ДОЛОО ХОНОГИЙН ОНЦЛОХ ТОЙМ

2022-10-14 15:26:00

946

Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ЦАГДАА, ДОТООДЫН ЦЭРГИЙН АНГИ, БАЙГУУЛЛАГУУДЫН ГАР БӨМБӨГИЙН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛАГДЛАА

Цагдаа, дотоодын цэргийн анги, байгууллагуудын дунд жил бүр спортын 18 төрлөөр цогцолбор тэмцээн зохион байгуулж алба хаагчдынхаа авхаалж самбаа, ур чадварыг сорин өрсөлддөг уламжлалтай. Энэ жилийн цагдаа, дотоодын цэргийн анги байгууллагын цогцолбор тэмцээний 11 дэх тэмцээн Гар бөмбөгийн тэмцээнээр үргэлжилж, тэмцээнийг Цагдаагийн ерөнхий газрын Санхүү, аж ахуйн албанаас зохион байгуулж аваргаа шалгарууллаа.

Эрэгтэй багийн төрөлд "Тэргүүн байр"-ыг Говь-Алтай аймаг дахь цагдаагийн газар, "Дэд байр"-ыг Нийслэлийн цагдаагийн удирдах газар, "Гутгаар байр"-ыг Дундговь аймаг дахь цагдаагийн газар эзэлсэн бол Эмэгтэй багийн төрөлд "Тэргүүн байр"-ыг Нийслэлийн цагдаагийн газар, "Дэд байр"-ыг Цагдаагийн ерөнхий газар, "Гутгаар байр"-ыг Ховд аймаг дахь цагдаагийн газар эзэллээ.

Тэмцээний багийн нийлбэр дүнгээр “Тэргүүн байр”-ыг Нийслэлийн цагдаагийн удирдах газар, “Дэд байр”-ыг Завхан аймаг дахь цагдаагийн газар, “Гутгаар байр”-ыг Ховд аймаг дахь цагдаагийн газар тус тус эзэллээ.

ИРЭЭДҮЙГЭЭ ХАМГААЛЪЯ УРИАТАЙ АНЗААР АЯНЫ НЭЭЛТ БОЛЛОО

Мансууруулах эм, сэтгэцэд нөлөөт бодисын хор уршиг, эрх зүйн үр дагаврын талаар иргэд олон нийтийн мэдлэг, мэдээллийг сайжруулах, хүүхэд залуучуудад тайлбарлан таниулах, энэ төрлийн гэмт хэргээс урьдчилан сэргийлэх, түүнтэй тэмцэхэд байгууллага, иргэдийг татан оролцуулж, анхаарлыг хандуулах, хууль сахиулах байгууллагуудын хамтын ажиллагаа, уялдааг нэмэгдүүлэх зорилгоор Сүхбаатар дүүргийн Гэмт хэргээс урьдчилан сэргийлэх ажлыг зохицуулах салбар зөвлөл, Цагдаагийн ерөнхий газрын Хар тамхитай тэмцэх газартай хамтран Ирээдүйгээ хамгаалъя уриан дор дүүргийн нутаг дэвсгэрийн хэмжээнд "АНЗААР" аяныг 2022 оны 10 дугаар сарын 10-наас 11 дүгээр сарын 04-ны хооронд зохион байгуулж байна.

Бидний ирээдүй болсон өсвөр насны хүүхэд багачууд, 18-35 насны залуус мансууруулах эм, сэтгэцэд нөлөөлөх бодисын хор хөнөөлд илүүтэйгээр өртөж буй нь судалгаагаар гарсан байна. Цагаан тахал гэж нэрлэгдээд буй аюулаас урьдчилан сэргийлэх, түүнтэй тэмцэх ажлыг эрчимжүүлэхэд Нутгийн захиргааны байгууллагууд, хороодын ажилтнууд, Боловсролын байгууллагуудын багш, ажилтан, эцэг эх, оюутан, залуучууд, Эрүүл мэндийн байгууллагуудын ажилтан, Аж ахуйн нэгж, төрийн бус байгууллагуудын ажилтан, дүүрэг дэх Шүүх, Прокурор,Цагдаагийн байгууллагын алба хаагчдын оролцоо, хамтын ажиллагаа чухал болохыг онцолсон юм.

АНГЛИ ХЭЛНИЙ ДУНД, ГҮНЗГИЙ ШАТНЫ СУРГАЛТ ЗОХИОН БАЙГУУЛЛАА

Цагдаагийн ерөнхий газрын даргын 2022 оны тушаалаар батлагдсан “Цагдаа, дотоодын цэргийн алба хаагчдын мэдлэг, ур чадварыг дээшлүүлэх 2022 оны сургалтын нэгдсэн хөтөлбөр, төлөвлөгөө”-ний дагуу гадаад хэлний мэдлэгийг дээшлүүлэх зорилгоор Абсолют гадаад хэлний төвтэй хамтран англи хэлний дунд-гүнзгий шатны 2 сарын эрчимжүүлсэн сургалтыг энэ оны 3,9 дүгээр саруудад зохион байгууллаа.

Сургалтад төв, орон нутгийн 14 алба хаагчид хамрагдсанаас А-6, B-6, C-2 үнэлгээтэйгээр 100 хувь амжилттай төгсөж, гэрчилгээ гардан авлаа.

Уг сургалтад хамрагдаж, тавигдах шаардлагыг хангасан 7 алба хаагч Нэгдсэн үндэстний байгууллагын цагдаагийн албаны энхийг сахиулах ажиллагаанд цагдаагийн үүрэг гүйцэтгэх алба хаагчдыг бэлтгэх сургалтад үргэлжлүүлэн суралцаж байна.

СЭРГИЙЛЭГЧ ХҮҮ, СЭРГИЙЛЭГЧ ОХИН СУРАГЧДАД ЗӨВЛӨГӨӨ ӨГЛӨӨ

Нийслэлийн цагдаагийн удирдах газрын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсээс хүүхдийг гэмт хэрэг, зөрчлөөс урьдчилан сэргийлэх, болзошгүй эрсдэлээс хамгаалах чиглэлээр ерөнхий боловсролын 1,5,52,30,29 дүгээр сургуулийн 250 сурагчдад зөвлөгөө мэдээлэл өгч, сэргийлэгч хүү, сэргийлэгч охины санамжийг үзүүлж сурталчиллаа.

ОЛОН НИЙТИЙН ЦАГДААГААР АЖИЛЛАХ ИРГЭДИЙГ СОНГОН ШАЛГАРУУЛАХ ЗАР

Олон нийтийн цагдаагийн сул орон тоог нөхөн хангах чиглэлээр Нийслэлийн цагдаагийн удирдах газрын Хүний нөөц, сургалтын хэлтсээс Нийслэл хотод ажиллуулах олон нийтийн цагдаагийн сонгон шалгаруулалтыг 2022 оны 10 дугаар сарын 10-наас 30-ны өдрийг хүртэл бүртгэж, сургалтыг Цагдаа, дотоодын цэргийн сургалтын нэгдсэн төвд зохион байгуулахаар төлөвлөсөн тул болзол шалгуурыг хангасан иргэд өөрийн харьяа оршин суугаа газрын цагдаагийн газар, хэлтэст холбогдох материалыг бүрдүүлж өгнө үү.

Олон нийтийн цагдаагаар судлагдах иргэдэд тавигдах шаардлага: Улаанбаатар хотын харьяа байх

Бүрэн дунд болон түүнээс дээш боловсролтой 20 нас хүрсэн /эрэгтэй, эмэгтэй/

168 см-ээс дээш өндөртэй

Биеийн зөв хөгжилтэй

Цэргийн алба хаасан бол давуу тал болно.

Урьд өмнө ял шийтгэл эдэлж байгаагүй. / гэмт хэрэг, зөрчилд холбогдож байгаагүй/

Биеийн ил харагдах хэсэгт шивээс, нүүрэнд илэрхий сорви, мэс заслын оёдолгүй байх

Бүрдүүлэх материал:

Олон нийтийн цагдаагаар ажиллахыг хүссэн өргөдөл

Ял шийтгэлийн лавлагаа

Төрийн албан хаагчийн анкет

Гурван үеийн түүх /өөрийн төрсөн эцэг эх, эхийн эцэг, эхнэр /нөхөр/ -ийн гэсэн 8-н хүний намтрыг өөрийн гараар дэлгэрэнгүй бичих