Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРААС САНААЧЛАН ХЭРЭГЖҮҮЛЖ БУЙ “БИДНИЙ БАХАРХАЛ” ТӨСЛИЙН НЭЭЛТ БОЛЛОО

Монгол Улсын Ерөнхийлөгчийн тамгын газраас өсвөр үе, хүүхэд залуучуудад тусгаар тогтнол, үндэсний өв нэгдэл, эрх чөлөө, эрх чөлөөний үнэ цэнийг ойлгуулах, эх орон, Монгол хүн болж төрснөөрөө бахархах, эх байгаль, түүх соёлоо хайрлан хамгаалах, эх оронч иргэнийг төлөвшүүлэх зорилгоор “Бидний бахархал” төслийг энэ оны 11 дүгээр сарын 08-ны өдрөөс 12 дугаар сарын 08-ны өдрүүдэд зохион байгуулж байна.

Төслийн нээлтийн үйл ажиллагаа энэ оны 11 дүгээр сарын 16-ны өдөр Сүхбаатар дүүргийн “Эрдмийн хөтөч” 58 дугаар цогцолбор сургууль, 11 дүгээр сарын 17-ны өдөр Монгол 3 дугаар сургуульд зохион байгуулагдаж, нээлтэд Цагдаа, дотоодын цэргийн ахмадын хорооны дарга, хошууч генерал Ч.Амарболд, ахмад ажилтан, бригадын генерал Т.Хүрэлбаатар, Соён гэгээрүүлэх, албаны сургалтын хэлтсийн дарга, цагдаагийн хурандаа В.Отгонбаяр, Сүхбаатар дүүрэг дэх цагдаагийн газрын дарга, цагдаагийн хурандаа Г.Чинбат нар оролцлоо.

Мөн энэ үеэр Тусгай ажиллагааны газрын үйл ажиллагааг танилцуулж, Цагдаа, дотоодын цэргийн Сургалтын нэгдсэн төвөөс албаны нохойн тоглолт үзүүлж, “Сүлд” чуулгын уран бүтээлчид ая дууны мэндчилгээ өргөсөн юм.

“СҮЛД” ЧУУЛГА “ШИЛДЭГ БҮТЭЭЛ, ШИЛДЭГ УРАН БҮТЭЭЛЧ-2022” УРАЛДААНД АМЖИЛТТАЙ ОРОЛЦОЖ, ГУРАВДУГААР БАЙРТ ШАЛГАРЛАА

Монгол Улсын Соёлын яам, Монголын урлагийн ажилтны холбооноос жил тутам зохион байгуулдаг, төв, орон нутгийн ардын дуу бүжгийн чуулгуудын “Шилдэг бүтээл, уран бүтээлч-2022” уралдаан энэ оны 11 дүгээр сарын 11-ны өдрөөс 16-ны хооронд зохион байгуулагдлаа.

Цагдаагийн ерөнхий газрын “Сүлд чуулга” “Шилдэг гоцлол бүжигчин”, “Шилдэг цөөхүүл дуучид” төрөлд тэргүүн байр, “Шилдэг цөөхүүл бүжигчин”,  “Шилдэг бүжиг дэглээч” төрөлд дэд байр, “Шилдэг цөөхүүл хөгжимчид” төрөлд гутгаар байр тус тус эзэлж, нийлбэр дүнгээр “Гуравдугаар байр”-т шалгарлаа. Уралдаанд амжилттай оролцсон нийт уран бүтээлч, алба хаагч нартаа баяр хүргэж, цаашдын ажилд нь амжилт хүсье!

АНУ-ЫН ТӨРИЙН ДЕПАРТМЕНТЫН ДЭРГЭДЭХ, АЗИ НОМХОН ДАЛАЙН БҮС ХАРИУЦСАН АЖИЛТАН МЭТЬЮ КИЛЛИАНЫГ ХҮЛЭЭН АВЧ УУЛЗЛАА

Америкийн Нэгдсэн Улсын Төрийн департаментын дэргэдэх Хар тамхи, олон улсын хууль сахиулах товчооны Ази Номхон далайн бүс хариуцсан ажилтан Мэтью Киллиантай танилцах уулзалтыг /2022.11.15/ Цагдаагийн ерөнхий газарт зохион байгууллаа.

Энэхүү уулзалтад Цагдаагийн ерөнхий газрын Дэд дарга, цагдаагийн хурандаа П.Оростогоо, Гадаад харилцаа, энхийг сахиулах ажиллагааны хэлтсийн дарга, цагдаагийн хошууч Ц.Эрдэнэхишиг, АНУ-аас Монгол Улсад суугаа элчин сайдын яамны Бүс нутгийн аюулгүй байдал эрхэлсэн атташе Жоэл Ортез нар оролцсон юм.

Уулзалтаар шинэ төрлийн гэмт хэрэг болон цахим залилан, мөнгө угаах, хар тамхитай тэмцэх, зэрлэг ан амьтныг хууль бусаар хил давуулан худалдаалах зэрэг үндэстэн дамнасан, зохион байгуулалттай гэмт хэрэгтэй тэмцэх, түүнээс урьдчилан сэргийлэх чиглэлээр алба хаагчдыг чадавхжуулан сургах, ижил төстэй үйл ажиллагаа явуулдаг хууль сахиулах байгууллагын сайн туршлагаас суралцах чиглэлээр хамтран ажиллах талаар санал, солилцов.

ЗАЛИЛАХ ГЭМТ ХЭРГЭЭС УРЬДЧИЛАН СЭРГИЙЛЭХ ЗОРИЛГООР “UNSEND” АЯНЫГ ЭХЛҮҮЛЛЭЭ

Цагдаагийн байгууллагад энэ оны эхний 10 сарын байдлаар 10.300 залилах гэмт хэрэг бүртгэгдсэн нь энэ онд бүртгэгдсэн нийт гэмт хэргийн 32,8 хувийг эзэлж байна. Бүртгэгдсэн залилах гэмт хэргийн 88,2 хувь буюу 8056 гэмт хэрэг нь цахим орчин ашиглан үйлдэгджээ.

Цахим хэрэгсэл ашиглан үйлдсэн залилах гэмт хэргээс урьдчилан сэргийлэх, иргэдийн мэдлэг, мэдээллийг дээшлүүлэх, залилах гэмт хэрэгтэй тэмцэхэд төр, хувийн хэвшлийн байгууллагуудын хамтын ажиллагааг сайжруулах зорилгоор “UNSEND” аяныг эхлүүллээ.

“UNSEND” аяныг Цахим хөгжлийн яам, Монгол банк, Монголын банкны холбоодтой хамтран энэ оны 11 дүгээр сарын 14-ний өдрөөс 29-ний өдрийн хооронд “Бүү шилжүүлээрэй” уриа дор хамтран эхлүүлж байна.

“ЦАГДАА-МИНИЙ НҮДЭЭР” УРАЛДААНЫГ ЗОХИОН БАЙГУУЛЛАА

Цагдаа, дотоодын цэргийн байгууллагын соёл, эрүүл мэнд, сэтгэлзүйг төлөвшүүлэх хөтөлбөр төлөвлөгөө, “Ахмад, дунд, залуу үе” хөтөлбөр, Цагдаагийн байгууллагад Хяналт шалгалт-Дотоод аюулгүй байдлын чиг үүргийн бүтэц бий болсны 30 жилийн ойг угтан төв байрны алба, газар, хэлтсийн алба хаагчдын хүүхдүүдийн дунд “Цагдаа-Миний нүдээр” зохион бичлэг, гар зургийн уралдааныг зохион байгууллаа.

Энэхүү уралдаанд 4-8 насны хүүхдүүд гар зураг, 9-16 насны хүүхдүүд зохион бичлэгийн бүтээлээр оролцож, нийт 22 бүтээл ирсэн юм.

“Цагдаа-Миний нүдээр” уралдааны гар зургийн төрөлд Санхүү, аж ахуйн албаны Хангамжийн хэлтсийн дарга, цагдаагийн хурандаа С.Баасанжавын хүү Б.Соёмбо, зохион бичлэгийн төрөлд Хүний нөөцийн хэлтсийн ахлах мэргэжилтэн, цагдаагийн хошууч Б.Батцэцэгийн охин А.Азжаргал нар тус тус “Тэргүүн байр” эзэллээ.