Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

“БҮГД НАЙРАМДАХ МОНГОЛ УЛС ТУНХАГЛАСАН”-Ы 98 ЖИЛИЙН ОЙГ ТОХИОЛДУУЛАН АЛБА ХААГЧДАД ЦОЛ, ШАГНАЛ ГАРДУУЛЛАА

“Бүгд Найрамдах Монгол Улс тунхагласан”-ы 98 жилийн ойг тохиолдуулан өргөсөн тангарагтаа үнэнч байж, хуулиар хүлээсэн үүргээ нэр төртэй биелүүлэн ажиллаж байгаа цагдаа, дотоодын цэргийн байгууллагын бие бүрэлдэхүүний хөдөлмөр зүтгэлийг өндрөөр үнэлж алба хаагчдад шагнал, цол гардуулах арга хэмжээ өнөөдөр /2021.11.25/ Цагдаагийн ерөнхий газрын Хүндэтгэлийн танхимд зохион байгуулагдлаа.

Энэхүү тэмдэглэлт баярын өдрийг тохиолдуулан Монгол Улсын Ерөнхийлөгчийн зарлигаар Төрийн дээд одон медалиар 21, Хууль зүй, дотоод хэргийн салбарын шагналаар 119, Цагдаагийн ерөнхий газрын шагналаар 384, нийт 524 алба хаагч шагнагдлаа.

Мөн хугацааны цагдаагийн эрхэм дээд хурандаа цолоор 8, гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах ажилд онцгой амжилт гаргасан 1 алба хаагчийг хугацааны өмнө цагдаагийн хурандаа, ахлагч бүрэлдхүүнээс 175 алба хаагч офицер бүрэлдэхүүнд шинээр орж, цагдаагийн дэслэгч, дотоодын цэргийн штабаас 44 алба хаагч цол шагнагдан, мөрдсөө гардан авлаа. Шагнагдсан алба хаагчдадаа баяр хүргэж, ажлын амжилт хүсье.

Түүхэн цаг хугацааны эргэлтэд зорьсон үйлс, зүтгэсэн зүтгэл тань үргэлжид мандан бадрах болтугай!

“НАНДИН БҮХНЭЭ ХАМГААЛЪЯ” АЯНЫГ УЛСЫН ХЭМЖЭЭНД ЭХЛҮҮЛЛЭЭ

Жендэрт суурилсан хүчирхийллийн асуудлыг анхаарах, эмэгтэй, эрэгтэй хүмүүсийг бие биедээ ижил тэгш, хүндлэлтэй хандахыг уриалах зорилгоор “НАНДИН БҮХНЭЭ ХАМГААЛЪЯ” аяныг “ӨӨРИЙГӨӨ, ГЭР БҮЛЭЭ, ОРЧИН ТОЙРНОО” уриан дор улсын хэмжээнд эхлүүллээ. Аяны нээлт өнөөдөр /2022.11.25/ Төрийн ордонд зохион байгуулагдаж, нээлтэд Хууль зүй, дотоод хэргийн сайд Б.Солонгоо, Нэгдсэн Үндэстний байгууллагын Монгол Улс дахь Суурин зохицуулагч Тапан Мишра, Улсын их хурлын гишүүн, Улсын их хурал дахь Жендэрт суурилсан хүчирхийлэлтэй тэмцэх лобби бүлгийн гишүүн М.Оюунчимэг, Швейцарын хөгжлийн агентлагийн дарга Стефани Бурри, Хүчирхийллийн эсрэг үндэсний төвийн захирал Н.Арвинтариа нар оролцож, мэдээлэл солилцов. Жендэрт суурилсан хүчирхийллийн эсрэг 16 хоногийн аяныг жил бүрийн 11 дүгээр сарын 25-наас 12 дугаар сарын 10-ны хооронд зохион байгуулдаг юм.

ТУСГАЙ ДУГААРЫН УТСАНД ИРСЭН ДУУДЛАГЫН ДҮРСИЙГ ХАРАХ БОЛОМЖТОЙ БОЛЛОО

ЦЕГ-ын Мэдээлэл, дүн шинжилгээ, шуурхай удирдлагын албаны Мэдээлэл, шуурхай удирдлагын төв нь 102, 103, 101/105 тусгай дугаарын утсаар гэмт хэрэг, зөрчил, гал түймэр, гамшиг осол, эмнэлгийн түргэн тусламжийн дуудлага, мэдээлэл хүлээн авахдаа видео дүрсээр дуудлага хүлээн авах технологийг өөрсдийн дотоод нөөц бололцоонд тулгуурлан боловсруулж, энэ оны 10 дугаар сарын 01-ний өдрөөс эхлэн үйл ажиллагаандаа ашиглаж эхэллээ.

Энэхүү технологийн онцлог нь мэдээлэл хүлээн авагч алба хаагч шаардлагатай тохиолдолд дуудлага өгч буй иргэний зөвшөөрөлтэйгөөр тухайн иргэний гар утасны камерын дүрсийг нээн харж, харилцах боломжтой болсон юм. Ингэснээр тухайн нөхцөл байдалтай шууд танилцах, зөвлөгөө өгөх, болж буй үйл явдалд бодит үнэлэлт, дүгнэлт өгөх, үйл явдлыг баримтжуулах зэрэг олон давуу талтай.

Сонирхуулахад: Гэмт хэрэг, зөрчлийн нөхцөл байдлыг ухаалаг утасны тусламжтайгаар хянах аргачлалыг дэлхийн зарим улс орны цагдаагийн байгууллагууд ашигладаг байна.

ХОРТ ЗУРШЛААС САЙН ДУРААРАА ТАТГАЛЗАХ “ИТГЭЛ” ТӨСЛИЙН ХОЁРДУГААР ЭЭЛЖ ТӨГСӨЛТӨӨ ХИЙЛЭЭ

Монгол Улсын Ерөнхийлөгчийн санаачилсан Эрүүл Монгол хүн үндэсний хөдөлгөөнийг дэмжиж сайн дураараа хорт зуршлаас татгалзах “Итгэл” төслийг НГХУСАЗСЗ, НЦУГ, Аддиктологийн төвөөс  хамтран зохион байгуулж байгаа билээ.Итгэл төслийн хувьд зорилтот бүлгийн иргэдийг сайн дурын үндсэн дээр нь хорт зуршлаас салгах, нийгэмд идэвхтэй иргэн болж ажил хөдөлмөр эрхлэх боломжийг нь бүрдүүлэх, гэр бүлийн хүчирхийллээс урьдчилан сэргийлэх, соён гэгээрүүлэхэд чиглэж байгаагаараа онцлог юм.

Итгэл төслийн хүрээнд өнөөдөр буюу 11 дүгээр сарын 21-ний өдөр хоёрдугаар ээлжид хамрагдсан оролцогчид төгсөлтийн арга хэмжээгээ хийж, үр дүнгээ танилцууллаа.

Уг төсөлд Баянгол, Сонгинохайрхан, Чингэлтэй дүүргийн 44 иргэн сайн дураараа хамрагдсан бөгөөд нийгмийн хариуцлагын хүрээнд Цагаан өргөө сувиллын газар хамтран ажиллаж, олон улсын арга зүйд суурилсан 28 хоногийн тусгай хөтөлбөрөөр сургалт, эмчилгээ үйлчилгээ амжилттай үзүүлжээ. Тухайлбал, эм болон сэтгэл заслын хосолсон хөтөлбөр боловсруулж, хордлого тайлах эмчилгээ хийж, бясалгал, иог, дуун эмчилгээ болон гэр бүлийн уулзалт, зөвлөгөөг зохион байгуулан ажилласан байна.

“НОГООН ГЭРЭЛ-ЦАГААН ШУГАМ” ТЭМЦЭЭНИЙГ ЗОХИОН БАЙГУУЛАГДЛАА

Цагдаагийн байгууллагаас хүүхдийг зам тээврийн осол, хэргээс урьдчилан сэргийлэх, замын хөдөлгөөнд оролцох зөв дадал сургах, аюулгүй байдлаа хангах талаар хууль, эрх зүйн мэдлэг олгох, тэдний эцэг, эх асран хамгаалагч нарын үүрэг хариуцлагыг сайжруулах, сургуулийн багш, нийгмийн ажилтнуудын оролцоог нэмэгдүүлэх зорилгоор “Ногоон гэрэл- Цагаан шугам 2022” тэмцээнийг зохион байгууллаа.

Тэмцээнд 3-5 дугаар ангийн сурагчид оролцож, гэрийн даалгавар, мэндчилгээ, багийн ахлагчийн тэмцээн, буухиа, урлагийн тоглолт гэсэн төрлүүдээр өрсөлддөг юм.

Тэмцээнд оролцсон нийт сурагчид, тэднийг бэлтгэсэн сургуулийн захиргаа болон багш нарт талархал илэрхийлж, ажлын өндөр амжилт хүсэн ерөөе.