алба хаагчдад Жанжин Д.Сүхбаатарын гавьяа, үйл хэрэг, анги байгууллагынхаа дайчин баатарлаг уламжлал, түүхээ сурталчлан таниулах, цэрэг эх оронч үзэл санааг түгээн дэлгэрүүлэх, “Ахмад, дунд, залуу үеийн залгамж холбоо”-г бэхжүүлэх, “Ахмад үеийн захиас”-ийг хүргэх, иргэн цэргийн харилцааг бэхжүүлэх яриа таниулга, зөвлөгөөнийг зохион байгууллаа.

Мөн энэ үеэр ерөнхий боловсролын 106, 122 дугаар дунд сургуулийн ахлах ангийн сурагчдад Жанжин Д.Сүхбаатарын гавьяа, үйл хэрэг, амьдрал, Дотоодын цэргийн үйл ажиллагааг сурталчилж, “Мэргэжил сонголт”-ын хүрээнд сурагчдад мэдээлэл өглөө.

БУЛГАН АЙМГИЙН ЦАГДААГИЙН ГАЗАР “НОГООН БҮС” ТӨСЛИЙН ХҮРЭЭНД 34 ШИРХЭГ КАМЕРЫГ ШИНЭЭР АШИГЛАЛТАД ОРУУЛЛАА

Булган аймгийн цагдаагийн газраас гэмт хэрэг, зөрчлөөс урьдчилан сэргийлэх, иргэдийн аюулгүй байдлыг хангах зорилгоор “Ногоон бүс” төслийг хэрэгжүүлэн Булган аймгийн Иргэдийн төлөөлөгчдийн хурлаар 2021, 2022 онд нийт 100 сая төгрөгийг шийдвэрлүүлэн 33 цэгт хяналтын камерыг нэмж суурилуулсан юм. Ингэснээр нийт 86 ширхэг теле хяналтын камер бүрэн ашиглалтад оруулсан бөгөөд “Ногоон бүс” төслийг хэрэгжүүлснээр бүс нутгийн хэмжээнд үйлдэгдэж буй гэмт хэрэг, зөрчлөөс урьдчилан сэргийлэх, илрүүлэлтийг нэмэгдүүлэхэд чухал ач холбогдолтой юм.

САМБО БӨХИЙН НАСАНД ХҮРЭГЧДИЙН УЛСЫН АВАРГА ШАЛГАРУУЛАХ ТЭМЦЭЭНД ЦАГДААГИЙН АХМАД Н.МӨНХ-ЭРДЭНЭ ТҮРҮҮЛЖ УЛСЫН АВАРГА БОЛЛОО

Булган аймагт Самбо бөхийн насанд хүрэгчдийн улсын аварга шалгаруулах тэмцээн зохион байгуулагдлаа. Энэ удаагийн тэмцээнийг 1990 оны самбо бөхийн залуучуудын дэлхийн аварга, Дэлхийн цомын хошой мөнгөн медальт, Монгол Улсын 3 удаагийн аварга ОУХМ, улсын начин Ж.Оргилболдын нэрэмжит болгон зохион байгуулсан юм. Тус аймагт 33 жилийн дараа зохион байгуулж байгаа Самбо бөхийн насанд хүрэгчдийн Улсын аварга шалгаруулах тэмцээний "Байлдааны самбо"-ын төрөлд -88кг-ын жинд Нийслэлийн цагдаагийн удирдах газрын Мөрдөн шалгах газрын Халаасны хулгайн гэмт хэрэгтэй тэмцэх хэлтсийн эрүүгийн мөрдөгч, цагдаагийн ахмад Н.Мөнх-эрдэнэ улсын аварга болж алтан медаль хүртлээ.

Цагдаагийн ахмад Н.Мөнх-эрдэнэ нь 2015 онд -74кг, 2018 онд -82кг, энэ жил -88кг-ын жинд тус тус түрүүлж улсын аварга болсноор гурван өөр жинд 3 удаа түрүүлсэн амжилтаар "Шилдэг тамирчин"-аар шалгарлаа.

ХУУЛИЙН БАЙГУУЛЛАГУУДЫН ДУНД 6 ТӨРӨЛТ ТЭМЦЭЭНИЙГ ЗОХИОН БАЙГУУЛЛАА

Дундговь аймгийн цагдаагийн газраас хуулийн байгууллагуудын дунд 6 төрөлт (волейбол, сагсан бөмбөг, хийн буудлага, олс таталт, ширээний теннис, дартс) тэмцээнийг амжилттай зохион байгууллаа. Тэмцээнд Аймгийн Засаг даргын Тамгын газар, Цагдаагийн газар, Прокурорын газар, Шүүх, Тагнуулын хэлтэс, Шүүхийн шийдвэр гүйцэтгэх газар, Төрийн аудит, Шүүхийн шинжилгээний хэлтэс, Өмгөөлөл, Татварын хэлтэс, Нийгмийн даатгал, Улсын бүртгэлийн хэлтэс, Авто тээвэр зэрэг 13 байгууллагын 130 гаруй тамирчид хурд хүч, авхаалж самбаагаа сорин өрсөлдсөнөөс багийн нийлбэр дүнгээр:

Нэгдүгээр байранд Цагдаагийн газрын баг Шилжин явах цом,

Хоёрдугаар байранд Шүүхийн баг тамирчид,

Гуравдугаар байранд Тагнуулын хэлтэс, Шүүхийн шинжилгээний хэлтэс, Татварын хэлтсийн баг тамирчид тус тус шалгарлаа.

БУЛГАН АЙМГИЙН БҮРЭГХАНГАЙ СУМЫН СУМ ДУНДЫН ЦАГДААГИЙН ТАСГИЙН БАЙРЫГ БҮРЭН ЗАСВАРЛАЖ, ШИНЭЧИЛЛЭЭ

Булган аймгийн Бүрэгхангай сум нь Хишиг-Өндөр, Дашинчилэн, Орхон, Төв аймгийн Заамар зэрэг сумтай хил залгадаг онцлог ихтэй жишиг сум юм.

Тус аймгийн орон нутгийн удирдлагаас алба хаагчдын ажиллах орчин нөхцөлийг сайжруулах зорилгоор Бүрэгхангай сумын сум дундын цагдаагийн тасгийн ажлын байрыг бүрэн засварлаж, шинэчилсэн байна. Мөн ажлын байрыг шинэчилж, засварлахаас гадна зөөврийн хяналтын постыг бүрэн тохижуулж, нисдэг дроныг албаны үйл ажиллагаанд ашиглаж эхэлжээ.

Ийнхүү алба хаагчдын ажлын байр, хууль ёсны эрх ашиг, амьдрах орчныг сайжруулсан томоохон үр дүнтэй ажил болсон байна.