Монгол Улсын Ерөнхийлөгчийн тамгын газраас өсвөр үе, хүүхэд залуучуудад тусгаар тогтнол, үндэсний өв нэгдэл, эрх чөлөө, эрх чөлөөний үнэ цэнийг ойлгуулах, эх орон, Монгол хүн болж төрснөөрөө бахархах, эх байгаль, түүх соёлоо хайрлан хамгаалах, эх оронч иргэнийг төлөвшүүлэх зорилгоор “Бидний бахархал” төслийг энэ оны 11 дүгээр сарын 08-ны өдрөөс 12 дугаар сарын 08-ны хооронд зохион байгуулж байгаа билээ.

Төслийн хүрээнд цагдаагийн байгууллагаас энэ оны 11 дүгээр сарын 21-ний өдөр Сүхбаатар дүүргийн Ерөнхий боловсролын 35 дугаар сургууль, 11 дүгээр сарын 23-ны өдөр 31 дүгээр сургуульд “Бидний бахархал” арга хэмжээг тус тус зохион байгуулсан юм.

Энэхүү арга хэмжээнд Цагдаагийн ерөнхий газрын Дэд дарга, цагдаагийн хурандаа П.Оростогоо, ахмад ажилтан, цагдаагийн хурандаа Н.Бумнанжид, Сүхбаатар дүүргийн боловсролын хэлтсийн дарга Д.Адъяасүрэн нар оролцлоо.

“Бидний бахархал” төслийн хүрээнд Ерөнхий боловсролын 31, 35 дугаар сургуулийн сурагчидтай Монгол Улсын Ерөнхийлөгчийн зөвлөх, дэслэгч генерал Ц.Тогоо, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, бригадын генерал Р.Отгонжаргал нар “Эх орон, өв соёл, уламжлал, зан заншил, ахуй амьдрал” сэдвийн хүрээнд ярилцав.

Мөн энэ үеэр Тусгай ажиллагааны газрын үйл ажиллагааг танилцуулж, Цагдаа, дотоодын цэргийн Сургалтын нэгдсэн төвөөс албаны нохойн тоглолт үзүүлж, “Сүлд” чуулгын уран бүтээлчид ая дууны мэндчилгээ өргөлөө.