Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ГЭР БҮЛИЙН ХҮЧИРХИЙЛЭЛТЭЙ ТЭМЦЭХЭД ХОХИРОГЧ ТӨВТЭЙ ХАНДЛАГЫГ ХЭРЭГЖҮҮЛЭХ НЬ СУРГАЛТ ЗОХИОН БАЙГУУЛАГДЛАА

Монгол Улсад жендерт суурилсан хүчирхийлэлтэй тэмцэх үйл ажиллагааг бэхжүүлэх төсөл 2019 оноос 3 дахь жилдээ хэрэгжиж байна.  Энэхүү төслийн хүрээнд Цагдаагийн ерөнхий газраас Улсын ерөнхий прокурорын газар, Олон Улсын эрх зүйн хөгжлийн байгууллагатай хамтран “Гэр бүлийн хүчирхийлэлтэй тэмцэхэд хохирогч төвтэй хандлагыг хэрэгжүүлэх нь” сургалтыг энэ сарын 08, 09-ний өдрүүдэд зохион байгууллаа.

Уг сургалтаар гэмт хэрэг, зөрчилтэй тэмцэхэд хууль сахиулах, шүүх эрх мэдлийн байгууллагын ажилтан, алба хаагчдад зориулсан гэр бүлийн хүчирхийлэлтэй тэмцэхэд хохирогч төвтэй хандлагыг хэрэгжүүлэх талаар гол ойлголт мэдлэг, ур чадварыг эзэмшүүлсэн юм.

“ХҮНИЙ ЭРХИЙН СУРГАГЧ БАГШ БЭЛТГЭХ СУРГАЛТ”-Д АЛБА ХААГЧДЫГ ХАМРУУЛЛАА

Цагдаагийн ерөнхий газраас Хүний эрхийн үндэсний комисстой хамтран цагдаа, дотоодын цэргийн байгууллагын үйл ажиллагаанд хүний эрхэд суурилсан хандлагыг төлөвшүүлэх, Цагдаагийн ерөнхий газрын харьяа алба, нэгж, байгууллагуудын алба хаагчдын хүний эрхийн мэдлэг, ойлголтыг нэмэгдүүлэх, сургагч багш бэлтгэх зорилгоор цагдаа, дотоодын цэргийн байгууллагын 30 алба хаагчийг “Хүний эрхийн сургагч багш бэлтгэх сургалт”-д хамрууллаа.

“Хүний эрхийн сургагч багш бэлтгэх сургалт”-аар Боловсролын судалгааны үндэсний хүрээлэнгийн секторын эрхлэгч, доктор У.Туяа “Насанд хүрэгчдэд зориулсан сургалтын арга зүй”, Хүний эрхийн үндэсний комиссын гишүүн, доктор, дэд профессор Д.Сүнжид “Хүний эрхийн хязгаарлалт”, Хүний эрхийн үндэсний комиссын гишүүн, доктор, дэд профессор Б.Энхболд “Эрүү шүүлтээс ангид байх”, Хүний эрхийн сургалт, сурталчилгааны хэлтсийн дарга Х.Цэцгээ “Цагдаагийн алба хаагчийн хөдөлмөрлөх эрх”, “Жендерийн тэгш байдал ба ажлын байрны бэлгийн дарамт”, Хүний хувийн мэдээлэл хамгаалах хэлтсийн дата сүлжээ хариуцсан ажилтан Д.Амаржаргал “Хүний хувийн мэдээлэл хамгаалах асуудал”, Хүчирхийллийн эсрэг үндэсний төвийн захирал, хуульч, өмгөөлөгч Н.Арвинтариа “Хүчирхийллийн хохирогч хүүхэдтэй ажиллах арга зүй” сэдвийн хүрээнд тус тус сургалт орлоо.

“НАМАЙГ АЛГАС” НӨЛӨӨЛЛИЙН АЯН ЭХЭЛЛЭЭ

Цагдаагийн байгууллагаас Монгол Улсын Ерөнхийлөгчийн 2022 оны 43 дугаар зарлигт тусгагдсан архи согтууруулах ундааны зохисгүй хэрэглээнээс  үүдэлтэй  хүн амын эрүүл мэнд, нийгмийн аюулгүй байдал, эдийн засагт үзүүлэх сөрөг нөлөөллийг бууруулах, хорт зуршлаас ангид шинэ үеийг төлөвшүүлэх, согтууруулах ундааны хор уршиг, сөрөг нөлөөг сурталчлан таниулах чиглэлээр архи, согтууруулах ундааны зохисгүй хэрэглээг бууруулах, урьдчилан сэргийлэх “Намайг алгас” ухуулга, нөлөөллийн аяныг эхлүүллээ. Тус аян нь энэ оны 11 дүгээр сарын 07-ноос 12 дугаар сарын 15-ны өдөр хүртэл үргэлжлэх юм

“МАЛ МАХ” АРГА ХЭМЖЭЭ УЛСЫН ХЭМЖЭЭНД ЗОХИОН БАЙГУУЛАГДАЖ БАЙНА

Цагдаагийн байгууллагаас идэшний цаг эхэлж байгаатай холбоотойгоор жил бүрийн 11 дүгээр сараас эхлэн “Мал мах” нэгдсэн арга хэмжээг улсын хэмжээнд тодорхой хугацаанд зохион байгуулдаг. Энэ жилийн хувьд ч мөн адил мал хулгайлах гэмт хэрэгтэй тэмцэх, илрүүлэлтийг ахиулах, таслан зогсоох, урьдчилан сэргийлэх ажлыг эрчимжүүлэх, мах, махан бүтээгдэхүүний бүртгэл, хяналтыг сайжруулах, энэ төрлийн гэмт хэрэгт эрэн сурвалжлагдаж байгаа этгээдүүдийг олж тогтоон, хэрэг бүртгэлт, эрүүгийн хэргүүдийг шийдвэрлэх зорилгоор “Мал, мах-2022” нэгдсэн арга хэмжээг улсын хэмжээнд 11 дүгээр сарын 04-ний өдрөөс эхлэн 1 сарын хугацаанд зохион байгуулж байна. Арга хэмжээ эхэлсэн өдрөөс хойш 7 хоногийн хугацаанд Архангай, Сүхбаатар, Дорнод, Завхан, Хөвсгөл, Хэнтий, Сэлэнгэ, Баянхонгор, Булган, Төв аймаг, Багануур дүүрэгт нийт 22 мал хулгайлах хэрэг бүртгэгдсэнээс Хэнтий, Баянхонгор, Хөвсгөл, Булган, Завхан, Төв аймгуудад үйлдэгдсэн 8 хэргийг халуун мөрөөр нь илрүүлэн шалгалтын ажиллагаа явуулж байна.

МЭДҮҮЛЭГ АВАХ ӨРӨӨГ АШИГЛАЛТАД ОРУУЛЛАА

Сэлэнгэ аймгийн цагдаагийн газрын Сайхан сум дахь сум дундын цагдаагийн хэлтсээс Монгол Улсын Үндсэн хуулиар баталгаажуулсан хүний эрхийг хангах, эрүүгийн хэрэг хянан шийдвэрлэх ажиллагааны оролцогч нарын аюулгүй байдлыг хангах зорилгоор 

Орхон, Орхонтуул, Баруунбүрэн, Сант сумын цагдаагийн хэсгийн байрны нэг өрөөг мэдүүлэг авахад тусгайлан бэлдэж тус сум дахь сум дундын Прокурорын газраас Улсын ерөнхий прокурорын баталсан мэдүүлэг авах өрөөнд тавигдах шаардлага бүрэн хангагдсан гэж дүгнэн зөвшөөрөл олгож, мэдүүлэг авах өрөөг үйл ажиллагаанд ашиглаж эхэллээ.