Хууль зүй, дотоод хэргийн сайдаас өгсөн үүрэг, чиглэлийн дагуу боловсруулсан “Зөрчлийн бүртгэл, мэдээллийн цахим сан”-г 2023 оны 01 дүгээр сарын 01-ний өдрөөс  шинээр ашиглах болсонтой холбогдуулан Цагдаагийн ерөнхий газрын Зөрчлийн хэрэг бүртгэх газар нь “Ай Ти Зон” ХХК-тай хамтран “Зөрчлийн бүртгэл мэдээллийн цахим сан”-г ашиглах сургагч багш бэлтгэх сургалтыг  2022 оны 12 дугаар сарын 28, 30-ны өдрүүдэд Дотоод хэргийн их сургууль дээр зохион байгууллаа.

Сургалтад Тээврийн цагдаагийн алба, Экологийн цагдаагийн алба , Зөрчлийн хэрэг бүртгэх газар, Мэдээлэл, дүн шинжилгээ шуурхай удирдлагын албаны статистикийн хэлтэс болон дүүргийн цагдаагийн газар, хэлтсийн 82 алба хаагчид танхимаар, нутаг дэвсгэр хариуцсан цагдаагийн байгууллагаас 746 алба хаагчид цахим хэлбэрээр хамрагдсан юм.

Сургалтад Хууль зүй, дотоод хэргийн яамны Төрийн захиргааны удирдлагын газрын дарга П.Хадбаатар, “Ай Ти Зон” ХХК-ийн Программ хангамжийн газрын дэд захирал Т.Төгөлдөр болон эрх бүхий албан тушаалтан, алба хаагчид оролцов.

Хөтөлбөрийн дагуу Цагдаагийн байгууллагын удирдах болон зөрчил шалган шийдвэрлэх, дүн шинжилгээ хийх эрх бүхий албан тушаалтнуудаас цахим санд нэвтрэн зөрчил шалган шийдвэрлэх ажиллагаа явуулсан мэдээллүүдийг газар дээр нь туршин ашиглах байдлаар дадлага ажил хийлгэн, гарч буй хүндрэл бэрхшээлийг хэрхэн шийдвэрлэх талаар сургагч багшаас зөвлөгөө авч, санал солилцлоо.

“Зөрчлийн бүртгэл мэдээллийн цахим сан”-г ашиглах, сургагч багш бэлтгэх сургалт хөтөлбөрийн дагуу цагдаагийн байгууллагын алба хаагчдад үр дүнтэй зохион байгуулагдсан бөгөөд “Ай Ти Зон” ХХК-аас дүрстэй хэлбэрээр гарын авлага гаргаж, хэрэглэгч байгууллагуудад хүргүүлэх юм.