Дотоодын цэргийн штабаас энэ онд анги, тусгай салбаруудад зохион байгуулах сургалт бэлтгэлийн хөтөлбөр, төлөвлөгөөний хэрэгжилтийг хангуулах, сургалтыг алба хаагчдад жигд хүртээмжтэй хүргэх зорилгоор "Сургагч багш" бэлтгэх сургалтыг зохион байгууллаа.

Энэхүү сургалтаар “Дотоодын цэргийн алба-ажиллагаа”, “Цэргийн хэргийн онолын үндэс”, “Цэргийн биеийн тамир”, “Албаны тусгай бэлтгэл” гэсэн 4 чиглэлээр 137 цагийн танхимын болон дадлага хэлбэрээр явуулж, төв, орон нутгийн анги, тусгай салбарын нийт 34 алба хаагчийг хамруулж, гэрчилгээ гардуулсан юм.

Гэрчилгээ гардуулах  арга хэмжээнд Дотоодын цэргийн штабын дарга, бригадын генерал Р.Чингис болон штабын хэлтсийн дарга нар оролцлоо. 

Тус сургалтаар бэлтгэгдсэн сургагч багш нар нь тухайн анги, тусгай салбарын бие бүрэлдэхүүний албаны болон цэргийн хэргийн мэдлэг, ур чадвар, бие бялдар, сэтгэл зүйн бэлтгэлжилтийг дээшлүүлэх, хувь хүнийг хөгжүүлэх, сургаж төлөвшүүлэх, орчин үеийн дэвшилтэд техник, технологи, арга хэлбэрийг ашиглах арга зүйд сургахын зэрэгцээ тэдний ажлын хариуцлага, биеэ авч явах байдал, бусадтай харилцах харилцаа, хандлага, сахилга, ёс зүйг дээшлүүлэхэд дэмжлэг үзүүлж ажиллах юм.